«DUNYoDA ILMDAN BOShQA NAJOT YOʻQ VA BOʻLMAGAY»

Sharq donishmandlari aytganidek, “Eng katta boylik – bu aql-zakovat va ilm, eng katta meros – bu yaxshi tarbiya, eng katta qashshoqlik – bu bilimsizlikdir”. Shu sababli inson uchun zamonaviy bilimlarni oʻzlashtirish, chinakam maʼrifat va yuksak madaniyat egasi boʻlish, uzluksiz hayotiy ehtiyojga aylangan. Ilm-maʼrifat eng avvalo oilada, keyinchalik maktabda beriladi. Shuning uchun ham har bir shaxs kamolotida maktab alohida oʻringa ega.

Amudaryo tumani Xalq taʼlimi boʻlimiga qarashli 87 ta umumtaʼlim maktablarida yangi oʻquv yiliga tayyorgarlik ishlari oʻz vaqtida qizgʻin olib borildi.

Maʼlumki, tumanimizda pandemiya sharoitini hisobga olib, maktablarda yangi oʻquv yili gibrid tarzda tashkil etilishi hamda maktablarning tayyorgarlik darajasidan kelib chiqib, bosqichma-bosqich ochilishi belgilandi. 2020-2021 oʻquv yilining birinchi kuni 14-sentyabr etib belgilangan boʻlsa-da, maktablar sanitariya-gigiyena talablariga javob berishiga qarab, sanitariya epidemiologiya va osoyishtalik markazi xulosalariga koʻra xalq deputatlari mahalliy Kengashlarning qarori asosida ochilib, anʼanaviy oʻqish jarayonlarini boshlamoqda.

Dastlab, vaziyatdan kelib chiqib, tumandagi xavfsiz, yashil hududlardagi, yaʼni A.Temur ovulida joylashgan 4-sonli maktab, Qipchoq ShFYda joylashgan 11-sonli maktab, Tor yop mahallasida joylashgan 21-sonli maktab va Namuna mahallasida joylashgan 52-sonli maktabda 7-sentyabr kunidan tajriba-sinov tariqasida oʻqish jarayoni anʼanaviy tarzda boshlandi. Qolgan maktablarning barchasida 14-sentyabrdan 30-sentyabrgacha reja asosida bosqichma-bosqich oʻz faoliyatini anʼanaviy tarzda boshlash rejalashtirildi.

Shuningdek, Xalq taʼlimi vazirligi tomonidan 2020-2021 oʻquv yilining I choragi uchun umumtaʼlim maktablarining pandemiya sharoitlariga moslashtirilgan namunaviy dars jadvali ishlab chiqildi. Mazkur dars jadvali asosida umumtaʼlim maktablarining navbatliligi (smenasi), oʻquvchi oʻrni, sinflar va oʻqituvchilar sonidan kelib chiqib, ushbu namunaviy jadvalga moslashtirilgan holda dars jadvalini tuzish tavsiya etildi. Oʻquvchilarning sogʻligini himoyalash, ijtimoiy masofani saqlagan holda ortiqcha muloqot qilishlarining oldini olish maqsadida jismoniy tarbiya, chaqiriqqa qadar boshlangʻich harbiy tayyorgarlik,  musiqa madaniyati, tasviriy sanʼat va chizmachilik, texnologiya hamda tarbiya fanlari oʻquv yili boshida vaqtinchalik oʻtilishi tavsiya etilmadi, ushbu fanlar masofaviy taʼlim shaklidagi televizion darslar orqali oʻzlashtirib boriladigan boʻldi.

Hozirgi vaqtda tumanda Xalq taʼlimi sohasida 4206 nafar oliy maʼlumotli oʻqituvchi faoliyat olib bormoqda. Kadrlar bilan taʼminlanganlik 99,9 foizni tashkil etadi. Bugungi kunda oʻrta maxsus bilimga ega kadrlarning oʻrnini oliy maʼlumotli mutaxassislar bilan toʻldirish ishlari olib borilmoqda.

Albatta, yurtimizda karantin tadbirlari davom etayotganiga qaramasdan davlatimiz rahbari tomonidan taʼlim sohasi rivojiga ham alohida eʼtibor qaratilmoqda. Bu eʼtibor va gʻamxoʻrlik kelajagimiz boʻlgan oʻquvchi-yoshlarimizni bilimli, har tomonlama yetuk, komil inson qilib tarbiyalashga xizmat qiladi. Shu nuqtai nazardan, qanday sharoit boʻlsa ham soha xodimlari yangi oʻquv yilida fidoyilik namunasini koʻrsatadi.

Xalq taʼlimi tizimida murakkab va oʻzgaruvchan sharoitda barcha oʻqituvchi va murabbiylarning yosh avlodga bilim berishdek masʼuliyatli ishida kuch-gʻayrat tilayman. Kelajak yaratuvchilari boʻlgan bolalarimizga taʼlim-tarbiya berishdek sharafli ishlaringizda muvaffaqiyatlar hamisha yor boʻlsin!

R.MatqurbOnov, tuman Xalq taʼlimi boʻlimi mudiri.