MTT tarbiyalanuvchilari salomatlik va toʻgʻri ovqatlanish tushunchalariga ega boʻlishdi

Inson jismonan sogʻlom boʻlsagina, oʻz hayotini toʻgʻri yoʻlga solaoladi, koʻzlagan rejalarini tizimli amalga oshiradi. Shuning uchun ham xalqimiz «sogʻlik – yarim davlat», degan hikmatga amal qilishga intilib yashaydi.
Haqiqatdan ham salomatlikdan ham ulugʻ boylik yoʻq, inson uchun. Ana shu ulugʻ boylikka erishishning birdan-bir omili – shaxsiy gigiyena qoidalariga amal qilish, ayniqsa, oʻsib kelayotgan yosh avlodni jismonan sogʻlom insonlar qilib tarbiyalash, oilada ularning sogʻlom ovqatlanishini tashkil etish, sanitariya-gigiyena talablariga mos shart-sharoitlar yaratish bugungi kunda har birimizning zimmamizdagi masʼuliyatli vazifa hisoblanadi.
Oʻzbekiston Respublikasi Prezidentining 2020-yil 10-noyabrdagi «Aholining sogʻlom ovqatlanishini taʼminlash boʻyicha qoʻshimcha chora-tadbirlar toʻgʻrisida»gi 4887-sonli Qarori ijrosini taʼminlash maqsadida joriy yilning 19-fevral kuni tumanimizdagi  43-sonli Maktabgacha taʼlim tashkilotida tuman Salomatilk Markazi shifokori Tamara Saidova rahbarligida «Salomatlik – tuman boylik, sogʻlom ovqatlanish – uzoq umr garovi» mavzusida targʻibot tadbiri boʻlib oʻtdi.
Tadbirda mutaxassis shifokor Tamara Saidova shaxsiy gigena qoidalariga amal qilish koʻnikmasini bolalarga 4-5 yoshidan boshlashning foydalari haqida batafsil toʻxtaldi. Xususan, bolajonlar uchun moʻljallangan tish choʻtkalari, tish pastalarining turlari, ayniqsa, tish pastalarining bola ogʻiz boʻshligʻiga taʼsiri, tishlarning sogʻlom boʻlishidagi ahamiyati, tishi sogʻlom bolaning salmatligida umuman muammo boʻlmasligi haqida batafsil maʼlumot berdi. Shu bilan birga, bolaning sut tishlari tushib boshlagan paytda ota-onalar juda eʼtiborli boʻlishlari zarurligini taʼkidladi. Yaʼni, bolaning toʻgʻri ovqatlanishiga alohida ahamiyat qaratish, haddan tashqari koʻp shirinliklar isteʼmol qilishlari, energetik suvlar (Coca cola, Pepsi cola, Fanta)ni meʼyordan ortiq ichishlariga, shuningdek, sut tishlari oʻrniga yangi tishlar chiqayotgan paytda qattiq narsalar (turli meva danaklari, bodom, novvot)ni tishlarida ezib yeyishlariga yoʻl qoʻymaslik xususida zarur tavsiyalar berdi.

Tadbir davomida Tamara Saidova MTT xodimlarining savollariga ham batafsil javob berdi. Xususan, bolaning ruhiy tetikligiga erishish maqsadida unda har kuni shaxsiy gigiyena qoidalariga amal qilish koʻnikmasini hosil qilish muhimligini taʼkidladi. Bunda bola har kuni bir vaqtda uyqudan uygʻonib, eng avval yuz-qoʻlini, tishlarini yaxshilab yuvishga odatlanishi, injiqlik qilmasdan, ertalabki nonushtani ishtaha bilan tamaddi qilib, atrof-muhitning doimo ozoda boʻlishiga eʼtibor qaratishga oʻrganishi muhim ahamiyatga ega boʻlib, bolaning oʻz ust-boshi, oʻtiradigan oʻrni, oʻyinchoqlarining toza boʻlishiga odatlanishi uning kelajakda saranjom-sarishta, ozoda va intizomli inson sifatida voyaga yetishida muhim oʻrin tutishini misollar orqali tushuntirdi.
Tadbir davomida bolajonlar tozalik, yoqimli ishtaha, sogʻlik tushunchalariga ega boʻlishdi.

Robiya YOʻLDOShEVA.