FAN OYLIGI OʻTKAZILDI

Hozirgi kunlarda tumanimizdagi barcha umumtaʼlim maktablarida fan oyligi doirasida turli tadbirlar oʻtkazilmoqda. Tumanimizdagi Xalq taʼlimi boʻlimiga qarashli 49-sonli umumtaʼlim maktabida ham mazkur tadbir belgilangan dastur asosida qiziqarli oʻtkazildi.
Maktabda “boshlangʻich taʼlim” fan oyligi doirasida qilinayotgan ishlar, sport, bilimlar dunyosidagi erishilayotgan yutuqlar, musiqa madaniyatini rivojlantirishdagi oʻqituvchi-ustozlarning mashaqqatli mehnatlari tufayli oʻtgan bir oy ichidagi saʼy-harakatlar samarali natijalarga erishildi.
Tadbirda asosan boshlangʻich sinf oʻqituvchilari tadbir qatnashchilari boʻlgan maktab oʻquvchilari, oʻqituvchilar, ota-onalar va taklif qilingan mehmonlar oldida oʻzlarining bilim va iqtidorlarini namoyish etdilar.
Fan oyligi tadbirini maktab direktori Shukurboy Ayimbetov kirish soʻzi bilan ochib berdi. U oʻz soʻzida maktabda har bir oʻquvchining chuqur bilim olishi uchun barcha imkoniyatlar yaratib  qoʻyilganligini aytib oʻtdi va yosh avlodning bilimli insonlar boʻlib yetishishida omadlar tiladi.
Tadbirda boshlangʻich sinf oʻquvchilari ijrosida qoʻshiqlar, raqslar ijro etildi. Jumladan, 2-sinf oʻquvchilarining “Joʻjalarim”, 3-sinf oʻquvchilarining “Kuyladim”, 4-sinf oʻquvchilarining “Bogʻ” nomli, 5-sinf oʻquvchilari ijrosidagi zamonaviy raqslar barcha tomoshabinlarda katta taassurot qoldirdi. Ushbu ijrolar orqali maktab oʻquvchilarining chuqur bilim olish bilan birga musiqa, raqs sanʼatini ham puxta oʻzlashtirayotgani yaqqol namoyon boʻldi.
Boshlangʻich sinflar fan oyligini oʻtkazishdan maqsad maktabdagi iqtidorli, qobiliyatli va ijodkor oʻquvchilarni ragʻbatlantirish, ulardagi ijodiy qobiliyatni oʻstirish, taʼlim-tarbiya jarayonidagi qoʻllanilayotgan metodlarni takomillashtirish va samaradorligini oshirib borishdir.
“Boshlangʻich taʼlim” fan oyligida barcha umumtaʼlim fanlar boʻyicha tadbirlar  rejalashtirilgan boʻlib, bolalarni ushbu fanlarga qiziqtirish asosiy maqsad qilingan. Birinchi sinfga yaqindagina qadam qoʻygan oʻquvchilar burro-burro sheʼrlar, qoʻshiqlar aytib, raqslar ijro etib, oʻz ustozlari ishonchini qanchalik oqlayotganini koʻrsatishdi.
Shu maktabning birinchi sinf oʻquvchisi Gulasal Yoʻldosheva ikki yarim yoshidan buyon sportning  badiiy gimnastika turi bilan shugʻullanib keladi. U nafaqat tumanimizdagi, balki Nukus, Toshkent, Samarqand shaharlarida, Qashqadaryo viloyatida oʻtkazilgan qator nufuzli musobaqalarda ishtirok etib, yuqori oʻrinlarni egallab kelmoqda. U ustozi Nigora Yoʻldoshevadan bilim sirlarini, murabbiy Mohira Berdiboyevadan esa gimnastika sirlarini puxta oʻrganib, oʻz mahoratini oshirib bormoqda. Ustozlari bu sportchi qizning nomdor sportchi, shu bilan birga bilimli, yetuk inson boʻlib voyaga yetishiga katta umid bildirmoqdalar.
Mazkur tadbirda boshlangʻich sinf oʻquvchilari barcha fanlardan yaxshi oʻzlashtirayotganliklarini, shu bilan bir qatorda musiqa, sport sirlarini ham puxta oʻrganib bu boradagi mahoratlarini ham oshirib borayotganliklarini yana bir bor namoyish etdilar.
Fan oyligini oʻtkazish va bu tadbirga oʻquvchilarni  tayyorlashda boshlangʻich sinf oʻqituvchisi Nigora Yoʻldosheva, maʼnaviyat ishlari boʻyicha direktor oʻrinbosari Rahmatulla Ortiqovlar jonbozlik koʻrsatdilar.

F.Avezov, maktabning ijodiy-madaniy masalalar boʻyicha targʻibotchisi.