Respublika “Maʼnaviyat festivali” doirasida tumanimizda “Maqom kechasi” oʻtkazildi

Oʻzbekiston Respublikasi Davlat Mustaqilligining 30 yilligi munosabati bilan “Yangi Oʻzbekistonda erkin va farovon yashaylik!” shiori ostida Qoraqalpogʻistonda oʻtkazilayotgan “Maʼnaviyat festivali” doirasida Amudaryo tumanida katta kontsert dasturi tashkil qilindi.

Maqom sanʼatini keng targʻib etish maqsadida tashkil etilgan kontsert dasturi «Yangi Oʻzbekiston» videoroligi namoyishi bilan boshlandi. Videorolikda Vatanimizning yangi qiyofasi, yurtimizdagi bugungi kundagi oʻzgarishlar aks ettirilgan boʻlib, yigʻilganlarga koʻtarinki kayfiyat ulashdi.

Kontsert dasturini Prezident Administratsiyasi masʼul xodimi Abduhalil Mavrulov ochib berdi va festivalning ahamiyati, mazmun-mohiyatiga toʻxtalib oʻtdi. Shuningdek, soʻnggi yillarda butun mamlakatimizni, xususan, Qoraqalpogʻiston Respublikasini har tomonlama ijtimoiy-iqtisodiy rivojlantirish maqsadida olib borilgan keng qamrovli ishlar xususida toʻxtaldi. Ayniqsa, bugun Qoraqalpogʻistonda amalga oshirilayotgan bunyodkorlik ishlari kishi koʻzini quvontirishi, bu oʻzgarishlar bardavom boʻlishini qayd etib oʻtdi.

Festivalning asosiy maqsad va vazifalaridan biri aholi, ayniqsa, yosh avlod qalbida Vatanimiz taqdiri va kelajagi uchun daxldorlik va masʼuliyat hissini yanada kuchaytirish, ularni kelajagimizning munosib vorislari etib tarbiyalashda hissa qoʻshish ekanligini taʼkidladi. Shundan soʻng tuman hokimi Sultonboy Yoʻldashev hamda falsafa fanlari doktori, professor Jamila Shermuhammedovalar taklif qilindi hamda tumanimizda ilm-fan va sport sohalarida muvaffaqiyatlarga erishayotgan yoshlarni taqdirlash marosimi boʻlib oʻtdi.

Sahnaga birin-ketin amudaryolik iqtidorli yoshlar chiqib keldi. Yoshlarga hamda ularning ota-onalariga tashkilotchilar tomonidan tashakkurnoma hamda esdalik sovgʻalari topshirildi. Qoraqalpogʻiston Respublikasi Amudaryo tumani hokimi Sultonboy Yoʻldashev soʻzga chiqib, butun mamlakatimiz boʻylab “Maʼnaviyat festivali” oʻzgacha ruh va kayfiyatda, ezgu maqsadlarni koʻzlangan, yangi gʻoyalarga va tashabbuslarga asoslangan holda oʻtayotganini, uning doirasida amalga oshirilayotgan har bir loyihani oʻziga xos ekanligini taʼkidladi hamda festival ishiga omad tiladi. Shuningdek, mustaqilligimizning 30 yilligi bilan barcha yurtdoshlarimizni samimiy tabrikladi.

“Maʼnaviyat festivali” doirasida tumanimizda oʻtkazilgan kontsert dasturining badiiy qismi Qoraqalpogʻiston Respublikasi namunali maqom ansambli chiqishi bilan boshlandi. Kontsert dasturida Oʻzbekistonda xizmat koʻrsatgan artist Asatulla Xoliqov ijrosidagi “Oʻxshaydiku” va “Ajab sirlar” qoʻshiqlari tomoshabinlarga koʻtarinki kayfiyat baxsh etdi. Ayol-qizlar quy-qoʻshiqlarga raqsga tushdilar.

Shuningdek, Oʻzbekiston va Qoraqalpogʻiston xalq artisti Zamira Suyunovaning “Salamno”, “Bogʻi shamol” qoʻshiqlari hamda Oʻzbekistonda xizmat koʻrsatgan artist Mehmonali Salimov ijrosidagi “Raʼno ariyasi”ham barchaga manzur boʻldi. Estrada xonandalari Darhon Komilovning “Umid”, “Maftun boʻldim” qoʻshiqlari va “Nihol” mukofoti sovrindori Sherbek Shodiyev kuylagan oʻz ijodidan namunalariga yoshlarimiz joʻr boʻlishdi. Qolaversa, Oʻzbekistonda xizmat koʻrsatgan madaniyat xodimi, shoir Bobur Bobomurodning Vatan haqidagi sheʼrlari kechaga oʻzgacha shukuh bagʻishladi. Kontsert dasturida Oʻzbekiston Respublikasi Davlat filarmoniyasi Qoraqalpogʻiston Respublikasi boʻlimining isteʼdodli xonandalari oʻz ijod namunalaridan ajoyib kuy qoʻshiqlar ijro etdilar. Kontsert dasturi filarmoniya xonandalarining “Goʻzal Oʻzbekistonim”, “Xalqim aziz” qoʻshiqlari bilan koʻtarinki kayfiyatda yakunlandi. 

Tuman hokimligining Axborot xizmati.