Uyshun ovulida chegara hudud aholisi bilan uchrashuv oʻtkazildi

Joriy yilning 22-iyun sanasida Amudaryo tumani Uyshin madaniyat markazi binosida chegara hudud aholisi bilan uchrashuv tashkil etildi. Uchrashuvda tuman xokimining chegara masalalari buyicha yordamchisi Oybek Shomuratov, Davlat xavfsizlik xizmati tuman boʻlimi  xodimi Kuvonch Nuraboyev, Davlat xavfsizlik xizmati chegara qoʻshinlariga qarashli xarbiy kism komandiri Elyor Juraboyev hamda ovuldagi mahallalar raislari, mahalla faollari, koʻchaboshilari, ovul aholi vakillari ishtirok etdilar.

Yigʻilishda aholiga chegara hududda yashash qoidalari hamda “Oʻzbekiston Respublikasi davlat chegarasi toʻgʻrisida”gi Oʻzbekiston Respubliklasi qonuni hamda “Oʻzbekiston Respublikasi hududida chegara rejimi toʻgʻrisidagi nizomni tasdiqlash haqida” Oʻzbekiston Respublikasi Vazirlar Mahkamasining qarori kabi hujjatlarning mazmun-mohiyati tushuntirildi.

Masʼullar yigʻilganlarga Oʻzbekiston Respublikasining “Oʻzbekiston Respublikasi davlat chegarasi toʻgʻrisida”gi qonunida belgilangan chegara hududda yashash tartib-qoidalariga rioya qilish, diniy ekstrimizm va terrorizmga qarshi kurashishda xushyorlik davr talaba ekanligi, davlat chegarasida oʻrnatilgan muhandislik toʻsiqlari va inshoatlariga yetkazilgan zarar boʻyicha fuqarolarning javobgarligi, chegara hududda chorva mollarini boqmaslik, shuningdek, chegara hududdagi ruhiy kasal va spirtli ichimlikka berilgan fuqarolarni nazoratga olish zarurligi toʻgʻrisida maʼlumotlar berdilar.

Taʼkidlash kerakki, mazkur qonun bilan chegara oldi rejimi, chegara oldi zonasiga kirish, undan oʻtish, bu yerda boʻlish, harakatlanish hamda ishlar bajarish tartibini belgilovchi qoidalar, chegara mintaqasiga kirish, chiqish, harakatlanish, faoliyat olib borish va yashash tartiblari belgilab qoʻyilgan. Aholi vakillaridan shu kabi qoidalarga qatʼiy amal qilish lozimligi talab qilinadi.

Maʼlumot tariqasida keltirilishicha, chegara oldi zonasi – davlat chegarasiga tutash tuman, shahar, shaharcha, qishloq, ovul hududi doirasida belgilanadi. Chegara oldi zonasi tarkibiga bunday mintaqa belgilangan joydagi Oʻzbekiston Respublikasining ichki suvlari, chegara boʻyi daryolari, koʻllari va boshqa suv havzalari suv qismi hamda shu suvlarda joylashgan Oʻzbekiston Respublikasi orollari ham kiritiladi. Chegara oldi mintaqasida chegara qoʻshinlari tomonidan kirish va chiqish, bu yerda boʻlish, yashash, shaxslar va transport vositalari harakatlanishiga oid qoʻshimcha rejim qoidalari belgilanadi.

Shuningdek, uchrashuvda chegara hududda diniy ekstremizm va terrorizmga qarshi kurash va uning oldini olish, insonlarni turli yot gʻoyalar taʼsiriga tushib qolishlariga yoʻl qoʻymaslik, shu kabi holatlar uchraganda tezkor choralar qoʻllash, profilaktika tadbirlarini yanada kuchaytirish lozimligi taʼkidlandi.

Qolaversa, yoshlarimizni nosogʻlom gʻoyalar taʼsiriga tushib qolishlaridan asrash, ularning hayotda oʻz oʻrinlarini topishlari uchun mahalla, jamoatchilik tashkilotlari bilan hamkorlikda ishlar olib borish zarurligi, yoshlarimizni Vatanga muhabbat, uning himoyasiga doimo shay turadigan avlod qilib tarbiyalash lozimligi qayd etildi.

Yigʻilishda masʼullar tomonidan “Oʻzbekiston Respublikasi davlat chegarasi toʻgʻrisida”gi qonunda koʻrsatilganidek, chegara oldi hududida chorva mollarini boqish, yoki ularni qarovsiz qoldirish, chegara hududini kesib oʻtishga urunish, hududda joylashgan har qanday muhandislik ishootlari va toʻsiqlarga zarar yetkazish kabilar huquqbuzarlik hisoblanishi tushuntirilib, bu kabi holatlar sodir etilsa, qonun bilan tegishlicha jazo choralari belgilab qoʻyilganligi qayd etildi.

Yigʻilishda ishtirok etgan fuqarolar masʼullarga oʻzlarini qiziqtirgan savollar bilan murojaat qildilar, chegara hududi aholisi tomonidan berilgan savollarga masʼullar javob qaytardilar. Shuningdek, aholi vakillarining chegara hudud dahlsizligi borasidagi fikr-mulohazalari, takliflari ham tinglandi.

Charos Arslonova, tuman hokimligining Axborot xizmati rahbari.