2-sonli maktabda “Yoshlar – yangi Oʻzbekiston bunyodkorlari” loyihasi doirasida davra suhbati oʻtkazildi

Tumaniizda faoliyat yuritayotgan “Jayxun ilhomlari” nodavlat notijorat tashkiloti tomonidan eʼlon qilingan “Yoshlar – yangi Oʻzbekiston bunyodkorlari” loyihasi asosida tumanimizning barcha joylarida davra suhbatlari, madaniy tadbirlar, ijodiy uchrashuvlar oʻtkazilib kelinmoqda. Loyiha tashkilotchilari tomonidan bu tadbirlarga har bir mahallaning faol yoshlari, yosh ijodkorlar taklif etilib ular tomonidan aholi oʻrtasida grant loyihaning mazmun-mohiyati va ahamiyati, loyiha doirasida amalga oshiriladigan ishlar va ulardan kutilayotgan natijalar haqida suhbatlar olib borilmoqda, fikr-mulohazalar bildirilib, amaliy takliflar oʻrtaga tashlanmoqda.

Ana shunday mazmundagi navbatdagi davra suhbati tuman xalq taʼlimi boʻlimiga qarashli 2-sonli umumtaʼlim maktabida oʻtkazildi. “Yoshlar oʻrtasida sogʻlom turmush tarzi koʻnikmalarini keng targʻib qilish, ularni giyohvandlik, ichkilikbozlik, turli axloqsizliklardan himoya qilish” maqsadida  oʻtkazilgan davra suhbatiga maktabning faol oʻquvchilari, oʻqituvchilari taklif etildi.

Yigʻilganlar oldida “Jayxun ilhomlari” nodavlat notijorat tashkiloti raisi Oʻrozali Reyimov chiqib gapirib respublikamizning barcha joylaridagi kabi tumanimizda ham yoshlarning chuqur  bilim olishi, kelajakda oʻzlari sevgan kasb egasi boʻla olishlari, ijodiy ishlar bilan faol shugʻullanishi, bor iqtidorini namoyish etib, komil inson boʻlib yetishishlari uchun barcha imkoniyatlar muhayyo ekanligini alohida taʼkidlab oʻtdi. Haqiqatdan ham insonning ichki dunyosi boy, maʼnaviy tushunchasi keng boʻlsagina taraqqiyotga erishadi.

Sogʻlom tanda sogʻ aql deb bejiz aytishmagan. Sogʻ tanda sogʻ aqlga ega inson buyuk ishlarni yaratishga qodir boʻla oladi.

Davra suhbati ishtirokchisi, faxriy shifokor Tojiboy Bozorboyev davra suhbatidagi oʻz chiqishini ana shunday purmaʼno gaplar bilan boshladi. Har bir inson sogʻlom turmush tarzini yaratishga hissa qoʻshmogʻi uchun avvalo oʻzi ichkilikbozlik, giyohvandlik, turli zararli illatlardan oʻzini yiroq tutmogʻi zarur. Oʻzining ijobiy xususiyatlari bilan boshqalarga oʻrnak boʻla oladigan odamgina oʻzgalarga toʻgʻri yoʻlni koʻrsata oladi. Uzoq umr koʻrish, sogʻlom yashab, sogʻlom avlodni voyaga yetkazish uchun har kim yoshligidan mustahkam poydevor yaratishi kerak – dedi tajribali shifokor oʻz soʻzida.

Biz soʻz yuritayotgan 2-sonli umumtaʼlim maktabining maʼrifiy-madaniy ishlar boʻyicha targʻibotchisi Ahmad Nafasov maktabdagi faoliyat yuritayotgan ijodiy toʻgaraklar haqida aytib oʻtdi. Yaqinda tumandagi maktab oʻquvchilari orasida oʻtkazilgan “Men sevgan badiiy asar” insholar tanlovida mazkur maktabning 11-sinf oʻquvchisi Farida Saʼdullayeva faxrli ikkinchi oʻrinni egalladi. Ushbu insholar tanlovida faol ishtirok etgan 9 B-sinf oʻquvchisi Muxlisa Qurolboyevaga “Jayxun ilhomlari” nodavlat notijorat tashkiloti tomonidan “Faxriy yorliq” topshirildi.

Davra suhbati yakunida 2-sonli  umumtaʼlim maktabi direktori Anvar Allambergenov tashkilotchilarning tashrif va fikr-mulohazalari uchun maktab jamoasi nomidan minnatdorchilik bildirdi.

“Oilada farzand tarbiyasining ahamiyati, yoshlarni zararli illatlar va turli axloqsizliklardan himoya qilishda ota-onalar va mahallaning oʻrni”  mavzusidagi navbatdagi davra suhbati shu yilning dekabr oyi boshida Bobur ovul fuqarolar yigʻinida oʻtkazildi. 

Oygul Rajabova