Vaktsinatsiya hamda emlanishning afzalliklari haqida matbuot anjumani oʻtkazildi

Butun dunyo aholisini sarosimaga solishda davom etayotgan koronavirus pandemiyasi xavfini kamaytirish, COVID-19 tarqalishiga qarshi kurashish, uning oldini olish borasidagi chora-tadbirlar yanada kuchaytirilmoqda. Mamlakatlar taraqqiyotiga asosiy toʻsiq boʻlayotgan pandemiyani yengishda eng asosiy omil bu - aholini koranavirusga qarshi emlash, yaʼni vaktsinatsiyani ommalashtirishga katta eʼtibor qaratilmoqda.

Bugunning eng dolzarb masalasi - aholini koronavirusga qarshi ommaviy emlashning ahamiyati va vaktsinatsiyaning afzalliklarini tushuntirish-targʻibot ishlarini yanada jadallashtirish maqsadida joriy yilning 30-iyul sanasida Amudaryo tuman hokimligining Axborot xizmati tomonidan matbuot anjumani tashkil etildi.

Tuman tibbiyot birlashmasi faollar zalida tashkil etilgan matbuot anjumani “Amudaryo tumanida koronavirusga qarshi vaktsina bilan emlash borasida amalga oshirilayotgan ishlar hamda emlanishning afzalliklari” mavzusida oʻtkazildi.

Matbuot anjumanida tuman Sanitariya-epidemiologik osoyishtalik markazi epidemiolog shifokori Gulshod Tojiboyeva, Onalik va bolalik boʻyicha tuman Tibbiyot birlashmasi bosh shifokori oʻrinbosari Gulshod Yusupova, tibbiyot birlashmasi immunologi shifokori Dilbar Olloberganova, mahalliy ommaviy axborot vositalari vakillari vakillari, jurnalistlar hamda qiziquvchilar ishtirok etdilar.

Matbuot anjumanini tuman hokimligining Axborot xizmati rahbari Charos Arslonova ochdi hamda olib bordi. Anumanda tuman Sanitariya-epidemiologik osoyishtalik markazi epidemiologi Gulshod Tojiboyeva tumanda aholini vaktsina bilan emlash borasida amalga oshirilayotgan ishlar xususida maʼlumot berdi.

Epidemiolog Gulshod Tojiboyevaning emlash borasida olib borilayotgan ishlar xususidagi maʼlumotlarini yigʻilganlar katta qiziqish bilan tingladilar. Shundan soʻng anjuman ishtirokchilari mahalliy OAV vakillari, jurnalistlar masʼullarga vaktsinatsiya borasida oʻzlarini qiziqtirgan savollar bilan murojaat qildilar. Shifokorlar berilgan savollarga toʻliq, misollar bilan javob berdilar.

Matbuot anjumanida “Amudaryo telekanali” xodimi Xosiyat Aytboyeva vaktsinaning inson organizmiga taʼsiri, emlanish orqali virusga qarshi immunitet qancha vaqtgacha organizmda saqlanishi xususida, yosh jurnalist Laylo Alimova vaktsina aynan 18 yoshdan yuqori boʻlgan insonlarga qilinishining sababi hamda aholi emlanayotgan 3 xil vaktsinaning bir-biridan qanday farq qilishi xususida savollar berdilar. Shifokorlar savollar yuzasidan kerakli tushunchalar berdilar.

Shifokorlarning qayd etishicha, shu kunga qadar aholi orasida emlash amalga oshirilgandan soʻng organizmga salbiy taʼsir qilishi holatlari uchramagan.

Yurtdoshlarimizni vaktsinatsiyaning nafaqat oʻzi, balki yaqinlarini koronavirusdan himoya qilishda eng asosiy omil ekanligini toʻgʻri anglab yetgan holda, emlash jarayonida ishtirok etishga chaqiramiz. Zero, har bir kishi oʻz salomatligi uchun eng birinchi navbatda oʻzi masʼul. Oʻzingiz va yaqinlaringiz salomatligi uchun koronavirusga qarshi vaktsina bilan emlaning!

Tuman hokimligining axborot xizmati.