XUSUSIY BANDLIK AGENTLIKLARIDA ShARTNOMA ASOSIDA XIZMAT KOʻRSATILADI

Oʻzbekiston Respublikasining “Xususiy bandlik agentliklari toʻgʻrisida”gi Qonuni 2018-yil 16-oktyabrda qabul qilingan. Qonun 34 ta moddadan iborat boʻlib, uning maqsadi xususiy bandlik agentliklarining faoliyati bilan bogʻliq munosabatlarni tartibga solishga qaratilgan.
Xususiy bandlik agentligi ish qidirayotgan shaxslarga ish tanlash va ishga joylashish boʻyicha, ish beruvchilar uchun kadrlar tanlash boʻyicha xizmatlar koʻrsatuvchi, shuningdek, ishga joylashtirish sohasida axborot va maslahat xizmatlari koʻrsatuvchi tijorat tashkilotidir.
Xususiy bandlik agentligi oliy maʼlumotli rahbarni qoʻshib hisoblaganda kamida ikki nafar xodimga ega boʻlishi kerak. Xususiy bandlik agentliklari Oʻzbekiston Respublikasi hududida ish qidirayotgan shaxslarga ish tanlash, ish beruvchilar uchun kadrlar tanlash, Oʻzbekistondan tashqaridagi ishni qidirayotgan shaxslarni ishga joylashtirish, ishga joylashtirish sohasida axborot va maslahat xizmatlari kabilarni amalga oshiradi.
Oʻzbekiston hududida ish qidirayotgan shaxslarga ish tanlash boʻyicha xizmatlar xususiy bandlik agentligi va ish qidirayotgan shaxs oʻrtasida tuzilgan xizmatlar koʻrsatish toʻgʻrisidagi shartnoma asosida koʻrsatiladi.
Mamlakat hududida ish qidirayotgan shaxslarga ish tanlashda ish qidirayotgan shaxslar toʻgʻrisidagi axborotni ish beruvchilar oʻrtasida tarqatish, shu jumladan axborot-kommunikatsiya texnologiyalaridan foydalangan holda tarqatish, ish beruvchilarni izlashni, ish beruvchilar bilan muzokaralar oʻtkazish, ish beruvchilar va ish qidirayotgan shaxslar oʻrtasidagi suhbatga tayyorgarlik koʻrish hamda muzokaralarda, mehnat shartnomalari loyihalarini tayyorlashda ishtirok etish kabilarda ham koʻmak beriladi.
Xususiy bandlik agentligi tomonidan ish qidirayotgan shaxs va ish beruvchi bilan yozma shaklda xizmatlar koʻrsatish toʻgʻrisidagi shartnoma tuziladi. Xususiy bandlik agentliklari tomonidan xizmatlar koʻrsatish toʻgʻrisidagi shartnomada  xizmatlarning mazmuni, xizmatlar koʻrsatish muddatlari, haq toʻlash miqdori va shartlari, taraflarning huquq va majburiyatlari, ularni bajarmaganlik yoki lozim darajada bajarmaganlik uchun javobgarlik, shartnomani bekor qilish tartibi va shartlari kabilar koʻrsatiladi.
Xususiy bandlik agentligi ish qidirayotgan shaxslarga yoki ish beruvchilarga faqat xizmatlar koʻrsatish toʻgʻrisidagi shartnoma asosida xizmatlar koʻrsatadi. Shuningdek, Oʻzbekiston Respublikasi Bandlik va mehnat munosabatlari vazirligining soʻroviga koʻra oʻz faoliyati haqidagi maʼlumotlarni taqdim etishi, xizmatlar koʻrsatish toʻgʻrisidagi shartnomalarni Oʻzbekiston Respublikasi Bandlik va mehnat munosabatlari vazirligining «labor-migration» axborot tizimida real vaqt rejimida roʻyxatdan oʻtkazishi kerak.  

M.Matyusupov, tuman Adliya boʻlimi boshligʻi.