Ajdodlar dahosiga ehtirom

Har bir insonning oʻziga yarasha qadr-qimmati, hurmat-eʼtibori bor. Inson qadri uning tashqi koʻrinishi yoki moddiy boyligiga qarab emas, balki ichki dunyosi, maʼnaviy boyligiga qarab baholanadi. Maʼnaviyat insonga ona suti, ota namunasi, ajdodlar oʻgiti bilan birga singadi. Agar inson atrofidagi barcha odamlarning qadr-qimmatini hurmat qilsa, oʻzgalar ham uning qadr-qimmatini hurmat qiladi.

Mehr-oqibat, muruvvat koʻrsatish olijanob insonlarga xos xislatdir. Shunday ekan, keling, azizlar, bir-birimizning qadrimizga yetaylik. Vatanimiz yuzini yorugʻ qilib turgan buyuk ajdodlarimiz kabi oqil va dono boʻlaylik. Baxt-saodatga erishish orzusida, oʻzbek xalqining erkinligini, ozodligini taʼminlab, uning qadr-qimmatini yuksaltirish yoʻlida jonini fido qilgan buyuk ajdodlar avlodi ekanligimiz biz uchun sharaf. Ajdodlar qalbidagi ushalmas orzu mustaqillikni qaror toptirib, xalqni taraqqiyot yoʻli tomon boshlayotgan Yurtboshimiz va davlat ravnaqi yoʻlida fidoyilikqilayotgan insonlarning xizmatlari beqiyosdir. Oʻz ichiga olam-olam maʼnolarni qamragan, mazmun-mohiyati keng ulugʻvor soʻzlari bilan Vatan tarixini, ajdodlar tarixini bizga yetkazib berayotgan atoqli adiblarimizning chiroyli soʻzlari qalbimizga shunday hayajonli tuygʻularni singdiradiki, buni taʼriflashga til ojiz. Biz ana shu tuygʻular ila ona Vatan, hurlik va ozodlik qadrini, fidoyi xalqimiz qadr-qimmatini his etamiz.

Tarixiy xotiramizni mustahkamlashimiz, oʻzligimizni chuqur anglashimiz uchun Vatanimizda buyuk bobokalonlarimiz timsoliga haykallar, muzeylar, milliy bogʻlar yaratilgan. Butunligicha saqlanib qolgan tarixiy inshootlar - madrasa-yu maqbaralar yangicha qiyofaga ega boʻlib, toʻliq qayta taʼmirlangani bu – ajdodlar zakosiga ehtiromdir. Mustaqillik maydonida mustaqillik va ezgulik monumenti qad koʻtargan. Bu yodgorlik ikki qismdan – Oʻzbekiston tasviri tushirilgan yer shari va suyukli farzandini bagʻriga bosib, unga mehr toʻla nigohi bilan termulib turgan baxtiyor ona haykallaridan iborat. Bu majmua ham Vatan, ham inson qadrini ulugʻlovchi buyuk meʼmoriy obidadir. Xotira maydonidagi Motamsaro ona haykali oʻz farzandiga intizor boʻlib oʻtgan ming-minglab munis va moʻʼtabar onalarning timsoli. Ushbu ulugʻ zotning mungli va maʼyus yuzlariga boqib, bu hayotning naqadar goʻzalligiga, inson umrining aziz va betakrorligiga imon keltirasiz. Xotira maydonidagi naqshinkor ustunli ayvonlarga oʻrnatilgan poʻlat kitob sahifalarida ikkinchi jahon urushi janggohlarida mardlarcha halok boʻlgan 450 ming nafar yurtdoshimizning ismi sharifi zarhal harflar bilan yozib qoʻyilgan. Bu yerdan tun-u kun ziyoratchilarning qadami arimaydi. Har bir ziyoratchi avvalo bu yerdagi Motamsaro ona timsoliga taʼzim qilib, poyiga gul qoʻyadi, urush va mehnat faxriylari, Vatan, himoyasi yoʻlida qurbon boʻlgan doʻstlari xotirasiga hurmat bajo keltiradilar.

Har yili 9-may – Xotira va qadrlash kuni bizning yurtimizda ulugʻ va qutlugʻ sana. Zero, tarixiy xotirasi kuchli boʻlgan xalq kelajak yoʻlida adashmaydi, hech kimga qaram boʻlmaydi.

Umida ERDOShEVA,

22-sonli maktabning 6-sinf oʻquvchisi, tanlov gʻolibi.