DAVRA SUHBATI OʻTKAZILDI

Tumanimizda faoliyat olib borayotgan “Jayxun ilhomlari” nodavlat notijorat tashkiloti tomonidan “Yoshlar – yangi Oʻzbekiston bunyodkorlari” loyihasi doirasida mahallalar va umumtaʼlim maktablarida, korxona va tashkilotlarda uchrashuvlar, davra suhbatlari oʻtkazib kelinmoqda.

Yoshlar oʻrtasida sogʻlom turmush tarzi koʻnikmalarini keng targʻib qilish, ularni giyohvandlik, ichkilikbozlik, turli axloqsizliklardan himoya qilish maqsadida tumanimizdagi 17-sonli umumtaʼlim maktabida navbatdagi davra  suhbati oʻtkazildi. Davra suhbatida shifokorlar, maʼnaviyat targʻibotchilari, faol yoshlar, mahalla imomlari ishtirok etdilar.

Maktabning oʻqituvchi va oʻquvchilari davra suhbatida jam boʻldilar.

Davra suhbatida “Jayxun ilhomlari” nodavlat notijorat tashkiloti raisi Oʻrozali Reyimov davlatimiz tomonidan yoshlar uchun yaratilayotgan keng imkoniyatlarga toʻxtalib oʻtdi. Ularning chuqur bilim olishi, dunyoviy bilimlarni oʻrganishi, oʻzi sevgan kasbini egallashi uchun maktab oʻquvchisi paytidayoq ishonchi qadam qoʻyishi uchun barcha qulayliklar yaratib qoʻyilganligini taʼkidladi.

Yoshlarning har tomonlama maʼnaviy yetuk insonlar boʻlib yetishishiga koʻmaklashish uchun koʻplab maʼnaviy tadbirlar, el sevgan sanʼatkorlar, yetuk olimlar, atoqli insonlar bilan uchrashuvlar tashkil qilinmoqda.

Tumanimizda ayniqsa adabiyotsevar, badiiy ijod bilan shugʻullanuvchi yoshlar uchun ulkan imkoniyat eshiklari ochiq. Yoshlarimizning qalamiga mansub sheʼrlar, hikoyalar va boshqa turdagi ijod namunalari “Taraqqiyot koʻzgusi”, “Mening oilam” gazetalarida muntazam yoritib borilmoqda. Amudaryo televideniyesi orqali yoshlar hayotiga oid koʻrsatuvlar tayyorlanib borilmoqda. Bundan tashqari amunews.uz veb-sayti faoliyat yuritmoqda.

“Taraqqiyot koʻzgusi” gazetasi qoshida tashkil etilgan nashriyot tumanimizning barcha yoshdagi ijodkorlarining kitoblarini chop etib qalam soxiblarini elga tanitib kelmoqda.

Yaqinda eʼlon qilingan “Men sevgan badiiy asar” mavzusida oʻtkazilgan insholar tanlovi ham maktab oʻquvchilari orasida oʻtkir zehnli? ijodkor yoshlarning juda koʻp ekanligini namoyon qildi.

Davra suhbatida ishtirok etgan tuman Nibbiyot birlashmasi shifokori Matyoqub Ernazarov mustahkam salomatlik madaniy-maʼnaviy turmushimizning  negizi ekanligiga alohida toʻxtalib oʻtdi. Haqiqat ham faqat salomat insongina madaniy-maʼrifiy ishlar uchun oʻz kuch-qudratini sarflay oladi. Giyohvandlik, ichkilikbozlik, turli axloqsizlik kabi illatlar esa maʼnaviy turmushimizga yot boʻlgan koʻrinishlardir. Shifokor oʻz soʻzida bu insoniyatga yot illatlarning odamzodning hayot tarziga, yoshlarning kelajagi uchun qanchalik zararli ekanligiga barchaning eʼtiborini qaratdi.

“Bir mahalla yetti bolaga ota-ona” degan gaplar bejiz aytilmagan. Yoshlar tarbiyasida  ota-onalar, mahallaning oʻrni beqiyos.

Tuman mahalla va oilani qoʻllab-quvvatlash  boʻlimi mutaxassisi Rahmonjon Bobojonovning yoshlar bilan suhbati kundalik turmushimizning ana shu muhim qirralariga qaratildi.

35-sonli maktabning 10-sinf oʻquvchisi, yosh shoira Barno Samandarova ham shu mahallada yashaydi. Hozirning oʻzida “Ilk parvozim”, “Mehr” deb nomlangan sheʼriy toʻplamlari bilan tumanimiz sheʼriyat ixlosmandlariga tanilib ulgurgan Barno davra suhbati ishtirokchilari boʻlgan oʻz tengqurlariga oʻzining ijodiy faoliyati, maktabdagi oʻqishlari haqida gapirib berdi. Barno hozirgi kunda uchinchi sheʼriy toʻplamini ham nashrga tayyorlamoqda. Ijodiy ishlari bilan bir qatorda maktabda aʼlo baholarga oʻqimoqda. Turli fanlar olimpiadalarida ishtirok etib rus, ingliz, turk tillarini ham mukammal oʻrganmoqda.

Uchrashuv soʻngida Barno Samandarova oʻzining sheʼriy toʻplamlaridan 17-sonli maktab kutubxonasiga sovgʻa qildi. Uchrashuv erkin suhbat, oshkora muloqot tarzida qiziqarli oʻtdi. Davra suhbati ishtirokchilari oʻzlarini qiziqtirgan savollarga mutaxassislardan javoblar oldilar.

Oʻ.REYIMOV.