QURBON HAYITINGIZ MUBORAK BOʻLSIN!

Qurbon hayiti – xayr-saxovat, mehr-muruvvat ayyomi, diniy va milliy, musulmon olamining ulugʻ bayramidir. Qurbon hayiti hijriy-qamariy taqvimga koʻra zulhijja oyining oʻninchi kunida nishonlanadi. Bu oyning dastlabki toʻqqiz kunidagi ezgu amallar bilan oʻninchi kuni nishonlanadigan hayitga alohida tayyorgarlik koʻriladi. Muqaddas dinimiz taʼlimotiga koʻra, zulhijja kirgandan soʻng inson savobli va ezgu ishlarga koʻproq ahamiyat berishi lozim. Bu kunlarda ulugʻ haj ibodati amalga oshiriladi. Yurtimiz tinchligi, xalqimiz farovonligi va yosh avlod kamoli uchun duolar qilinadi.

Bayram arafasida Oʻzbekiston musulmonlari idorasi Ulamolar kengashining 2021-yilda Oʻzbekistonda Qurbon hayiti namozi oʻqilishi boʻyicha fatvosi eʼlon qilindi. Unga koʻra butun dunyoda hukm surayotgan koronavirus infektsiyasi yana avj olayotganligi sababli kasallik tarqalishining oldini olish, epidemiologik vaziyatni yumshatish maqsadida Qurbon hayiti namozi oʻrniga uyda Zuho namozini oʻqish tavsiya etildi.

Tumanimiz aholisi ham ushbu muqaddas bayramni koʻtarinki ruh, oʻzgacha shukuh bilan kutib olmoqda. Qurbon hayiti arafasida imom-xatiblar tomonidan aholiga imkon qadar kasallikning tarqalishini oldini olish maqsadida qurbonlik goʻshti ehsonlarini tarqatishda karantin talablariga qatʼiy rioya etishi, xayriya va ehson tadbirlarini vaqtincha cheklash kerakligi tavsiya etilmoqda. Shuningdek, yurtdoshlarimizga marhumlarning haqlariga qilinadigan duoi fotihalarni qatʼiy ravishda oʻz xonadonlarida, oila davrasida bajarishi, fotihalarga borishdan hamda oʻtganlarning qabrlarini ziyorat qilishdan kasallikning tarqalish xavfi oʻtgunicha saqlanib turishlari kerakligi tushuntirilmoqda.

Bunday vaziyatda oyat, hadis va sharʼiy qoidalarda koʻrsatilgan tavsiyalarga amal qilishga buyuriladi. Shariat insonga zarar yetish ehtimoli kuchaygan paytda ibodatlarni yengil tarzda bajarishga ruxsat beradi yoki butunlay zimmadan soqit qiladi. Iyd namozi vojib amal boʻlgani bois bugungiday uzrli holatlarda hayit namozini ado etish soqit boʻladi.

Koronavirus pandemiyasi sabab karantin holatida hayit namozi oʻqilmayotgani uchun qurbonlikni tong otgandan boshlab qilish joiz boʻladi. Yurtdoshlarimiz hayit kuni bomdod namozini oʻqiganlaridan soʻng, quyosh chiqqandan keyin 4 rakat Zuho namozini oʻqib, keyin qurbonlik qilsalar, yanayam savobli boʻladi. Qurbonlik qilish hayitning 3-kuniga qadar davom etadi.

Qurbonlikni uchdan birini tarqatish — bu moddiy jihatdan juda toʻq, badavlat kimsalarga xosdir. Agar oʻrtahol, koʻpchilik bilan istiqomat qilinadigan oila egasi qurbonlik qilsa, u oila aʼzolari bilan qurbonlikni isteʼmol qilishi savobdir. Yaʼni, qurbonlik mohiyatida, avvalo, oilaviy bayram yotadi. Ayrimlar qoʻy soʻyish deganda birga qoʻshib, xudoyi qilishni ham nazarda tutishadi. Bu doim ham toʻgʻri emas. Qurbonlikni soʻyib, avvalo, oilasini, farzandlarini, keksa ota-onasini xursand qilish toʻgʻri amaldir. Uning bir qismini tarqatishga kelsak, bu amal zakot berish imkoniyatiga ega boʻlgan insonlar uchun mustahab, savoblidir.

Yurtimiz boʻylab, ulugʻ bayram – Qurbon hayiti shukuhi kezmoqda. Ushbu kunlar ezgu amallar va insoniy fazilatlarning yanada ziyoda boʻlishiga, oilalarimiz totuvligi, dasturxonlarimiz toʻkinligini koʻproq his qilishga, shukrona aytishga undaydigan savobli, fayz-barakotli ayyomdir. Bugungi pandemiya sharoitidan kelib chiqib, hayitni imkon qadar xonadonda, oila-aʼzolari bilan birga Qurʼoni Karim oyatlaridan tilovat qilib, oʻtganlarimiz ruhi poklariga baxshida etgan holda oʻtkazish tavsiya etiladi.

Aziz yurtdoshlar! Ulugʻdan ulugʻ boʻlgan shu muqaddas kunlarda Allohdan yurtimizga tinchlik, xalqimizga salomatlik, tumushimizga farovonlik, fayz-u baraka tilaylik. Qurbon hayiti barchangizga qutlugʻ boʻlsin.

Abdurahmon Matsapoyev, “Yusuf Eshon bobo” jomʼe masjidi imom-xatibi.