FAN OYLIGI DOIRASIDAGI TADBIRLAR OʻQUVChILARNING QIZIQIShINI ORTTIRMOQDA

Dekabr – umumtaʼlim maktablarida tarbiya, tarix, huquq fan oyligi doirasidagi biri-biridan qiziqarli tadbirlarga boy oʻtdi.

Amudaryo tumanidagi 23-sonli umumtaʼlim maktabida ham dekabr oyi tarbiya, tarix, huquq fanlari uslubirlashmasi aʼzolari tomonidan ishlab chiqilgan rejaviy-jadval asosidagi ochiq darslar, savol-javob kechalari, sinflararo bellashuvlar, zakovat bahslariga boyligi bilan muhim ahamiyatga ega boʻldi.

Ayniqsa, tarix va huquq fan oyligi doirasidagi tadbirlar oʻquvchilarning faol ishtiroki bilan oʻtganidan, hatto ota-onalar ham mamnun boʻlishdi. Tarix va huquq fanlari uslubirlashmasida faoliyat olib borayotgan Muhabbat Rahimboyeva, Orifjon Yusupov va Sharofat Rahimboyevalar tomonidan uchta sinfda ochiq darslar oʻtkazildi. «Tariximiz – maʼnaviyatimiz koʻzgusi», «Biz tarixni oʻrganamiz» mavzularida savol-javob kechalari, zakovat bahslari oʻtkazildi. Fan oyligi doirasida oʻtkazilgan barcha tadbirlar oylik yakunida umumlashtirildi. Oʻquvchilar faolligini oshirish, ularning fan oyligi davomida egallagan bilim va koʻnikmalarini yanada mustahkamlash maqsadida Yangi yil bayrami arafasida 7-sinflar oʻquvchilari ishtirokidagi fan oyligining yakuniy bosqichi uchun rejalashtirilgan «Jayhun» va «Asrlar sadosi» guruhlari oʻrtasida sinflararo bellashuv oʻtkazildi.

Qizgʻin bahslar, zakovatni charxlovchi savol-javoblarga boy oʻtgan tadbirda maktab direktori Bobojon Yaxshimov ishtirok etib, uslubbirlashma aʼzolari tomonidan tarix va huquq fan oyligi muvaffaqiyatli tashkil etilganini mamnuniyat bilan eʼtirof etdi. Shu bilan birga 7-sinflar oʻrtasida oʻtkazilayotgan zakovat bahslarida «Jayhun» va «Asrlar sadosi» jamoalariga katta yutuqlar tiladi.

Tadbirda  «Jayhun» va «Asrlar sadosi» jamoalari oʻzlarining tarix va huquq fanlaridan bilimdonliklarini namoyish etishdi. Turli mavzularda, shuningdek Vatanimiz tarixi, dunyo va din tarixiga oid savollarga aniq va puxta javob berdilar. Shuningdek, har ikkala jamoa fan oyligi doirasida oʻzlari yozgan referatlar, tayyorlagan tarixiy albomlarini ham namoyish etdilar. Tadbir yakunida faol oʻquvchilar maktab maʼmuriyati tomonidan taqdirlandilar.

Shuningdek, ushbu maktabning 3-«A» sinfida oʻqish fanidan ochiq dars oʻtkazildi. Mavzu «Yangi yil va yangi yil bilan bogʻliq anʼanalar» deb nomlandi. Ushbu ochiq darsni oʻtkazishdan maqsad, pandemiya sharoitida oʻquvchilarning jamoa boʻlib bayramni nishonlashlarining oldini olish, yangi yil oilaviy bayramlar sirasiga kirishini, ayniqsa, hozirgi pandemiya sharoiti bilan bogʻliq Sogʻliqni saqlash vazirligi tomonidan  eʼlon qilingan cheklovlarga amal qilgan holda bayramni har bir oʻquvchi ota-onalari bilan kutib olish zarurligini tushuntirishdan iborat edi.

Shundan soʻng, oʻquvchilarning tushunchalarini yanada boyitish maqsadida «Qish oylarida bolalar qanday oʻyinlar oʻynaydi?» «Yangi yil bayramini qachon va qayerda oʻtkazamiz?» kabi savollar boʻyicha oʻquvchilarning nutqi sinovdan oʻtkazildi. Ular ushbu savollarga ham faollik bilan javob berdilar.

Shuni alohida eʼtirof etish kerakki, maktabda boshlangʻich sinflarda  uch nafar oʻqituvchi faoliyat yuritadi. Ular oʻz faoliyatlari davomida oʻzaro tajriba almashish, sinflararo bellashuvlar, fanlar boʻyicha savol-javob kechalari oʻtkazish borasida doimiy hamkorlik qilishadi. Bu esa oʻquvchilarning biri-biridan qolishmay, oʻzaro musobaqa tarzida bilim olishlarida muhim ahamiyat kasb etmoqda.

Robiya YOʻLDOShEVA.