“YoShLAR DAFTARI”GA KIRITILGAN AYoL-QIZLARGA ZAMONAVIY TIKUV MAShINALARI BERILDI

Yurtimizda “Yoshlar daftari”ga kiritilgan xotin-qizlar va yoshlarni kasb-hunar egallashlariga alohida eʼtibor qaratilib, tikuv mashinalari, motokultivatorlar va payvandlash uskunalari tarqatilmoqda. Tumanimizda ham  mazkur daftarga kiritilgan ishsiz, kam taʼminlangan oilalar farzandlariga amaliy yordam koʻrsatilib, tadbirkorlikni yoʻlga qoʻyishlariga, daromadga ega boʻlishlariga koʻmak berilmoqda.

 10-noyabr kuni tuman hokimligi binosida 18 nafar “Yoshlar daftari”ga kiritilgan ayol-qizlarga tadbirkorlik faoliyatini boshlashiga koʻmak berish orqali bandligini taʼminlash maqsadida bepul zamonaviy tikuv mashinalari tarqatildi. Tadbirda tuman hokimi Sultonboy Yoʻldashev, sektorlar rahbarlari, Yoshlar agentligi tuman boʻlimi masʼullari  va boshqalar ishtirok etishdi.

Sertifikat bilan birga tikuv mashinalarini topshirgan tuman hokimi Sultonboy Yoʻldashev ularning kelgusi ishlarida omad va zafarlar tiladi. Soʻzi davomida shu tikuv mashinalari orqali yakka tartibdagi tadbirkorlik faoliyatini yoʻlga qoʻygan ayol-qizlarga yetarlicha imkoniyat yaratib berilishini aytib oʻtdi.

Bugungi kunga qadar, 49 ta mahallalarda oʻrganish lozim boʻlgan 44 340 nafar yoshlarning 43 119 nafari bilan birma-bir muloqot qilinib, shundan, “Yoshlar daftari”ga 6 753 nafar yoshlar kiritilgan edi. Koʻrilgan amaliy chora-tadbirlar natijasida 6 599 nafar daftardan chiqarildi. Hozirda tuman boʻyicha 44 nafar yoshlar “Yoshlar daftari”da qolmoqda.

Jumladan, “Yoshlar daftari”dan chiqarilgan yoshlarning 858 nafari doimiy va jamoat ish oʻrinlariga joylashtirildi, 318 nafariga 9 mlrd. 617 mln. soʻm imtiyozli kreditlar berildi. “Har bir yoshga – bir gektar” tamoyili asosida 5114 nafar yoshlarga 1135 gektar yer maydonlari,  309 nafar yoshlarga subsidiya ajratildi.

 “Yoshlar daftari”ga kiritilgan yoshlarni qoʻllab-quvvatlash maqsadida tashkil etilgan maxsus jamgʻarmada jami 1 mlrd. 352 mln. soʻm mablagʻ shakllantirilgan boʻlib, uning 1021,1 mln. soʻmi mahalliy byudjetdan, 330,9 mln. soʻmi undiruvlarga oid ijro hujjatlari boʻyicha ajratma mablagʻlarini tashkil etadi.

Bugungi kunga qadar jamgʻarma mablagʻlari hisobidan 1551 nafar yoshlarni ijtimoiy qoʻllab-quvvatlash uchun 1 059,9 mln. soʻm mablagʻ sarflandi. Xozirda jamgʻarma mablagʻlari hisobida 292,1 mln. soʻm mablagʻ qolmoqda. Jumladan, 21 nafar yoshlarga bir martalik moddiy yordam ajratish uchun 20,7 mln. soʻm, 189 nafar yoshlarga asbob-uskunalar va mehnat qurollari xarid qilish uchun 307,8 mln. soʻm, 76 nafar yoshlarga haydovchilik guvohnomasi uchun 106,3 mln. soʻm mablagʻ ajratib berildi. Shuningdek, 12 nafar yoshlarga toʻlov-kontrakt summasining 50 foiz qismi uchun 51,5 mln. soʻm sarf etildi. Undan tashqari, 2 nafar yoshlarga safarbarlik chaqiruv rezervi xizmati badali uchun 10,5 mln. soʻm, 20 ta mahalla fuqarolar yigʻinlariga “Street work out” sport maydonchalari qurish uchun 150 mln. ajratildi.

Shu bilan birga 1 251 nafar yoshlarning isteʼdodini qoʻllab-quvvatlash uchun 413,1 mln. soʻmga umumtaʼlim maktablariga 500 ta futbol, 500 ta voleybol koptoklari, 85 ta futbol, 85 ta voleybol uchun maxsus toʻrlar hamda tuman Madaniyat markaziga 5 ta ovoz kuchaytirgich moslamasi, 1 ta sentizator, 4 ta musiqali markaz, 20 ta qashqar rubobi va 59 ta doira olib berildi.

Tadbirda masʼullar tomonidan berilgan zamonaviy tikuv mashinasiga ega boʻlgan ayol-qizlar yurtimizda yoshlarga qaratilayotgan bunday eʼtibor kelgusida tadbirkorlik faoliyatlarini yoʻlga qoʻyishlarida, rivojlantirishlarida muhim ahamiyat kasb etishini aytib, oʻz minnatdorliklarini bildirdilar.

J.Davletov, Yoshlar ishlari agentligi tuman boʻlimi boshligʻi.