YoNGʻIN XAVFINING OLDINI OLISh BOʻYIChA PROFILAKTIK TADBIRLAR OʻTKAZILDI

Hozirda respublika hududida havo haroratining keskin koʻtarilishi natijasida joylarda turli koʻrinishdagi yongʻin holatlari kelib chiqishi kuzatilmoqda. Aholi oʻrtasida yongʻin xavfsizligi qoidalariga amal qilinishi yuzasidan tushuntirish-targʻibot ishlari kuchaytirilmoqda.

Oʻzbekiston Respublikasining “Yongʻin xavfsizligi toʻgʻrisida”gi qonunida insonlarning hayoti va sogʻligini, yuridik va jismoniy shaxslarning mol-mulkini, atrof tabiiy muhitni yongʻinlardan himoya qilish maqsadida umumiy yongʻin xavfsizligi talablari belgilangan boʻlib, aholi vakillariga ushbu qoidalar keng turda tushuntirilmoqda.

Amudaryo tumanida ham Favqulodda vaziyatlar boʻlimi tomonidan bu borada samarali ishlar yoʻlga qoʻyildi.

24-iyul kuni aholi oʻrtasida yongʻin bilan bogʻliq koʻngilsiz hodisalarning oldini olish maqsadida tuman Favqulodda vaziyatlar boʻlimi xodimlari tomonidan profilaktik tadbirlar tashkil qilindi.

Aytish kerakki, yongʻin kelib chiqish holatlari, ayniqsa, avtomobillarga yoqilgʻi quyish shoxobchalarida koʻp kuzatilmoqda. Boʻlim xodimlari tuman hududidagi masʼuliyati cheklangan jamiyat shaklidagi “Mangʻit savdo” hamda “Mangʻit metan” avtomobillarga siqilgan gaz quyish shoxobchalarida yongʻinlarning oldini olish boʻyicha tushuntirish ishlari olib borildi. Profilaktik ishlar davomida shoxobchadagi ishchi-xodimlarga yongʻin xavfsizligi qoidalariga rioya qilishlari lozimligi, mijozlarga ham doimiy ravishda shoxobcha hududida olov chiqaruvchi uskunalardan, vositalardan foydalanmasliklari zarurligi va chekish mumkin emasligini tushuntirishlari kerakligi taʼkidlandi.
Maʼlumot tariqasida aytish kerakki, oʻtkazilgan profilaktik tadbirlarga qaramasdan joriy yining shu davriga qadar tuman hududida ehtiyotsizlik, eʼtiborsizlik natijasida 33 ta yongʻin kelib chiqish holatlari kuzatilgan. Shundan 5 tasi avtotransport vositalarida, 8 tasi aholi xonadonlarida, 20 ta yongʻin holati esa molxonalarda kelib chiqqan.
Yongʻin sodir boʻlish holati koʻrsatkichlarini kamaytirish maqsadida tuman Favqulodda vaziyatlar boʻlimi tizimli ishlarni yoʻlga qoʻydi. Tumandagi ovul va mahallalarda ham yongʻin xavfsizligi qoidalariga amal qilinishi, yongʻin kelib chiqishining asosiy omillari, ularning ayanchli oqibatlari haqida aholiga keng tarzda tushuntirish-targʻibot ishlari ham oʻtkazib kelinmoqda. Xususan, tumandagi Choykoʻl ovulida aholi vakillari bilan oʻtkazilgan uchrashuv ham shu maqsadda tashkil qilindi.

Uchrashuvda masʼullar aholiga yonuvchi narsa va suyuqliklar olovdan va isitish asboblaridan uzoqda saqlanishi kerakligi, nosoz elektr asboblaridan foydalanishda ehtiyotkor boʻlish lozimligi, bir nechta elektr asboblari vilkalarini bir rozetkaga birdaniga ulash mumkin emasligi, gugurt kabi olov hosil qiluvchi moddalarni bolalar qoʻli yetmaydigan joylarda saqlash kerakligi taʼkidlandi.
Shuningdek, yongʻin sodir boʻlib qolsa, uydan tez chiqishga halaqit bermasligi uchun zina maydonchalari, balkon ortiqcha buyumlardan holi boʻlishi kerakligi, transport vositalarida harakatlanganda yongʻin xavfsizligi qoidalariga amal qilish zarurligi, yonuvchan moddalarni olib yurish taʼqiqlanishi, yengil alangalanuvchan suyuqliklarni yoʻlovchilar koʻp vagonda tashish juda xavfli ekanligi, uyda iloji boʻlsa ixcham oʻt oʻchirgich hamda uy telefoni oldida avariya xizmatlari telefon raqamlari koʻrsatilgan qoʻllanma osigʻliq turishi lozimligi ham tushuntirildi.

Ovul aholisi bu borada oʻzlarini qiziqtirgan savollar bilan murojaat qilib, toʻliq javoblar oldilar. Ayni kunlarda ovul va mahallalarda bu kabi profilaktik tadbirlar muntazam ravishda oʻtkazib borilmoqda.

Charos Arslonova.