“Sogʻlom bola yili” yangiliklari

Yaqinda Amudaryo maishiy xizmat koʻrsatish kasb-hunar kollejiga Qilichboy OFY hududida joylashgan 92-02K harbiy qism komandiri kapitan Sh.Tugayev va E.Alyaminovlar oʻquvchilar bilan uchrashdilar. Uchrashuv davomida oʻquvchilarga harbiy sohaga oid maʼlumotlar berildi. Oʻquvchilar oʻzlarini qiziqtirgan savollarga javob oldilar.

***

Oʻzbekistonda xizmat koʻrsatgan Madaniyat xodimi, Qoraqalpogʻiston xalq shoirasi, iqtidorli jurnalist, 15 dan ziyod nasriy, nazmiy asarlar muallifi Guliston Matyoqubovaning "Ota uyim" nomli yangi kitobi nashrdan chiqdi.

Kitobdan adibaning soʻnggi yillarda turli janrlarda yozgan asarlari va tarjimalari oʻrin olgan

***

"Kamolot” YoIH homiyligidagi "Kamalak” bolalar tashkiloti tashkil qilinganining 13 yilligiga bagʻishlab 23-may kuni tuman madaniyat uyida "Kamolot sari” mavzusida yoshlar ishtirokida tadbir oʻtkazildi. Tadbirda taʼkidlanganidek, tumanimizda "Kamalak” aʼzolari soni 16248 nafarni tashkil qiladi. Bu yil ularning 3197 nafari "Kamolot” aʼzoligiga qabul qilinadi.

***

21-may kuni Amudaryo akademik litseyida "Taʼlim-tarbiya jarayonida ilgʻor pedagogik texnologiyalardan foydalanish - zamonaviy taʼlimning bosh mezoni" mavzusida Respublika oʻquv-amaliy seminari oʻtkazildi.

Qoraqalpogʻiston Respublikasidagi barcha akademik litseylar vakillari ishtirokida oʻtkazilgan ushbu seminarda "Ochiq dars"lar tashkil etildi va akademik litseylar oʻqituvchilarining oʻquv-uslubiy hujjatlari taqdimoti boʻlib oʻtdi.

Seminarda Qoraqalpogʻiston Respublikasi Vazirlar Kengashining Oʻrta maxsus, kasb-hunar taʼlimi Boshqarmasi boʻlim boshligʻi Ye.Sultonov ishtirok etdi.

***

Tumanimizning barcha ovul va mahallalarida "Mahallamiz pahlavonlari" turnir musobaqalari oʻtkazildi.

Bir qancha tashkilotlar tomonidan tashkil etilgan ushbu turnir musobaqalarida jami 4230 nafar bolalar ishtirok etishdi. Uch bosqichda oʻtkazilgan turnirning final bosqichida oʻz vazn toifalarida gʻoliblikni qoʻlga kiritgan yosh pahlavonlarga tashkilotchilar tomonidan qimmatbaho sovgʻalar, faxriy yorliqlar topshirildi.

Birinchi oʻrinni egallagan tumanimiz mahallalarining yosh pahlavon kurashchilari ushbu turnirning Qoraqalpogʻiston Respublikasi bosqichiga yoʻllanma oldilar.