Vazir va yoshlar uchrashuvi boʻlib oʻtdi

Joriy yilning 9-iyun sanasida tuman hokimligining majlislar zalida vazir va yoshlar uchrashuvi boʻlib oʻtdi. Mazkur uchrashuvga tuman hokimi Sultonboy Yoʻldashev raislik qildi. Uchrashuvda Oʻzbekiston Respublikasi Qishloq xoʻjaligi vazirining maslahatchisi Alisher Shukurov, Toshkent davlat Agrar universiteti Nukus filiali direktori Elmurad Toʻraniyozov, tuman hokimi oʻrinbosari Fayzulla Saʼdullayev, Oʻzbekiston Respublikasi Prezidentining Amudaryo tumanidagi Xalq qabulxonasi mudiri Erkin Rajabov, shuningdek, tumandagi korxona tashkilotlar rahbarlari, faol yoshlar, uyushmagan yoshlar ishtirok etdilar.

Uchrashuv Prezidentimiz rahbarligida 2020-yilning 25-dekabr kuni mamlakatimiz yoshlari bilan boʻlib oʻtgan uchrashuvda, shuningdek, joriy yilning 27-yanvar kuni yoshlar bandligini taʼminlash va ularning boʻsh vaqtlarini mazmunli tashkil etishga oid  chora-tadbirlarga bagʻishlangan yigʻilishlarida berilgan topshiriqlar ijrosini taʼminlash maqsadida tashkil etildi. Qolaversa, yigʻilishda “Yoshlarni qoʻllab-quvvatlash va aholi salomatligini mustahkamlash” yili davlat dasturida belgilangan vazifalar yuzasidan tumanda amalga oshirilayotgan ishlar xususida soʻz yuritildi.

Tadbirda soʻzga chiqqanlar mamlakatimizda yoshlarning yuksak marralarni egallashlari uchun yaratilayotgan shart-sharoitlar haqida toʻxtalib, yoshlarni oʻqib bilim olishga, shijoat bilan olgʻa intilishga hamda Vatan xizmatiga yaraydigan munosib farzand boʻlishga daʼvat qildilar. Masʼullar davlatimiz rahbarining “Erishgan yutuqlarimiz oʻzimizniki, biz xato va kamchiliklarni oʻrganib, ularni bartaraf qilishga harakat qilmogʻimiz kerak!” - degan fikrni barcha hayotiy shior qilib olishi kerakligini taʼkidladilar.

Mutasaddilar qayd etganlaridek, bugun ertamiz egalari uchun barcha imkoniyatlar eshiklari ochiq. Jumladan, taʼlimning barcha bosqichlarida yoshlarning sifatli taʼlim olishini taʼminlanmoqda, yoshlar uchun malakali tibbiy xizmatdan foydalanish shart-sharoitlarini yaxshilanmoqda, ular oʻrtasida tibbiy savodxonlikni oshirish va sogʻlom turmush tarzini mustahkamlashga alohida eʼtibor qaratilmoqda. Shuningdek, yoshlarga munosib mehnat sharoitlari yaratilib, ularning mehnatga oid qonuniy huquqlarini himoya qilish orqali iqtisodiy huquq va imkoniyatlari kengaytirilmoqda. Shu bilan birga ijtimoiy himoyaga muhtoj, nogironligi bor yoshlar, mehribonlik uylarida tarbiyalangan, yetim bolalar, boquvchini yoʻqotgan va ota-ona qaramogʻidan mahrum boʻlgan bolalarni qoʻllab-quvvatlanmoqda.

Uchrashuvda tumanimiz yoshlari bugungi kunda koʻplab sohalarda erishayotgan yutuqlari xususida soʻz yuritib, masʼullarga oʻzlarini qiynayotgan muammolarni amaliy jihatdan hal qilishga yordam soʻrab murojaat qildilar hamda oʻzlarining yangi takliflarini bildirdilar. Xususan, agrar sohaga qiziqishi yuqori boʻlgan yoshlarimizdan Bobur ovulida yashovchi Dilshodbek Oʻrazimbetov bogʻdorchilik  qilish uchun qishloq xoʻjaligi yer maydonlaridan yer ajratilishida, Shaxnoza Kenjaboyeva, Gulnoza Tursunboyeva, Bekzod Nurillayev, Jaxongir Masharipov, Dilnura Jumamuratova, Safura Allayarova, Maloxat Axmadovalar gʻalladan boʻshagan yer maydonidan qishloq xoʻjaligi maxsulotlarini ekib parvarish qilishlari  uchun yer maydoni ajratilishida amaliy yordam berishni soʻrab murojaat qildilar. Qolaversa, Qoramon mahallasida yashovchi yosh fermer Umidjon Allamberganov qishloq xoʻjaligi yer maydonlaridan samarali foydalanish uchun oʻzining yangidan ochilgan yer maydoniga agrotexnik tadbirlar oʻtkazish uchun subsidiya joriy etish taklifini bildirdi.

Yoshlar tomonidan yoʻllangan murojaatlar tegishlicha ijobiy hal qilinadigan boʻldi hamda ularning bildirgan fikr-mulohazalari va takliflari inobatga olinib, barcha sohalarda olib borilayotgan ishlar yuzasidan bergan savollarga hayotiy misollar bilan javoblar keltirildi.

Charos Arslonova, tuman hokimligining Axborot xizmati rahbari.