AMU ELINING ARDOQLI OTAXONI

Hayot – inson uchun haqiqiy dorilfunun. Uning bagʻrida inson hamma narsani – yashash sirlarini, mehnat va ijodni, odamiylik tushunchalarini oʻrganadi. Goh ravon, goh noravon soʻqmoqlar aro oldinga intiladi va hayotning zalvorli sinovlarida toblanadi. Biz bilgan, toʻgʻrirogʻi, el-yurt tanigan, ardoqlagan nuroniy otaxon Bekman ota Allaberganov umrining osoyishta fasli – nuroniy yoshga yetgunlariga qadar hayot sinovlarini sabr-toqat bilan yengib oʻtgan, halol va fidoyi mehnati bilan jamiyatda oʻz oʻrnini topgan, havas va ehtiromga munosib shaxs sifatida shakllangan insonlardan.

Bekman ota samimiyat va fidoyilik hokim oilada voyaga yetdi. 1968-yilda Toshkent Davlat pedagogika institutining fizika-matematika fakultetini tugatib, oʻquvchi-yoshlarga taʼlim-tarbiya berdi, ustoz sifatida obroʻ-eʼtibor qozondi, hayotda oʻz oʻrnini topdi. Odamlar bilan ishlashishdagi tashkilotchilik qobiliyati hamda xalq hayotiga oid muammolar yechimini topish borasidagi mulohazakorligi va bosiqligi, dunyoqarashining kengligi bois, tuman rahbariyatining nazariga tushdi. 1987-yilda uni Amir Temur nomli ovul Kengashi ijroiya qoʻmitasi raisining oʻrinbosari lavozimiga tayinlashdi. Otaxon 8-yil davomida mazkur ovul ahli hayotiga oid ijtimoiy muammolarni hal etish, kam taʼminlangan oilalarni qoʻllab-quvvatlash, ovulning uyushmagan qatlami bilan ishlashish, ishsizlik bilan bogʻliq masalalarni hal etish borasidagi ishlarga bosh-qosh boʻldi.

Tashkilotchi, shu bilan birga, har qanday vaziyatda ham odamlar bilan kelishuvchanlik fazilati tufayli 2003-yilda hamqishloqlari uni Amir Temur nomli ovul fuqarolar yigʻini raisligiga saylashdi. U yigʻin raisi sifatida ovul ahli hayotiga doir muammolarni ijobiy hal etish, ovul yerlarini suv bilan taʼminlovchi Mangʻit arna va Toshyop kanallari boʻylarini obodonlashtirish, hududdagi qabristonlar atroflarini ihota qilish, yakka tartibda uy-joy quruvchilar uchun yer maydoni ajratish, xutor tizimidagi hududlarni tartibga keltirish, tomorqa  xoʻjaligini yuritish madaniyatini yuksaltirishdek koʻpdan-koʻp masalalarni ijobiy hal etishga erishdi. Uning el-yurt, ovul ahli orasida oʻtkazgan har bir mehnat kuni chinakam ibrat maktabiga aylandi.

Bekman ota oʻz mehnati, halolligi va fidoyiligi bilan el ichra qadr topdi. U taʼlim maskanlarida, idora va korxonalarda, yoshlar davralarida tez-tez boʻlib, hayot tajribalaridan soʻzlaydi. Oila davrasida esa hamisha qattiqqoʻl, shu bilan birga samimiy doʻst, mehribon ota. Umr yoʻldoshi, faxriy ustoz Danagul momo Qoʻngʻirot tumanidan. Talabalik davridagi mehr-muhabbat rishtalari bilan bogʻlangan bu ikki fidoyi inson tarbiyasini olib, el-yurt koriga yarayotgan 5 nafar farzandlar ham elda eʼtibor topgan insonlar.

Otaxon ayni paytda umrining 75 bahoriga qadam qoʻydilar. Nafaqada boʻlishlariga qaramay, u hamon har kuni xalq orasida. Deyarli har kuni tumanimizdagi biron mahalla yoki taʼlim maskaniga tashrif buyuradi. Xalq orasiga kirib borib, har bir inson qalbiga maʼnaviyat nurlarini yoʻgʻiradi. Qoʻllaridan aslo kitob tushmagan otaxonni hech kim bu ishlarga undamaydi. U qalb amri, oʻz xalqi, Vataniga cheksiz mehr-muhabbati tufayli yurib charchamaydigan, maʼnaviy-maʼrifiy targʻibot ishlaridan aslo koʻngil uzmaydigan el-yurt ardogʻidagi fidoyi targʻibotchi sifatida kitoblarini qoʻltiqlab xalq orasiga kirib boraveradi. Yoshlar oʻrtasida diniy ekstremizmga, jinoyatchilikka qarshi kurash mavzularida olib boradigan targʻibot tadbirlarining son-sanogʻi yoʻq. Amudaryo telekanali orqali efirga uzatilayotgan “Odoblar xazinasi” koʻrsatuvining ijodkori, tashkilotchisi, muallifi ham Bekman otaning oʻzlaridir. “Odoblar xazinasi” koʻrsatuvining kitobxonlik, milliy-maʼnaviy qadriyatlar, urf-odat va anʼanalar, oila tutumlari, farzand tarbiyasi, ota-onaga hurmat va ehtirom kabi mavzulardagi har bir soni tomoshabinlar eʼtiborini qozonganining oʻzi otaxonning benazir xizmati hisoblanadi.

Tinib-tinchimas otaxon goh Qanglida, goh Qilichboy va Boʻzyop, Doʻrman ovullarida yoshlar, pir-u badavlat otaxon va onaxonlar davrasida mustaqillik gʻoyalari, shu bilan birga Prezident Farmon va Qarorlarida sharh etilgan yangi-yangi imkoniyatlarni hayotga joriy etish maqsadida amalga oshirilayotgan ishlar targʻibotini yuritishdan aslo charchamaydilar. Otaxonning bu fidoyiligi hukumatimiz tomonidan munosib baholandi.  U “Ardaqli nuraniy” koʻkrak nishoni bilan taqdirlandi, bu xushxabar nafaqat otaxonning farzandlari va yaqinlari, balki Amu elimizning barcha hududlarida yashovchi har bir insonga quvonch bagʻishladi. Chunki oʻzining halol mehnati tufayli el-yurt eʼtiboriga hurmatiga munosib Bekman ota Allaberganov har bir amudaryolikning ardoqli otaxonidir.

Robiya YOʻLDOShEVA.