«AYoLLAR DAFTARI»GA KIRITILGAN XOTIN-QIZLAR IShTIROKIDA YIGʻILISh OʻTKAZILIB, AMALIY MAShGʻULOT TAShKIL ETILDI
Joriy yilning 8-yanvar sanasida «Xotin-qizlarni ijtimoiy qoʻllab-quvvatlash boʻyicha qoʻshimcha chora-tadbirlar toʻgʻrisida»gi Hukumat qarori qabul qilinib, unga koʻra, «Ayollar daftari»ga kiritilgan va tadbirkorlik bilan shugʻullanish istagida boʻlgan xotin-qizlarga bazaviy hisoblash miqdorining 150 baravarigacha (33 mln. 450 ming soʻm) miqdorigacha kreditlar ajratish belgilab qoʻyildi.
Ushbu Qarorning «Xotin-qizlar muammolarini «Ayollar daftari»ni yuritish orqali tizimli ravishda hal etish va ularni ijtimoiy qoʻllab-quvvatlash boʻyicha vaqtinchalik tartibi» ilovasiga asosan «Ayollar daftari»ga kiritilgan xotin-qizlarni tadbirkorlikka keng jalb qilish, tadbirkorlik bilan shugʻullanish istagida boʻlgan ayol-qizlarni oʻzlari tanlagan yoʻnalishlar boʻyicha tadbirkorligini rivojlantirishga koʻmaklashish hamda yuqoridagi Hukumat Qarori ijrosini taʼminlash maqsadida tuman Mahalla va oilani qoʻllab-quvvatlash boʻlimi hamda Qoraqalpogʻiston Respublikasi Tadbirkorlar Markazi mutaxassislari hamkorligida yigʻilish oʻtkazildi.
Yigʻilishda Amudaryo tumanidan «Ayollar daftari»ga kiritilgan 58 nafar xotin-qizlar hamda tuman Mahalla va oilani qoʻllab-quvvatlash boʻlimi masʼullari, mutaxassislari ishtirok etishdi.
Yigʻilishda Ayollar tadbirkorligini yoʻlga qoʻyish, ularni kasb-hunar egallashga yoʻnaltirish, tanlagan yoʻnalishlari boʻyicha kasb-hunar egallashlariga, shuningdek, tadbirkorlik boʻyicha oʻz biznes-loyihalarini ishlab chiqish, kredit olishlariga koʻmaklashishga oid qator masalalar muhokama etildi. Xususan, «Ayollar daftari»dagi roʻyxatni xolisona shakllantirish, chindan moddiy-maʼnaviy, psixologik koʻmakka muhtoj xotin-qizlarimizni aniqlab, ularning oyoqqa turib olishlari, oʻzlarini jamiyatning toʻlaqonli aʼzosi sifatida his qilishlariga koʻmaklashish eng muhim vazifa ekanligi, shu bois, ularning xonadonlariga kirib borib, ular bilan yaqindan muloqot qilgan holda muammolarini hal etish muhimligiga eʼtibor qaratish zarurligi taʼkidlandi.
Shuningdek, yigʻilish yakunida tumanimizdagi «Ayollar daftari» roʻyxatiga kiritilgan 58 nafar xotin-qizlar uchun bichish-tikish boʻyicha mashgʻulotlar ham oʻtkazildi.
Mashgʻulotlarni Qoraqalpogʻiston Respublikasi Tadbirkorlar Markazining Bichish-tikish boʻyicha oʻquv kursi rahbari Dilfuza Bobojonova olib bordi. Mashgʻulotlarda uzviylikni taʼminlash maqsadida turli xil bichimdagi liboslar dizayni boʻyicha alohida-alohida tushunchalar berilib, liboslarni bichishdagi oʻlchov birliklari, oddiy, ish, koʻcha va tantanalar uchun liboslar tikib-tayyorlash, ularni fasllarga monand bezatish yuzasidan zarur tavsiyalar berildi. Ishtirokchilar oʻzlarini qiziqtirgan savollar bilan murojaat qildilar. Xotin-qizlar tomonidan tushgan barcha savollarga Qoraqalpogʻiston Respublikasi Tadbirkorlar Markazi Bichish-tikish oʻquv kursi rahbari Dilfuza Bobojonova batafsil javob berdi. Ushbu yoʻnalish boʻyicha bank krediti asosida oʻz tadbirkorligini boshlash istagini bildirgan ayol-qizlarga zarur tavsiyalar berib, oʻzining shaxsiy tajribalari bilan oʻrtoqlashdi.
Oʻquv kursida qatnashgan ayol-qizlarga mashgʻulotlar yakunlanganidan soʻng, sertifikatlar topshirildi. Xonadonlariga borib, shart-sharoitlari oʻrganilib, tijorat banklaridan kredit olishlariga koʻmaklashildi.
Robiya YOʻLDOShEVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
