YOʻL-TRANSPORT HODISASINING SABAB HAMDA OQIBATLARI MUHOKAMA QILINDI

25-oktyabr kuni Toʻlqin ovulida yoʻl-transport hodisasi muhokamasiga bagʻishlangan yigʻilish boʻlib oʻtdi.

Yoʻl-transport hodisasining sabab va oqibatlari muhokamasiga bagʻishlangan yigʻilishda tuman hokimi Sultonboy Yoʻldashev, tuman Ichki ishlar boʻlimi boshligʻi Ulugʻbek Xudayberganov, tuman prokurori oʻrinbosari Rahmon Sankiboyev, Ichki ishlar boʻlimining Davlat yoʻl harakati xavfsizligi boʻlinmasi boshligʻi Dilshod Aminov hamda fuqarolar yigʻini raisi, oʻrinbosarlari, koʻcha boshchilari, hududda yashovchi aholi vakillari ishtirok etdilar.

Yigʻilishda joriy yilning 24-oktyabr kuni sodir etilgan yoʻl-transport hodisasi muhokama qilindi. Ushbu yoʻl-transport hodisasi 24-oktyabr kuni Choykoʻl ovulida yashovchi fuqaro tomonidan oʻzining nomida boʻlmagan avtomashinani ishonchnoma orqali boshqarib borayotganida boshqaruvni yoʻqotib, yoʻl chetidagi ariqqa tushib ketib agʻdarilganligi oqibatida sodir boʻlgani maʼlum qilindi. Mazkur yoʻl-transport hodisasi natijasida ushbu avtomashina ichida boʻlgan 6 nafar shaxs, shulardan 3 nafari voyaga yetmaganlar, turli xildagi ogʻir tan jarohatlarini olib, tuman tibbiyot birlashmasiga qarashli shifoxonaga keltirilgan. Shifoxonada ulardan bir nafari hushiga kelmasdan vafot etgan, 2 nafarining ahvoli ogʻir darajada deya tashxis qoʻyilgan.

Tuman hokimi Sultonboy Yoʻldashev ushbu ogʻir oqibatli hodisa yuzasidan oʻz mulohazalarini bildirar ekan, bu kabi ayanchli hodisalar fuqarolarimizning eʼtiborsizliklari natijasida kelib chiqayotganligini, avtotransport hodisalari sodir etilishining sabablarini chuqur tahlil qilish va ularni bartaraf qilish lozimligini, bunday holatlarning oldini olish boʻyicha profilaktik choralarni yanada kuchaytirish zarurligini taʼkidladi.

Chindan ham, belgilangan tezlikni oshirib yuborish, mast holda avtomashina boshqarish, texnika xavfsizligiga rioya qilmaslik kabi beparvoliklar natijasida roʻy beradigan hodisalar huquqbuzarlik holatlari hisoblanadi.

Yigʻilishda Ichki ishlar boʻlimining Davlat yoʻl harakati xavfsizligi boʻlinmasi boshligʻi Dilshod Aminov ushbu jinoyatning sodir etilish sabablari, uni keltirib chiqaruvchi omillar va oqibatlari haqida toʻxtalib oʻtdi. U oʻz soʻzida hozirgi vaqtda ruxsat etilmagan toʻy sayllariga chiqish, spirtli ichimliklar isteʼmol qilgan holda avtoulovni boshqarish, ayniqsa, yoshlarning tegishli hujjatlarsiz, yoʻl-harakati qoidalarini mukammal oʻrganmasdan transport vositasini boshqarayotganliklari sababli ayanchli avtohalokatlar roʻy berayotgani, oqibatda koʻplab insonlar hayotdan koʻz yumayotganini achinish bilan taʼkidladi.

Masʼullar tumanimiz hududida yoʻl-transport hodisalari bilan bogʻliq huquqbuzarliklar va jinoyatlar mototsikl haydovchilari tomonidan ham sodir etilayotgani, aksariyat hollarda velosiped haydovchilari yoʻl-transport hodisalari jabrlanuvchilari boʻlib qolayotganini ham taʼkidlashdi. Bunga asosan kechki paytda harakatlanayotgan velosipedlarda nur qaytaruvchi moslamalar oʻrnatilmaganligi, avtoulov haydovchilari ularni koʻrmay qolayotganliklari sabab boʻlayotgani aytib oʻtildi. Bu kabi holatlarning oldini olish maqsadida Davlat yoʻl harakati xavfsizligi xodimlari, profilaktika inspektorlari va boshqa xodimlar hamkorlikda profilaktik targʻibot ishlarini yanada kuchaytirishlari zarurligi toʻgʻrisida soʻz yuritildi.

 Shu bilan birga haydovchilar yoʻl harakati qoidalariga qatʼiy rioya qilishlari, ayniqsa, uzoq masofaga qatnovchi, yoʻlovchi tashish bilan shugʻullanuvchi avtomobillar harakatini nazorat qilish boʻyicha kuchaytirilgan tartibda reydlar tashkil etilishi, haydovchilarga hushyorlikni oshirish, charchoq sezilganda avtomobilni boshqarmaslik boʻyicha tegishli tavsiyalar berilishi lozimligi ham alohida eʼtirof etildi.

Yigʻilishda ishtirok etganlar sodir etilgan avtohalokatning achinarli oqibatlari xususida xulosalar chiqardilar. Aholi vakillari tomonidan berilgan savollarga toʻliq, hayotiy misollar bilan javoblar berildi.

Charos Arslonova, tuman hokimligining Axborot xizmati rahbari.