TAQINChOQLAR - OʻZLIGIMIZ OYNASI
Qiz bola borki, turli xil zirag-u bilaguzuklar, tilla zanjir hamda uzuklar taqib olib, gulday ochilib yurishni yoqtiradi, oʻzbek qizi mana shunday goʻzalligi, xulqi-odobi bilan boshqa millat qizlaridan ajralib turadi, nazokati, nafosati ham oʻzgacha. Ammo, mana shu nafosatga rahna solayotgan bir yov bor - bu noanʼanaviy, jimjimador taqinchoqlardir. Hozirda bunday taqinchoqlarning turi kundan-kunga ortib bormoqda. Qizigʻi shundaki bunday taqinchoqlarning hammasi ham tilla emas. Ikki-uch kunda oʻz rangini yoʻqotadigan sifatsiz. Toʻgʻri, oltin taqinchoqlar inson organizmi faoliyatini yaxshilaydi, buni tibbiyot tasdiqlaydi. Lekin yuqorida aytganimizdek kauchuk va metalldan tayyorlanganlarichi? Uning foydasi bormi? Albatta yoʻq, bu nafaqat moddiy zarar balki maʼnan ham ziyondir. Buning bilan men bunday taqinchoqlarni butunlay qoralamoqchi emasman. Chunki ularning orasida ixcham hamda bejirimlari ham bor. Hammaning ham tilla taqishga qurbi yetmaydi, "besh qoʻl barobar emas”. Bunday hollarda qizlar ota-onaning boʻyniga, "dugonam unday zirak taqibdi”, "falonchi bunday uzuk taqibdi” deb osilib olishi bu – maʼnaviy qashshoqlik belgisidir. Bunday farzand na ota-onani rozi qila oladi, na Vatanga manfaat keltira oladi. Shuni bilamanki, oqila qiz aslo bunday yoʻl tutmaydi. Ammo bizning yoshlar, yaʼni tengqurlarim yoppasiga zeb-ziynatga oʻch boʻlib borayaptilar. Zuhrolar, Kumushbibilar faqat ertakda qolib ketyapti... Yoʻllarda, jamoat joylarida ketayotsang ortiqcha yasan-tusanga berilgan qizlarga qoʻzing tushadi. Ayrimlarida bir qarich kelgulik ziraklar, yana birida aylanasi bilaguzukdan ham kattaroq xillari... Achinib ketasan kishi. Ikki-uch qator qilib teshilgan qulogʻiga kuyasanmi,yoki burniga taqib olganlarigami? Bu koʻrinish orqali kimga yoqmoqchimiz oʻzi? Oʻylaymanki bu holatdagi qizni koʻrgan har qanday "oq otli shahzoda” orqasiga qaramay qochadi. Haqiqatdan ham, tor shimda yoki mini yubkada yurib oʻzini koʻz-koʻz qilayotgan qizdan nima kutish mumkin? Muqaddas islom dinimizda ham bunday holatlar qattiq qoralanadi.
Aziz dugonalarim! Jon opa-singillarim! Siz yuqoridagidek oʻta naqshinkor va soxta goʻzalliklarsiz ham tabiiy goʻzalsiz. Jamolingiz oy bilan talashadi. Ammo odobingiz, ichki dunyongiz ham shunga yarasha boʻlishi kerak. Unutmang, biz oʻzbek qizlarimiz, bizning tomirimizda buyuklarning qoni bor, momolarimiz halol va pokiza yashab oʻtishgan. Shunday ekan, bizga havaslanib boqqan nigohlar bizni borimizcha sevsin...
Aziza MADRAHIMOVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
