19-sonli maktab oʻquvchisi mental arifmetika boʻyicha Xalqaro olimpiadada sovrindor boʻldi

Bugungi kunda har tomonlama yetuk maʼnan va jismonan rivojlangan shaxs tarbiyalash, ayniqsa, yoshlarning oʻz oʻrnini topishlari, egallagan bilimlarini kelgusi hayotga tadbiq eta olishi uchun ularni toʻgʻri yoʻnaltirish har bir oʻqituvchining asosiy vazifalaridan biridir. Bu boradagi ishlarni zamon talablari darajasiga yetkazish maqsadida tumanimizdagi 19-sonli maktabda turli xil toʻgaraklar tashkil etilgan. Xususan, sportning taekvando yoʻnalishi, voleybol, basketbol hamda mental arifmetika toʻgaraklari faoliyat yuritmoqda, toʻgaraklarga tajribali ustozlar rahbarlik qilishadi.

Bugungi kunda odamlar orasida mental arifmetika iborasi tez-tez takrorlanadi. Chunki mental arifmetika – miya ikkala yarim sharining faol ishlashini taʼminlaydi, emotsional stressni yengillashtiradi, ishchanlik faoliyatini yaxshilaydi.

Bolalar mental arifmetika bilan shugʻullansa, qanday tafakkur qilishni oʻrganadilar, tafakkur qilishni bilgan bola esa yangilik yaratishni sevuvchi novator boʻlib yetishadi. Mental arifmetikani oʻrgangan oʻquvchi aniq fanlarni oʻzlashtirishga qiynalmaydi, diqqatini jamlashni oʻrganadi xotirasi kuchayadi.

Maktabning mental arifmetika toʻgaragi rahbari, matematika fani oʻqituvchisi Zulfiya Matkarimovaning bu toʻgarakni tashkil qilganiga unchalik koʻp vaqt boʻlgani yoʻq. Toʻgarakka asosan 6 yoshdan 13 yoshgacha boʻlgan oʻquvchilar qatnashadi. Toʻgarak aʼzolari shu qisqa vaqt ichida abakusda sonlarni qoʻshish, ayirish, koʻpaytirishni oʻrgandilar. Quvonarlisi shundaki, yaqinda mental arifmetika boʻyicha 8-Xalqaro olimpiada oʻtkazildi.

Olimpiadaga Qozogʻiston Respublikasining Olmaota, Chimkent, Qaragʻanda, Petropavlovsk shaharlaridan, Rossiyaning Krasnodor, Sankt-Peterburg, Moskva, Kozon, Sochi shaharlaridan, Ukraina, Shveytsariya, Qirgʻiziston davlatlaridan hamda Oʻzbekistonning Toshkent, Samarqand, Andijon, Fargʻona hamda Nukus shaharlaridan ham yoshlar qatnashdilar. Bu olimpiadada 19-maktabning 2-a sinf oʻquvchisi Dinora Jabborberganova va 4-a sinf oʻquvchisi Mirsaid Jumaboyevlar ham muvaffaqiyatli ishtirok etishdi.

Olimpiada onlayn boʻlganligi sababli natijalarni biroz kutishga toʻgʻri keldi. Chunki har bir oʻquvchining misol yechishi videoga olinib, hakamlarga yuborildi. Olimpiada talablariga koʻra, har bir ishtirokchining misol ishlash texnikasi tezligi hisobga olindi. 2 kundan soʻng natijalar eʼlon qilindi.

Gʻoliblar orasida oʻquvchisining ismini koʻrgan ustozning boshi osmonga yetdi. Chunki Dinora Jabborberganova 3-oʻrinni egallagan, Mirsaid Jumaboyev faol ishtiroki uchun sertifikat bilan taqdirlangan edi. Dinora va Mirsaidning xalqaro mental arifmetika olimpiadasida erishgan bu gʻalabasi 19-sonli maktab pedagogika jamoasi hamda ularning maktabdoshlariga cheksiz quvonch bagʻishladi. Shu bilan birga toʻgarakka aʼzo boʻluvchilar safi yanada oshdi.

Muyassar XALILLAYeVA.