SOBIQ IShChIGA TOʻLANMAGAN ISh HAQLARI UNDIRIB BERILDI

Har qanday nizoni murosa va tinchlik yoʻli bilan hal qilish xalqimizga xos odatlardan sanaladi. Ota-bobolarimiz azal-azaldan oʻzaro kelishmovchiliklarni tinchlik yoʻli bilan hal qilib, yarashitirish chorasini koʻrib kelgan. Millatimizga xos boʻlgan bu ezgu fazilatlar qonunlarimizda ham aks etgan.

Fuqarolik ishlari boʻyicha Amudaryo tuman sudi tomonidan koʻrilgan navbatdagi mehnat nizosiga oid ishlarning biri tomonlarning oʻzaro kelishuvi bilan yakunlandi.

Voqeaga batafsilroq toʻxtaladigan boʻlsak, fuqaro M.B. tuman Adliya boʻlimiga ariza bilan murojaat qilib, 2018-, 2019- va 2020-yillarda Qipchoq oʻrmon xoʻjaligida ishlaganligini, ammo ish beruvchi oʻsha paytda maosh toʻlamaganligini maʼlum qildi va ushbu davrdagi mehnat haqini undirib berishni soʻradi.

Murojaatni oʻrganish davomida haqiqatan ham fuqaro M.B. tuman Qipchoq Davlat oʻrmon xoʻjaligiga 2018-yil 01-iyunda 14-k-sonli buyruq bilan asalarichi vazifasiga ishga qabul qilingani, bunga fuqaro va ish beruvchi oʻrtasida 2018-yil 1-iyunda tuzilgan 28-sonli mehnat shartnomasi asos boʻlgani aniqlandi. Daʼvogar bilan tuzilgan mehnat shartnomasi 2020-yil 29-avgustda bekor qilingani maʼlum boʻldi.

Hisob-kitoblarga koʻra M.B.ning 2018-yil 4 oyi uchun, 2019-yil 7 oyi uchun va 2020-yil 7 oyi uchun ish haqlari jami 15 mln. 868 ming 696 soʻmni tashkil qilganligi va ushbu oylik ish haqilari toʻlanmanganligi aniqlandi.

Vaholanki, Oʻzbekiston Respublikasi Mehnat kodeksining 161-moddasiga binoan  mehnatga haq toʻlash muddatlari jamoa shartnomasi yoki boshqa lokal normativ hujjatda belgilanadi va har yarim oyda bir martadan kam boʻlishi mumkin emas.

Tuman Adliya boʻlimi tomonidan 2021-yil fevral oyida daʼvogar M.B. manfaatida javobgar Qipchoq Davlat oʻrmon xoʻjaligiga nisbatan ish haqi va yetkazilgan maʼnaviy zararlarni undirish haqida daʼvo ariza kiritildi.
Sud muhokamasi davomida har ikki tomonning fikr va mulohazalari tinglandi. Har ikki tarafda ham mehnat shartnomasida belgilangan huquq va majburiyatlarini bajarishda kamchiliklar borligi aniqlandi. Oxir-oqibat tomonlar oʻzaro murosa yoʻlini tanlab, oʻzaro kelishuv yoʻlini tanlashdi.

Daʼvogar 15 mln. 868 ming 696 soʻm oylik ish haqining yarmiga daʼvo qilib, qolgan summadan voz kechdi. Shunga koʻra Fuqarolik ishlari boʻyicha tuman sudining tomonlarning kelishuv bitimini tasdiqlash haqidagi ajrimi bilan daʼvo qisman qanoatlantirilib, daʼvogar foydasiga javobgar tashkilotdan 7,5 mln. soʻm ish haqilari undirib berildi.

M.Matyusupov, tuman Adliya boʻlimi boshligʻi.