FAVQULODDA VAZIYaTLAR VA YoNGʻINLAR PROFILAKTIKASI KUNI OʻTKAZILDI

Amudaryo tumani Favqulodda vaziyatlar boʻlimida bugungi  kunda 78 nafar shaxsiy tarkib, shu jumladan, 6 nafar shartnoma asosidagi harbiy xizmatchilar va 72 nafar ishchi-xizmatchilardan iborat jamoa mehnat qiladi.

Tuman Favqulodda vaziyatlar boʻlimi yongʻin nazorati va profilaktikasi, pormativ-texnik, favqulodda vaziyatlar davlat quyi tizimi va fuqaro muhofazasi faoliyatini tashkil etish, xavfsizlik targʻiboti, yongʻin-qutqaruv qismlaridan iborat yoʻnalishlarda ish olib boradi.

Yongʻin nazorati va profilaktikasi yoʻnalishi boʻyicha davlat tasarrufidagi obʼektlarning yongʻinga qarshi holatini koʻrikdan oʻtkazish, kamchiliklar uchrasa – yozma koʻrsatmalar berish, ijrosi taʼminlamasa, Oʻzbekiston Respublikasi Maʼmuriy javobgarlik toʻgʻrisidagi Kodeksning tegishli moddalariga asosan maʼmuriy jarimalar qoʻllash amalga oshiriladi. Aholi honadonlarining yongʻinga qarshi holati koʻzdan kechirilib, mavjud muammolar bartaraf etish boʻyicha yoʻl-yoʻriqlar berilib, yongʻinlarning, is gazidan zaharlanishning oldini olish borasida targʻibot-tashviqot olib boriladi. Shuningdek, sodir boʻlgan yongʻinlarning sabablari oʻrganiladi, tergovga qadar tekshiruv ishlari olib boriladi.

Normativ – texnik yoʻnalishda yangidan qurilishi rejalashtirilgan bino-inshootlar yoki tadbirkorlik sohasiga tegishli qurilish ishlari uchun ajratilayotgan yer maydonlari oʻrganiladi va xulosalar beriladi. Qurilish obʼektlarida yongʻin va  texnika xavfsizligiga rioya qilinishi boʻyicha joyiga chiqib oʻrganiladi.

Favqulodda vaziyatlar davlat quyi tizimi va fuqaro muhofazasi faoliyatini tashkil etish, xavfsizlik targʻiboti, yongʻin-qutqaruv qismlari yoʻnalishlari boʻyicha olib boriladigan ishlar ham juda dolzarb va ahamiyatlidir. Har haftaning chorshanba kuni “Favqulodda vaziyatlar va yongʻinlar profilaktikasi kuni” deya belgilangani munosabati bilan amalga oshirilayotgan chora-tadbirlar bu borada muhim oʻrin tutadi. 27-yanvar kuni ham “Favqulodda vaziyatlar va yongʻinlar profilaktikasi kuni” tadbirlari oʻtkazildi.

Dastlab profilaktika kuni munosabati bilan shaxsiy tarkib aʼzolari ishtirokida yigʻilish oʻtkazilib, boʻlinmalar boshiqlariga topshiriqlar berildi va xodimlarning ish faoliyatiga doir lavhalar namoyish etildi. Keyin Favqulodda vaziyatlar boʻlimi 3-Kasbiylashtirilgan yongʻin-qutqaruv qismi qutqaruvchilarining kasbiy tayyorgarligi va yongʻinni bartaraf etish boʻyicha saf tayyorgarligi boʻyicha amaliy va nazariy oʻquv mashgʻulotlari oʻtkazildi.

Shundan soʻng Favqulodda vaziyatlar binosi oldida hamkorlikdagi xizmatlar bilan 4 ta sektorlarga boʻlingan holda is gazidan zaharlanish, gaz havo aralashmasi chaqnashining oldini olish boʻyicha profilaktik tadbirlar oʻtkazish uchun hududlarga yoʻl oldilar.

Tadbirlar davomida  Olmazor mahalla hududida olib borilayotgan qurilish obʼektida xavfsizlikni taʼminlash boʻyicha, is gazidan zaharlanish, gaz-havo chaqnashining oldini olish borasida profilaktik suhbatlar olib bordilar.

Shuningdek, Boyovul mahallasidagi koʻp qavatli uylardagi xonadonlarda yongʻin xavfsizligi qoidalariga amal qilinishi nazoratdan oʻtkazildi, aholiga yongʻin kelib chiqishi, is gazidan zaharlanishning oldini olish hamda botulizm, ovqatdan zaharlanish, quturish kasalliklaridan saqlanish yuzasidan tavsiyalar berdilar.

Oʻtkazilgan mazkur profilaktik tadbirlar tumanimiz aholisining tinch-osoyishtaligiga xizmat qilgani bilan ahamiyatli boʻldi.

O.RAJABOVA.