SEKTOR RAHBARI QILIChBOYLIK YoShLAR BILAN UChRAShDI

Bugungi kunda mamlakatimiz aholisining salmoqli qismini tashkil etadigan yoshlarning hayotda oʻz oʻrinlarini topishi, oʻqishi va munosib sharoitlarda mehnat qilishi, yashashi uchun gʻamxoʻrliklar koʻrsatish davlatimiz siyosatining ustuvor yoʻnalishlaridan hisoblanadi.

Qilichboy ovul fuqarolar yigʻinida Davlat xavfsizlik xizmati, tuman hokimining oʻrinbosarlari, korxona-tashkilotlar rahbarlari ishtirokida tuman prokurori rahbarlik qiladigan 2-sektor ishchi guruhi aʼzolarining oʻtkazgan “Prokuror va yoshlar uchrashuvi” ham yoshlar muammolarini oʻrganish, ularning orzu-intilishlari bilan tanishib, qoʻllab-quvvatlash maqsadlariga qaratildi.

Uchrashuvga 38 nafar ovul yoshlari va fuqarolar ishtirok etdilar.

Uchrashuvni tuman prokurori Javlonbek Muftullayev ochdi va ovulning ishsiz yoshlarining bandligini taʼminlash, tadbirkorlik faoliyatiga keng jalb qilish, ularning muammolarini oʻrganish va imkon qadar joyida hal qilish, yoshlarning tashabbuslarini qoʻllab-quvvatlash, qobiliyatlarini namoyon etishlariga sharoit yaratish maqsadida jonli muloqot tashkil etilganini, mamlakatimiz rahbari muhtaram Shavkat Mirziyoyevning “Yangi Oʻzbekistonni, albatta, yoshlar bilan birga quramiz” deya ularga yuksak ishonch bildirganini, qilichboylik yoshlar ham ana shu ishonchga munosib boʻlmogʻi lozimligini taʼkidladi.

Shuningdek 2-sektor ishchi guruhi aʼzolari ham soʻzga chiqib, yoshlar hayotidagi muammolarni oʻrganish va hal etish borasidagi olib borilayotgan ishlar hamda yoshlarning odob-ikromli boʻlishi, muomala, kiyinish madaniyatiga amal qilishi, jamiyatda yurish-turishi bilan boshqalarga oʻrnak boʻlishi lozimligi xususida targʻibot-tashviqotlar olib borilayotganligi haqida gapirdilar.

Shundan soʻng, tuman prokurori, 2-sektor rahbari Javlonbek Muftullayev uchrashuvga kelgan yoshlar bilan yuzma-yuz suhbat oʻtkazdi va murojaatlarini tingladi.

Hudud yoshlari yoshlar sanoat zonasidan tadbirkorlik faoliyatini yoʻlga qoʻyish uchun yer va imtiyozli kredit olishda, kasbga oʻqitish masalasida, tikuvchilik tsexi ochishi uchun imtiyozli kredit olishda va boshqa masalalarda amaliy yordam soʻrab murojaatlar qilishdi.

Shuningdek, yoshlar parrandachilik, chorvachilik yoʻnalishida tadbirkorlik faoliyatini yoʻlga qoʻyib,  oʻz-oʻzini  band qilish uchun kredit olishda, kasbga tayyorlash yuzasidan yordam soʻradilar.

Yoshlarning murojaatlarining ayrimlari joyida hal etildi, ayrimlarini hal etish yuzasidan tegishli masʼullarga topshiriq berildi va ijrosi 2-sektor ishchi guruhi nazoratiga olindi, ayrimlariga huquqiy maslahatlar berildi.

Uchrashuvda ishtirok etgan tumandagi korxona, tashkilotlar, tijorat banklar filiallari rahbarlari tegishliligi boʻyicha yoshlarning savollariga javoblar berdilar.

Uchrashuv soʻngida tuman prokurori Javlonbek Muftullayev dehqonchilik bilan shugʻullanish istagini bildirgan bir guruh ishsiz yoshlarni hududdagi ajratib berilishi mumkin boʻlgan  yerlar haritasi bilan tanishtirdi.

Yoshlar hayotiga yoki ular yashayotgan hududlarga daxldor muammolarni aniqlash va hal etishga koʻmaklashish, tadbirkorlik faoliyatini yoʻlga qoʻyishlariga koʻmaklashish, fikr-takliflarini tinglash va qoʻllab-quvvatlash maqsadida tashkil etilgan “Prokuror va yoshlar uchrashuvi” qilichboylik yoshlarga yuqori mativatsiyalar berdi, orzu-istaklari sari dadil intilishga chorladi.

Oygul RAJABOVA.