“KORRUPTsIYa – TARAQQIYoT KUShANDASI” MAVZUSIDA OʻTKAZILGAN INShOLAR TANLOVI GʻOLIBLARI TAQDIRLANDI

Korruptsiya har qanday davlat va jamiyat rivojiga jiddiy salbiy taʼsir koʻrsatuvchi xavfli omil, barcha mamlakatlarga tahdid soluvchi murakkab ijtimoiy-siyosiy, iqtisodiy hodisadir. Zero, bu omil tufayli davlatning rivojlanishi sekinlashadi, hukumat tizimi ishdan chiqadi, demokratik institutlarga putur yetadi.

Korruptsiyaning har qanday koʻrinishlariga qarshi kurashishni biz, eng avvalo, oʻzimizdan boshlashimiz darkor. Buning uchun esa shaxsning huquqiy ong va huquqiy madaniyati yetarli darajada shakllangan boʻlmogʻi maqsadga muvofiqdir.

Buni yosh avlod ongiga chuqur singdirish, huquqiy bilimini oshirish maqsadida tumandagi umumiy oʻrta taʼlim maktablarining 10-11-sinf oʻquvchilari oʻrtasida “Korruptsiya – taraqqiyot kushandasi” mavzusida insholar tanlovi oʻtkazildi. Tanlovda Xalq taʼlimi boʻlimiga qarashli maktablarning yuqori sinf oʻquvchilari ishtirok etdilar. Oʻquvchilar tomonidan yozilgan insholarni hayʼat aʼzolari odilona baholab, gʻoliblarni aniqladilar.

Unga koʻra, 87-sonli maktabning 11-sinf oʻquvchisi Yulduz Oqmonovaga 1-oʻrin, 13-sonli maktabning 10-sinf oʻquvchisi Gulchiroy Botirovaga 2-oʻrin, 40-sonli maktabning 11-sinf oʻquvchisi Komila Baxtiyorovaga 3-oʻrin gʻolibligi berildi.

Ushbu gʻoliblarni taqdirlash marosimida tuman Xalq taʼlimi boʻlimi mudiri R.Matqurbonov, tuman Adliya boʻlimi boshligʻi M.Matyusupov, Xalq deputatlari tuman Kengashining Qonunchilikni taʼminlash va korruptsiyaga karshi kurashish masalalari boʻyicha doimiy komissiya raisi M.Oʻrozboyevlar ishtirok etdilar va tanlov gʻoliblariga faxriy yorliq va esdalik sovgʻalarini topshirdilar.

N.Jumaniyozova, tuman Xalq taʼlimi boʻlimi bosh yuriskonsulti.