Giyohvandlik - zulmat sari yoʻl.

Bu dunyo goʻzalliklaridan bahra olish uchun hayot bir marta beriladi. Kimdir mana shu koʻz ochib yumguncha oʻtadigan umrini insonlarning ogʻirini yengil qilishga, turli ixtirolar qilib, insoniyatga koʻmak berishga harakat qiladi. Yana kimlardir orqaga qaytmaydigan vaqtini behudaga sarflaydi, Allohning bergan neʼmatlariga shukr qilmaydi...

Afsuski, oʻz hayotiga oʻzi nuqta qoʻyib, oʻzining qotiliga aylanayotganlar ham uchrab turibdi. Ayniqsa, giyohvandlik haqida soʻz aytmasdan ilojimiz yoʻq. Asosan yoshlar orasida "ommaviy madaniyat" tarzida avj olmoqda.

Baʼzida oʻylab qolaman: "Nahotki, ne-ne ixtirolar yaratgan ongli insonlar bir qancha giyohning quliga aylansa... Insonligi qayda? Ong-u tafakkuri-chi?... Nahot yertangi taqdiri, hayoti uni qiziqtirmasa..."

Yorugʻ va yezguliklarga, goʻzalliklarga toʻla hayotni zulmat, qabohatga alishishdan ne naf? Titrab-qaqshab yiqqanini bir lahzalik orom-u halovat uchun sarflab, insonligidan ayrilib, xuddiki kasalga chalingan hayvondek yashamoqdan ne maʼni?...

Keling, biroz tahlil va tanqid qilib koʻramiz.

Atrofga qarang. Yam-yashil tabiat yoinki oppoq qor naqadar goʻzal... Musaffo osmon, tip-tiniq obi hayot... Qushlar chugʻur-chugʻuri...
Sizning qalbingiz shu darajada goʻzalki, oddiy narsalardan ham beqiyos timsollar yarata bilasiz... Muhimi, erkinsiz...
Ammo qandaydir giyohga ruju qoʻyib, uning quliga aylanib, dunyo koʻzingizga qorongʻu, zulmatdan iborat boʻlib koʻrinsa... Borligʻingiz yoʻqlikka, oppoq tongingiz qabohat kechasiga aylansa... Bir necha soatlik "orom"dan keyingi azoblar... Naqadar ogʻir.

Yor-birodarlarning boshini egib, bor-budini koʻkka sovurib, ichi-yu tashini zaharlab nimaga yerishib boʻladi?... Koʻzining oq-u qorasi boʻlgan farzandlari bilan oila davrasida tinch-totuv, ahil, inoq, baxtli yashash taʼmini giyohxoʻr qaydan bilsin...

Buvim giyohvand, narkomanlarni "bangi" derdi. Bizga koʻp narsalarni aytib berib, qulogʻimizga nasihatlar quyardi...

Bir kuni buvimdan "Giyohvadlar qanday boʻladi?" deya qiziqsinib soʻradik. Buvim "Sen hozir oʻzingnikisan. Giyohvand esa na tanasiga, na ruhiga hokim boʻloladi" deb javob berganlar...

Hayotimizning qiymati beqiyos, bir marta tugʻilib, bir marta oʻlamiz. Ammo mana shu ikki yenlik hayotimizda nimagaki erishsak, nimaiki qilsak, hammasiga oʻzimiz sababchi boʻlamiz. Zero, hayotimiz oʻz qoʻlimizda, tanlash imkoni ham... yo nur, yoki zulmat...

Laylo Olimova, OʻzJOKU, Xalqaro jurnalistika fakulteti talabasi