TAʼLIM SIFATINI OShIRIShGA BAGʻIShLANGAN YIGʻILISh BOʻLIB OʻTDI

Shu yilning 19-noyabrida Mangʻit shahridagi 82-sonli maktab faollar zalida tuman Xalq taʼlimi boʻlimi xodimlarining kengaytirilgan yigʻilishi boʻlib oʻtdi.

Yigʻilishga boʻlim masʼul xodimlari, tizimdagi barcha maktablarning direktorlari, ZOOM dasturi boʻyicha barcha maktablar direktorlarining  oʻquv ishlari boʻyicha, maʼnaviy-maʼrifiy ishlar boʻyicha, xoʻjalik ishlari boʻyicha  oʻrinbosarlari, psixologlar va yoshlar yetakchilari, tuman Favqulodda vaziyatlar boʻlimi va tuman prokuraturasi xodimlari ishtirok etdilar.

Ishtirokchilar dastlab tuman prokuraturasining 2021-yil 31-oktyabr kungi “Qonun buzilishi, uning kelib chiqish sabablari va unga imkoniyat yaratib berayotgan shart-sharoitlarni bartaraf etish toʻgʻrisida”gi taqdimnomasini koʻrib chiqish va ijrosini taʼminlash toʻgʻrisida”gi masala yuzasidan tuman Xalq taʼlimi boʻlimi mudiri Akmal Ismoilovning fikr-mulohazalarini tingladilar.

Kun tartibidagi ikkinchi masala - Oʻzbekiston Respublikasining “Korruptsiyaga qarshi kurashish toʻgʻrisida”gi Qonuni mazmun-mohiyati toʻgʻrisida tuman prokurori katta yordamchisi A.Bekberganov maʼruza qildi va korruptsiyaning, qonunga xilof ravishda harakatlar qilishning huquqiy oqibatlari haqida keng tushunchalar berdi.

Shuningdek, tuman Favqulodda vaziyatlar boʻlimi kapitani Begzod Tojiboyev, katta leytenant Begzod  Ollomberganovlar kuz-qish mavsumida umumiy oʻrta taʼlim muassasalaridan isitish tizimidan foydalanishda xavfsizlik qoidalariga rioya qilish, is gazidan zaharlanishdan saqlanish, yongʻin xavfsizligining asosiy qoidalari haqida maʼruzalar qildilar. Tumandagi mavjud umumiy oʻrta taʼlim maktablarida yongʻin xavfsizligi qoidalarini targʻib etish maqsadida amaliy  oʻquv mashgʻulotlarini oʻtkazish lozimligini taʼkidladilar va xalq taʼlimi tizimida faoliyat yuritayotgan barcha xodimlarni “Yongʻin xavfsizligi oyligi”ni ushqoqlik bilan oʻtkazishda faol qatnashishga chaqirdilar.

Yigʻilishda Oʻzbekiston Respublikasi Vazirlar Mahkamasi huzuridagi Taʼlim sifati nazorati davlat inspektsiyasi tomonidan 2021-yil 3-noyabr kungi taqdim etilgan umumiy oʻrta taʼlim maktablari peytingida aniqlangan kamchiliklarni bartaraf etish toʻgʻrisidagi taqdimotdan soʻng, tuman Xalq taʼlimi boʻlimi tizimidagi maktablarda oʻtgan oʻquv yili davomida yoʻl qoʻyilgan kamchiliklar, ularni bartaraf etish yoʻl-yoʻriqlari xususida boʻlim mudiri Akmal Ismoilovning tavsiyalari tinglandi.

Shuningdek, har bir maktab rahbarlari koʻrsatib oʻtilgan kamchiliklardan tegishli xulosa chiqarib olishlari va bartaraf etishlari lozimligi uqtirildi.

Aytish joizki, kelgusida Milliy Reyting koʻrsatkichlarini oshirish borasida taʼlim muassasalari rahbarlari, fan oʻqituvchilari, oʻquvchilarning ota-onalari birgalikda harakat qilinsa, albatta ijobiy natijalarga erishish mumkin.

Yigʻilishda muhokama etilgan masalalar yuzasidan tegishli qarorlar qabul qilindi.

Ravshan Xolmurodov, tuman Xalq taʼlimi boʻlimi taʼlim sifati monitoringi boʻlimi bosh inspektor-metodisti.