DAVLAT BAYROGʻI QABUL QILINGAN KUN MUNOSABATI BILAN MAʼNAVIY-MAʼRIFIY TADBIR OʻTKAZILDI

Yurtimizda Oʻzbekiston Respublikasining Davlat bayrogʻi qabul qilinganligining 30 yilligi keng nishonlanmoqda. Barcha korxona-tashkilotlar, taʼlim muassasalarida ushbu sana munosabati bilan tadbirlar tashkil etilmoqda.

17-noyabr kuni tumandagi 36-sonli umumiy oʻrta taʼlim maktabining 6-“A” sinfida ham Davlat bayrogʻi qabul qilinganligining 30 yilligiga bagʻishlab madaniy-maʼrifiy tadbir oʻtkazildi. Tarix fani oʻqituvchisi Nurbek Otaxonov hamda sinf rahbari Dilnura Boboniyozova tomonidan tashkil etilgan mazkur tadbirda oʻquvchilar faol ishtirok etdilar. Tadbirga tashrif buyurgan oʻqituvchi va oʻquvchilarni 18-noyabr – Oʻzbekiston Respublikasi Davlat bayrogʻi qabul qilingan kun bilan chin dildan tabrikladilar.

Tadbirda ozod va obod Vatanimiz – Oʻzbekiston bayrogʻi ulugʻ maqsadlar tomon boshlovchi buyuk mashʼala, davlat ramzlari har bir xalqning mustaqilligi, ozodligi, tinchligi va barqarorligi timsoli ekanligi alohida taʼkidlab oʻtildi. Davlat bayrogʻi bugungi Oʻzbekiston hududida qadimda mavjud boʻlgan davlatlar bilan tarixan bogʻliqligini anglatishi hamda respublikaning milliy-madaniy anʼanalarini oʻzida mujassamlashtirishi, bayroq qadim-qadimdan har bir xalq uchun mustaqillik, hurlik, tinchlik va barqarorlik timsoli boʻlib kelganligi, ajdodlarimiz ham yurt bayrogʻini muqaddas bilib, uni koʻz qorachigʻidek asraganligi, davlatchiligimiz tarixining barcha davrida bayroq ajdodlarimiz uchun ozodlik, kuch-qudrat, jasorat, gʻalaba timsoli boʻlganligi toʻgʻrisida soʻz yuritildi.

Davlat bayrogʻi toʻgʻrisidagi qonuni qabul qilinganining 30 yilligiga bagʻishlangan tadbirda oʻquvchilar Vatan, bayroq, tinchlik haqidagi sheʼrlarini faxru-iftixor, cheksiz gʻurur bilan ifodali yod aytib berdilar. Oʻquvchilar sahna koʻrinishlari, qoʻshiqlar ham ijro etishdi. Dilrabo raqslari bilan bayramga tashrif buyurgan oʻqituvchi-ustozlar koʻnglini xushnud qildilar va tadbirga yanada fayz kiritdilar.

Oʻquvchilar tadbir davomida davlatimiz bayrogʻi haqida oʻz bilimdonliklarini namoyish etib, 1991-yilning 18-noyabri «Oʻzbekiston Respublikasining Davlat bayrogʻi toʻgʻrisida»gi qonun qabul qilingan sana sifatida tariximizga muhrlanganini, ushbu qonunning 2-moddasida «Oʻzbekiston Respublikasining Davlat bayrogʻi Oʻzbekiston Respublikasi davlat suverenitetining ramzidir», deb belgilab qoʻyilgani xususida soʻzlab berdilar. Shuningdek, bayroqning koʻrinishini ifodalab, butun uzunligi boʻylab oʻtgan toʻq moviy rang, oq rang va toʻq yashil rangli uchta endan tarkib topgan toʻgʻri toʻrtburchak shaklidagi mato koʻrinishidagi bayroqning uzunligi 250 santimetrga, kengligi 125 santimetrga tengligini gapirib oʻtishdi. Moviy rang, oq rang va yashil rangli enlarning kengligi bir xilligi,  har bir en 40 santimetrga tengligi, oʻrtasidagi oq rangli enning chetlaridan kengligi 2,5 santimetr boʻlgan qizil hoshiyalar oʻtkazilganligini tasvirlab berishdi.

Oʻquvchi-yoshlar milliy bayrogʻimizning davlat idora va muassasalari, oʻquv yurtlari, Oʻzbekiston aʼzo boʻlgan halqaro tashkilotlar, chet eldagi elchixona va doimiy vakolatxonalarimiz peshtoqida hilpirab turishi, xalqaro miqyosdagi siyosiy, madaniy-maʼrifiy tadbirlarda, nufuzli sport musobaqalarida ham bayrogʻimiz Vatanimizning shaʼni, xalqimizning gʻururini yorqin aks ettirishi, oʻz qadr-qimmatini, tayanchi va suyanchini anglagan xalqning milliy timsoli boʻlgan bayroq hamisha eʼzozlanishini gʻurur bilan soʻzlashdi.

Koʻtarinki ruhda oʻtgan maʼnaviy-maʼrifiy tadbirga tashrif buyurganlar Vatanimiz bayrogʻi haqida toʻliq maʼlumotlar oldilar. Oʻquvchilarning Oʻzbekiston Respublikasi Davlat bayrogʻining tasviri, mohiyati, undan foydalanish qoidalari haqidagi fikr-mulohazalari ham barchaga manzur boʻldi.

Ozoda Xudoyberganova, 36-sonli maktabning ijodiy-madaniy masalalar boʻyicha targʻibotchisi.