“KEKSALAR HAFTALIGI” DOIRASIDA SPORT MUSOBAQALARI OʻTKAZILDI

Amudaryo tumanida “Keksalar haftaligi” doirasida 8-oktyabr kuni tuman Mahalla va oilani qoʻllab-quvvatlash boʻlimi, tuman Turizm va sport boʻlimi, tuman “Mahalla” hayriya jamoat fondi, Milliy gvardiya huzuridagi qoʻriqlash boʻlimi bilan hamkorlikda tuman miqyosida sport tadbirlari tashkil etildi. Tadbirda shaxmat-shashka boʻyicha keksalar oʻrtasida, “Aql charxi” turniri, “Keksalar zavqi” sport musobaqalari doirasida sportning shaxmat, shashka, mini-futbol, stol tennisi va boshqa turlari boʻyicha musobaqalar, “Salomatlik sari 5000 qadam” shiori ostida piyoda yurish tadbirlari tashkil qilindi. Tadbirda tumandagi 100 dan ziyod nuroniylar, faxriylar va keksa avlod vakillari faol ishtirok etdilar.

Amudaryo tuman Nuroniylar jamoatchilik Kengashi raisi oʻrinbosari Bekman Allaberganov tadbirni ochib berdi va keksa avlod vakillarining jamiyatdagi oʻrni gʻoyat muhimligini va hayotiy tajribalari yoshlarga oʻrnak boʻlishini taʼkidlab oʻtdi. Tuman Mahalla va oilani qoʻllab-quvvatlash boʻlimi boshligʻi oʻrinbosari Bahodir Boltaboyev keksalik gashtini surayotgan otaxon va onaxonlarga “Keksalar haftaligi” doirasida amalga oshirilayotgan ishlar toʻgʻrisida va bunday tadbirlar koʻplab tashkil qilinishini, albatta, bunda nuroniylarning ishtiroki muhimligini  alohida qayd etdi. Turizm va sport boʻlimi boshligʻi Gʻulomjon Qurbonboyev esa tadbir davomida boʻlib oʻtadigan sport turlari va tartibi bilan tanishtirib, ishtirokchilarga bugungi musobaqalarda omad tiladi.

Musobaqalar Nukus Davlat Pedagogika Instituti huzuridagi iqtidorli bolalar maktabida boʻlib oʻtdi, ishtirokchilar “Salomatlik sari 5000 qadam” shiori ostida musobaqalar oʻtkaziladigan inshootga olib boruvchi yoʻlni piyoda bosib oʻtdilar.

Tadbir yangicha uslubda, yaʼni, Street workout - turnikda tortilish va mashqlar bajarish boʻyicha musobaqa bilan boshlandi. Musobaqada 3-oʻrinni Qizilcholi mahallasidan Jumaboy Matvafoyev, 2-oʻrinni Oybek mahallasidan Yalgʻash Matmuratov, faxrli 1-oʻrinni Qizilcholi mahallasidan Ibragim Yusupovlar egallashdi.

Sport tadbirlari davomida ishtirokchilarning faolligini oshirish maqsadida mini-futbol maydonchasida chigalyozdi mashqlari ham bajarildi.

Shundan soʻng, shaxmat-shashka, stol tennisi musobaqalariga start berildi. Stol tennisi musobaqalarida 3-oʻrinni Doʻstlik mahallasidan Ozod Shomurodov, 2-oʻrinni Olmazor mahallasidan Mambatsoliy Abdullayev, faxrli 1-oʻrinni Olmazor mahallasidan Baxodir Bozorboyevlar egallashdi.

Tadbir davomida, stol tennisi va Street workout musobaqalari gʻoliblariga tuman Nuroniylar jamoatchilik Kengashi raisi oʻrinbosari Bekman Allaberganov hamda tuman Mahalla va oilani qoʻllab-quvvatlash boʻlimi boshligʻi oʻrinbosari Bahodir Boltaboyev, tuman Turizm va sport boʻlimi boshligʻi Gʻulomjon Qurbonboyevlar tomonidan Mahalla hayriya jamoat fondi homiyligida esdalik sovgʻalari taqdim qilindi.

“Keksalar zavqi” sport musobaqalari doirasidagi shaxmat-shashka musobaqalari murosasiz kechdi. Shashka boʻyicha musobaqada 18 nafar ishtirokchi qatnashib, unda 3-oʻrinni Doʻstlik mahallasidan Qurbonboy Yusupov, 2-oʻrinni Boʻston mahallasidan Raximboy Jumaniyozov, faxrli 1-oʻrinni Oʻzbekiston mahallasidan Shomurod Ibodullayevlar egallashdi. Musobaqa yakunida tuman Mahalla va oilani qoʻllab-quvvatlash boʻlimi boshligʻi oʻrinbosari Bahodir Boltaboyev gʻoliblarga esdalik sovgʻalari topshirdi.

Shaxmat musobaqalari yanada qiziqarli taassurotlarga boy boʻldi. Unda maxsus bellashuvlarda 1-oʻrinni Doʻstlik mahallasidan Bekchon Rahimov, Amir Temur nomli ovuldan Ibragim Sultonovlar egallashdi. Asosiy oʻyinlarda esa 3-oʻrinni Oʻzbekiston mahallasidan Ayimbat Kamolov, 2-oʻrinni Qizilcholi mahallasidan Chorsham Matvafoyev, faxrli 1-oʻrinni Qizilcholi mahallasidan Mambatsoliy Matyakubovlar egallashdi. Gʻoliblarga Mahalla hayriya jamoat fondi homiyligida esdalik sovgʻalari taqdim qilindi.

Tadbir davomida Nukus Davlat Pedagogika Instituti huzuridagi iqtidorli bolalar maktabi direktori Otabek Yoʻldashev nuroniy onaxon va otaxonlarni “Keksalar haftaligi” munosabati bilan muborakbod qilib, ularning jamiyatda, ayniqsa, yoshlar tarbiyasida oʻrni beqiyosligi, oʻzlarining hayotiy tajribalari orqali yoshlarga oʻrnak boʻlishi, bu borada yoshlar nuroniylarga suyanishini taʼkidlab oʻtdi va ishtirokchilarni iqtidorli bolalar maktabida yaratilgan shart-sharoitlar bilan yaqindan tanishtirdi.

Tadbir qatnashchilari boʻlgan nuroniylar davlatimiz tomonidan oʻzlariga koʻrsatilayotgan hurmat va eʼtibordan mamnunliklarini bildirdilar va albatta bunday tadbirlar yanada koʻplab tashkil qilinishi lozimligini eʼtirof etdilar. Shu bilan birga tadbir tashkilotchilariga chin dildan minnatdorchlik bildirdilar.

Bahodir BOLTABOYeV, tuman Mahalla va oilani qoʻllab-quvvatlash boʻlimi boshligʻi oʻrinbosari.