YaNGI OʻQUV YILI OLDIDAN RESPUBLIKA OʻQUV-AMALIY SEMINARI OʻTKAZILDI
Shu kunlarda mamlakatimizdagi barcha taʼlim-tarbiya muassasalarida yangi 2021-2022 oʻquv yiliga tayyorgarlik ishlari nihoyasiga yetkazilib, boshlanajak yangi oʻquv yilida taʼlim tizimida kutilayotgan yangiliklar, innovatsion pedtexnologik loyihalar, jahon andozalariga mutanosib yangi uslubiy tajribalar va ularni amaliyotga tatbiq etish yuzasidan oʻquv-seminar mashgʻulotlari va amaliy-oʻquv tajriba almashuv seminarlari boʻlib oʻtmoqda.
Joriy yilning 24-avgust sanasida tumanimizdagi 55-sonli umumtaʼlim maktabida boʻlib oʻtgan amaliy-oʻquv seminari ham taʼlim-tarbiya sohasida roʻy berayotgan yangiliklar, soha mutaxassislarining yangi tajribalariga bagʻishlandi.
Qoraqalpogʻiston Respublikasi Xalq taʼlimi Vazirligi tomonidan 2020-2021 oʻquv yili davomida taʼlim sifatini va pedagog kadrlarning salohiyatini oshirishga qaratilgan chora-tadbirlar natijasi hamda 2021-2022 oʻquv yilida “Taʼlim sifatini oshirish va samaradorlikka erishish” mavzusida oʻtkazilgan mazkur Respublika amaliy-oʻquv seminarida Amudaryo, Taxiatosh, Nukus tumanlari hamda Nukus shahar xalq taʼlimi boʻlimlarining taʼlim sifatini monitoring qilish boʻlimi xodimlari, Xalqaro baholash dasturlari boʻyicha tanyanch maktablarining oʻquv ishlari boʻyicha direktor oʻrinbosarlari hamda umumtaʼlim maktablarining direktor oʻrinbosarlari ishtirok etdilar.
Zamonaviy innovatsion pedtexnologiyalarni ommalashtirish tajribasi va oʻqituvchilar bilan ishlashishda ular tomonidan tavsiya etilayotgan yangicha uslub va tajribalarni amaliyotga keng joriy etish maqsadida tashkil etilgan amaliy-oʻquv seminarini tuman Xalq taʼlimi boʻlimi mudiri Akmal Ismoilov ochdi va pandemiya sharoitida oʻtgan 2020-2021 oʻquv yili yakunlari hamda boshlanayotgan 2021-2022 yangi oʻquv yilida sohada kutilayotgan yangiliklar, tuman XTB tomonidan rejalashtirilayotgan amaliy tadbirlar xususida batafsil toʻxtalib oʻtdi. Shundan soʻng, kun tartibidagi “Pedagog kadrlarning salohiyatini oshirishga qaratilgan tadbirlar” va “Umumtaʼlim maktablarining maktab reyting jarayoniga qatnashishning ahamiyati va undagi vazifalar” xususida Qoraqalpogʻiston Respublikasi Xalq taʼlimi Vazirligining taʼlim sifatini monitoring qilish boʻlimi boshligʻi Hamidulla Begdullayev, “Xalqaro baholash dasturlari doirasida amalga oshirilgan ishlar va tayanch maktablar oldida turgan vazifalar” toʻgʻrisida Qoraqalpogʻiston Respublikasi Xalq taʼlimi Vazirligining taʼlim sifatini monitoring qilish boʻlimi bosh mutaxassisi Raxat Yerjanov, umumtaʼlim maktablarini attestatsiya va davlat akkreditatsiyasidan oʻtkazish tartibi va “Xalq taʼlimi xodimlariga ustama haq belgilashda tegishli normativ-huquqiy hujjatlar yuritish toʻgʻrisida”gi masala yuzasidan Qoraqalpogʻiston Respublikasi Xalq taʼlimi Vazirligining taʼlim sifatini monitoring qilish boʻlimi bosh mutaxassisi Rustam Uzaqbergenovlar qiziqarli maʼruzalar qildilar.
Amaliy-oʻquv seminari jarayonida malakali mutaxassislar tomonidan oʻqilgan maʼruzalar, berilgan taklif va tavsiyalar ishtirokchilarda taassurot va qiziqish uygʻotdi va maʼruzalar yuzasidan muzokaralarda faol ishtirok etishib, oʻzlarini qiziqtirgan mavzular boʻyicha savollar bilan murojaat qildilar.
Seminar ishtiroklari tomonidan tushgan savollarga masʼul mutaxassislar batafsil javoblar berdilar.
Boʻlib oʻtgan amaliy-oʻquv seminari 2021-2022 yangi oʻquv yilini boshlash arafasida turgan umumtaʼlim maktablarining mutasaddilari va soha mutaxassislari uchun tajriba almashuv muhitini yaratgani bilan muhim ahamiyat kasb etdi.
Robiya Yoʻldosheva.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
