TUMANIMIZNING IKKI NAFAR OʻQITUVChISI "OʻZBEKISTON XALQ TAʼLIMI AʼLOChISI" KOʻKRAK NIShONI BILAN TAQDIRLANDI

Biz kim boʻlishimizdan, necha yoshda boʻl boʻlishimizdan qatʼiy nazar, oʻzimizni doimo qarzdorday his qiladigan, koʻnglimiz ardogʻida yashaydigan insonlarimiz bor. Ular ota-onamizday aziz va moʻʼtabar boʻlgan insonlar – ustozlarimizdir.

Har bir inson kamolotida ustoz-murabbiylarning xizmatlari beqiyosdir. Shu boisdan ham mamlakatimizda oʻqituvchilarga yuksak hurmat-ehtirom koʻrsatiladi, moddiy qoʻllab-quvvatlanib, mavqei yuksaltirilmoqda.

Dunyo imoratlari ichida eng ulugʻi maktab, kasblarning eng sharaflisi muallimlik, degan soʻzni koʻp eshitamiz. Biroq shunisi aniqki, muallim oʻquvchilarni oʻz farzandlariday yaxshi koʻrib, sidqidildan ularni savodli qilishga intilmasa, koʻngliga yoʻl topib, ilm dunyosi sari yetaklay olmasa, kasb sharafiga erisha olmaydi.

26-sonli maktabni tugatgan Akbarali Shomurodov oʻqituvchilar oilasida tugʻilib voyaga yetganligi uchun mashaqqatlardan choʻchimay oʻqituvchi boʻlishga ahd qildi. Shu niyatda Nukus Davlat Pedagogika institutini tugatdi.

Inson hayotida shunday lahzalar boʻladiki, taassurotlari butun umringga tatiydi. 2000-yilning 2-sentyabri Akbaralining hayotida ana shunday lahzalarni hadya etdi. Oliygohni tugatib qaytgan yosh muallim oʻsha kuni oʻzi taʼlim olgan 26-sonli maktabda ilk darsini oʻtgan edi.

Akbarali oradan vaqtlar oʻtib, ancha tajriba toʻplagan, oilasida ustozlik maqomiga erishish mashaqqatlari haqida koʻp nasihatlar eshitgan boʻlsa-da, u har bir darsiga xuddi imtihonga kirgandek tayyorgarlik koʻrib, bolalarga oʻrgatadigan mavzusi yuzasidan kengroq maʼlumotlar toʻplab kiradi. Ehtimol shundandir, oʻquvchilari orasida taʼlim bergan faniga qiziquvchilar koʻpaydi, iqtidorli oʻquvchilar bilan alohida shugʻullanib, salohiyatini yuksaltirishga intildi. Natijada koʻp oʻtmay tajribali ustozlari qatorida uning ham nomi tilga olinadigan boʻldi.

Akbarali Shomurodov 2000-2009-yillarda oʻqituvchi, 2009-2011-yillarda 26-sonli maktab direktorining oʻquv ishlari boʻyicha oʻrinbosari sifatida faoliyat yuritdi. U ayni kunda ham oʻzi tugʻilib oʻsgan mahallasi yoshlariga mehnat-informatika fanidan dars bermoqda.

Uning xalq taʼlimi sohasiga qoʻshayotgan munosib hissasi eʼtiborga  olinib, “Oʻzbekiston Xalq taʼlimi aʼlochisi” koʻkrak nishoni bilan taqdirlandi. Bu xushxabar uni, oila aʼzolarinigina emas, butun maktab oʻqituvchilar jamoasini juda quvontirdi. Boisi, jamoaning koʻpchilik aʼzolari unga taʼlim bergan ustozlardir.

Shunday sharafga ega boʻlgan oʻqituvchilardan yana biri 84-sonli umumiy oʻrta taʼlim maktabida psixolog vazifasida ishlayotgan yosh, intiluvchan va fidoyi oʻqituvchi Nigora Saparovadir. U 2009-yil Nukus Davlat Pedagogika institutining pedagogika-psixologiya fakultetini muvaffaqiyatli tugatib chiqdi.

U oʻzi tanlagan kasbi boʻyicha mehnat faoliyatini 2009  yilda Xoʻjayli tumanidagi 60-sonli maktabda boshladi. 2010-2013-yillarda Xoʻjayli tumani Xalq taʼlimi muassasalari faoliyatini metodik taʼminlash va tashkil etish boʻlimida psixolog, 2013-2016-yillarda tumanimizdagi 8-sonli ixtisoslashtirilgan maktabda, 2016-2019-yillarda 20-sonli maktabda psixolog boʻlib ishladi. 2019-yildan beri esa 84-sonli maktabda oʻz faoliyatini davom ettirmoqda.

Nigora yosh boʻlsa-da, bolalar bilan ishlashishda, ularning koʻngliga yoʻl topib, sidqidildan  taʼlim olishga yoʻnaltirishda oʻziga xos qobiliyatga ega. Oʻquvchilar orasida turli muhim sanalar sharafiga tadbirlar tashkil etib, eʼtiborini qozona oladi, kasblar haqida, elimizning  obroʻ-eʼtiborli kishilari ishtirokida tashkillashtirgan suhbatlari, odob-axloq mavzusidagi tadbirlari oʻquvchilarning oʻz kelajagini toʻgʻri tanlashlariga koʻmak berayotir.

Intiluvchan pedagoglar – Akbarali Shomurodov va Nigora Saparovalarni Oʻzbekiston Xalq taʼlimi aʼlochisi koʻkrak nishoni bilan taqdirlanganligi bilan qizgʻin qutlab, kelgusi ishlarida ham yutuqlar tilab qolamiz.

Oygul RAJABOVA.