XALQ DARDINI OʻYLAB BELGILANGAN 10 TA USTUVOR YOʻNALISh YuRTMIZNING YaNADA FAROVONLAShIShIGA ASOS BOʻLADI

Qoraqalpogʻiston. Bepoyon kengliklari, choʻl-u qirlari, yashil vodiylari, qamish va yekanlar oʻsib yotgan shoʻrxok koʻllari va... ayni zamonda bu yurt xalqining dil dardiga aylangan Orolqum... Bu – biz sevgan, ardoqlagan zamin – Ona Yurt! Uning bagʻri keng, fidoyi, chehrasi hamisha ochiq, mehmondoʻst, mehnatkash xalqi har birimiz uchun aziz. Qoraqalpogʻistonning ertangi kuni, kelajagi uchun masʼullik tuygʻusi ham ana shu azizlik bilan tutash.
Joriy yilning 2-oktyabr sanasida Qoraqalpogʻiston Respublikasi Joʻqorgʻi Kengesining navbatdan tashqari sakkizinchi sessiyasi yigʻilishini televideniye orqali kuzatarkanman, Qoraqalpoq xalqining dard-u gʻamiga yelka tutmoqqa qodir vatanparvarlargina bu yurtni yanada yuksaltirishlariga amin boʻldim. Ming shukurki, bu zaminda el-u yurtini aziz bilib boshida tutguvchi, shu xalq kelajagi uchun masʼullik tuygʻusi bilan yashaguvchi, elim, yurtim, degan fidoyi xalq farzandlari bisyor.
Odillik va shaffoflik asosida boʻlib oʻtgan sessiya yigʻilishida deputatlar va jamoatchilik vakillari Qoraqalpogʻistonning yangi rahbarini yakdillik bilan sayladilar.
Sessiyada soʻzga chiqqan Prezidentimiz Qoraqalpoq xalqining buyuk shoiri Berdaqning:
Xalqning gʻamini oʻylagan,
Yurt gʻamxoʻri kerak menga, - degan satrlarini keltirarkan, hozirgi murakkab sharoitda rahbar boʻlish oson emasligini, Qoraqalpogʻistonni rivojlantirish boʻyicha boshlangan ishlarni 2-3-marta koʻpaytirib davom ettirilishini taʼkidladi. Joʻqorgʻi  Kengesning yangi saylangan raisi Murat Kamalovning bu kabi keng qamrovli ishlarni sobitqadamlik bilan ado etishiga katta ishonch bildirdi.
Ishonch – katta imkoniyatlar tomon yoʻl, ishonch – inson ilmi, aql-zakovatini charxlab, ezguliklar sari yoʻllaguvchi kuch!
Prezident Qoraqalpogʻistonda oxirgi 4-yil ichida amalga oshirilgan ishlar, barcha sohalar boʻyicha oʻsish va rivojlanish surʼatlariga toʻxtalarkan, yangi rahbar faoliyatining eng muhim yoʻnalishi “Xalqning dardini eshitish va masalalarini hal etish” boʻlishi kerakligini taʼkidladi. Shu bilan birga hududda barcha sohalarni jadal rivojlantirish boʻyicha kelgusi 3-yilga moʻljallangan chora-tadbirlar ishlab chiqilganini maʼlum qildi. Unga koʻra, har bir tumanda 2 tadan faoliyat turi “oʻsish nuqtasi” etib belgilandi. Respublika tumanlarini yanada ravnaq toptirish maqsadida mazkur “oʻsish nuqtalari” boʻyicha tadbirkorlik subʼektlari 3-yil muddatga yer soligʻi, mol-mulk soligʻi, kichik korxonalarning aylanmasidan olinadigan soliq, yakka tartibdagi tadbirkorlarning qatʼiy miqdordagi daromad soligʻidan ozod qilinishini taʼkidladi.
Har bir tuman va shaharni jadal rivojlantirishga kuchli turtki berish, muammolarni tezkor hal etish uchun ularga vazirlar va banklar biriktirilib, kelgusi 3-yilga moʻljallangan oʻnta ustuvor yoʻnalish belgilab berildi. Qoraqalpogʻistonda juda qisqa fursat ichida:
- tumanlar va mahallalarni jadal rivojlantirish;
- aholi bandligini taʼminlash va kambagʻallikni qisqartirish;
- investitsiya loyihalarini amalga oshirish;
- Orol muammosining salbiy taʼsirini yumshatish;
- xizmat koʻrsatish sohasi salohiyatini toʻliq ishga solish;
- agrar sohani rivojlantirish;
- aholini uy-joy bilan taʼminlash;
- ijtimoiy infratuzilmani rivojlantirish;
- ayollarni qoʻllab-quvvatlash;
- jinoyatchilikning oldini olishga alohida eʼtibor qaratish koʻzda tutilmoqda.
Mazkur 10 ta ustuvor yoʻnalish boʻyicha belgilangan vazifalarni 3-yil ichida toʻliq amalga oshirishni taʼminlash, shu asosda Amudaryo tumanini ham jadal rivojlantirishga kuchli turtki berish uchun Oliy Majlis Qonunchilik palatasi spikeri oʻrinbosari OʻzLiDeP fraktsiyasi rahbari, Aktam Haitov va “Agrobank” ATB Boshqaruvi masʼul qilib biriktirildi.
Prezidentimizning mazkur koʻrsatmalari, yoʻl-yoʻriq va tavsiyalari Qoraqalpogʻistondagi barcha tumanlar qatori amudaryoliklar uchun ham yangi imkoniyatlar sari ochilgan oydin yoʻldir. Chunki, tadbirkorlik subʼektlarining yuqorida belgilab qoʻyilgan “oʻsish nuqtalari” boʻyicha 3 yillik soliqlardan, yakka tadbirkorlarning qatʼiy miqdordagi daromad soligʻidan ozod etilishining oʻzi xalqimizga davlatimiz tomonidan koʻrsatilayotgan katta gʻamxoʻrlikdir.
Prezidentimiz deyarli har bir uchrashuv va mamlakat miqyosidagi yigʻilishlarda ayol-qizlarni qoʻllab-quvvatlash masalasiga alohida toʻxtalib oʻtadilar.
Yuqorida belgilangan 10 ta ustuvor yoʻnalishning biri yoshlar va ayollarni qoʻllab-quvvatlashga qaratilgani yanada quvonarli. Chunki, oilada ayol tinch, xotirjam hayotdan koʻngli toʻq boʻlsa, yoshlar kasb-korli, ilmli boʻlsa, jamiyat yanada farovonlashib boraveradi. Muammolar oʻz-oʻzidan kamayadi. Yoshlar va ayollarga eʼtibor nechogʻlik yuqori boʻlsa, oilalar ham barqaror, avlodlar barkamol boʻladi.
Agar eʼtibor berilsa, belgilangan har bir yoʻnalish biri-biri bilan uzviy bogʻliqlikda belgilangan. Unga koʻra, tumanlar va mahallalar jadal rivojlansa, aholi bandligini taʼminlash uchun koʻpdan-koʻp imkoniyatlar yaratiladi. Ish bilan band aholi daromad topadi, bu bilan kambagʻallikni qisqartirish sari qadam qoʻyiladi. Oʻz daromad manbaiga ega boʻlgan aholining uy-joy bilan taʼminlanishi esa infratuzilmaning rivojlanishiga yetarli turtki boʻladi.
Xullas, 10 ta ustuvor yoʻnalishning amaliy ijrosini taʼminlash Qoraqalpogʻistonning, shu jumladan, tumanimizning qiyofasini ham tubdan oʻzgartirib yuborishi tabiiy.
- Toshkentda nima yangilik boʻlsa, Nukusga kelishi kerak, - dedilar Prezidentimiz. – Yangicha ishlamasak, zamon qabul qilmaydi.
Darvoqe, yangicha ishlash, yangicha  fikrlash orqali biz oʻzimiz uchun aziz boʻlgan ona Yurtimizni yanada goʻzal, obod va farovon qilishga qodir fidoyi, oʻzaro ahil va jips xalq ekanligimizni amalda namoyon qilamiz. Shuning uchun ham Prezidentimiz Qoraqalpogʻistonni yanada rivojlantirishda, har bir tumandagi koʻchalarni, mahallalarni zamonaviy shaklga keltirish va odamlarga qulaylik yaratish lozimligini, bu ishlarni amalga oshirishda chin vatanparvar, mard va matonatli, jasoratli el ogʻalariga katta ishonch bildirdi. Biz sevgan ona Yurt – Qoraqalpoq zaminida ana shunday mard va matonatli, jasoratli insonlar yashab mehnat qiladilar va ular bu Vatanda betakror oʻzgarishlar yaratishga qodirlar.

Robiya YOʻLDOShEVA.