TUMAN MAHALLA VA OILANI QOʻLLAB-QUVVATLASh BOʻLIMIDA KOʻRGAZMALI SEMINAR BOʻLIB OʻTDI

16-aprel kuni Amudaryo tumani Mahalla va oilani qoʻllab-quvvatlash boʻlimi va tumandagi fuqarolar yigʻinlari faoliyati bilan tanishish maqsadida respublika miqyosida koʻrgazmali seminar boʻlib oʻtdi.

Aholi osoyishtaligini taʼminlash, oila va xotin-qizlar bilan ishlash tizimini yangi darajaga olib chiqish, nuroniylar ijtimoiy faolligini oshirish, mahallani jinoyatchilikdan xoli hududga aylantirishda fuqarolarning oʻzini oʻzi boshqarish organlari roli va mavqeini yanada mustahkamlash, shuningdek jamiyatda ijtimoiy-maʼnaviy muhitni sogʻlomlashtirish, qonun ustuvorligini taʼminlash maqsadida 2020-yil 18-fevralda Prezidentimizning tegishli Farmoniga muvofiq Oʻzbekiston Respublikasi Mahalla va oilani qoʻllab-quvvatlash vazirligi hamda uning Qoraqalpogʻiston Respublikasi, viloyatlar, Toshkent shahar va tuman boʻlimilari tashkil etilgan edi.

Oʻtgan qisqa davr mobaynida vazirlikka qarashli boʻlimlarda aholini ijtimoiy qoʻllab-quvvatlash, yoshlar, ayollarni ish bilan taʼminlash, aholi daromadlarini oshirish, xotin-qizlar ijtimoiy faolligini qoʻllab-quvvatlash, ularning jamiyatdagi oʻrnini mustahkamlash, huquq va qonuniy manfaatlarini himoya qilishni kuchaytirish borasida salmoqli ishlar amalga oshirildi.

Boʻlib oʻtgan respublika koʻrgazmali seminarida respublika tumanlari Mahalla va oilani qoʻllab-quvvatlash boʻlimi boshliqlari ishtirok etishib, bu borada Amudaryo tumani Mahalla va oilani qoʻllab-quvvatlash boʻlimi va oʻzini oʻzi boshqarish organlari faoliyati bilan yaqindan tanishdilar.

Ular dastlab Choykoʻl ovulida istiqomat qiluvchi Mahmudjon Norboyevning xonadonida boʻlishdi. Uning oilasida ayoli, uch nafar farzandi, jami besh kishi istiqomat qiladi. Er-xotin oʻz mutaxassisliklari boʻyicha doimiy ish bilan band boʻlsa-da, boʻsh vaqtlarida tomorqasida ishlab, moʻl hosil yetishtirib, oilasi iqtisodini yuksaltirishga erishishgan. 12 sotixlik tomorqasining 4 sotix joyida issiqxona tashkil etgan va yaxshi daromad olganligi uchun joriy yilda issiqxonasini kengaytirib, 8 sotixga yetkazgan.

Hozirgi kunda imtiyozli kredit hisobiga bunyod etilgan issiqxonada turli ertagi ekinlar koʻchatlari yetishtirilib, bozorga sotilayapti, ekilgan bodringlar hosilga kirgan. Oilada boʻlgan kishi yaxshi niyat bilan qilingan mehnat samarasi ham quvonarli boʻlishiga guvoh boʻladi. Yana bir eʼtirof etishga arzigulik jihat: Mahmudjon Norboyev ijtimoiy himoyaga muhtoj, ishsiz yoshlar va ayollarga oʻz tajribalarini erinmay oʻrgatib, ularni ham oʻz izidan ergashtirmoqda.

Koʻrgazmali seminar ishtirokchilari Choykoʻl ovul fuqarolar yigʻini binosida boʻlishib, bu yerda yaratilgan sharoitlar, ayollarni kasb-hunarga oʻqitish borasida olib borilayotgan ishlar, “Buvijonlar maktabi” faoliyati bilan ham tanishdilar.

Shuningdek, tumanimizning Gulzor mahalla fuqarolar yigʻini, mahallada gulchilik bilan shugʻullanayotgan tadbirkor faoliyati, Qilichboy ovulida aholiga sport-sogʻlomlashtirish mashqlarda ishtirok etishi, dam olishi uchun yaratilgan sharoitlar bilan, yigʻin faoliyati bilan tanishish ham ularda zoʻr taassurotlar qoldirdi.

Mehmonlar tumanimizda zoʻrlik ishlatishdan jabr koʻrgan shaxslarni reabilitatsiya qilish va moslashtirish, oʻz joniga qasd qilishning oldini olish markazida yaratilgan sharoitlar va ish faoliyati bilan tanishgach, tuman Mahalla va oilani qoʻllab-quvvatlash boʻlimiga yigʻildilar.

Yakuniy yigʻilishda tuman hokimi Sultonboy Yoʻldoshev ishtirok etib, ishtirokchilarga tumanimizda oʻzini oʻzi boshqarish organlarida yaratilgan sharoitlar amalga oshirilayotgan ishlar, rejalar xususida gapirib berdi, fikr almashdi.

Shuningdek, Qoraqalpogʻiston Respublikasi Mahalla va oilani qoʻllab-quvvtalash vaziri Sogʻindiq Turmanov seminar ishtirokchilariga Amudaryo tumanidagi oʻzini oʻzi boshqarish organlari faoliyati bilan tanishishdan olgan taassurotlarini bayon etdi, respublikada obod va xavfsiz mahallalarni shakllantirish borasida topshiriqlar berdi.

Oygul RAJABOVA.