2130 NAFAR BOLALARGA MODDIY YoRDAM KOʻRSATILDI
Oʻzbekiston Respublikasi Prezidentining 2020-yil 30-iyuldagi “Koronavirus pandemiyasi davrida ijtimoiy himoyaga va yordamga muhtoj aholi qatlamlarini moddiy qoʻllab-quvvatlashga doir qoʻshimcha chora-tadbirlar toʻgʻrisida”gi Farmoniga muvofiq barcha hududlarda kam taʼminlangan va ijtimoiy himoyaga muhtoj kishilarga keng koʻlamli ijtimoiy yordam koʻrsatildi.
“Saxovat va koʻmak” umumxalq harakatini davom ettirish, moddiy yordam va koʻmakka muhtoj oilalarning bolalarini qishki kiyim-bosh toʻplamlari, maktab formasi va oʻquv qurollari bilan taʼminlash maqsadidagi Prezidentimizning “Aholini ijtimoiy qoʻllab-quvvatlashga qaratilgan qoʻshimcha chora-tadbirlar toʻgʻrisida”gi Qarori qabul qilindi.
Joriy yilning 26-avgustida imzolangan mazkur Qarorda shu yilning sentyabr oyidan aholining moddiy yordam va koʻmakka muhtoj oilalar roʻyxati, yaʼni “temir daftar”ga kiritilgan oilalar, boquvchisini yoʻqotgan, nogironligi boʻlgan oilalarning har bir 16 yoshga toʻlmagan bolalari uchun 500 ming soʻm pul miqdoridagi bir martalik moddiy yordam koʻrsatilishi belgilandi. Ushbu Qaror ijrosini taʼminlash borasida tumanimizda tizimli ishlar amalga oshirilmoqda.
Qarorga asosan tumanda ehtiyojmand oilalar roʻyxati – “temir daftar”ga kiritilgan hamda boquvchisini yoʻqotgan, kam taʼminlangan oilalar bolalari va bolalikdan nogironligi boʻlgan 16 yoshga toʻlmagan bolalarga 500 ming soʻmdan bir martalik moddiy yordam pullarini berish uchun roʻyxat, toʻlov vedomostlari shakllantirildi. Ushbu roʻyxat asosida “Xalq banki” tuman filiali tomonidan tuman boʻyicha jami 2130 nafar 16 yoshga toʻlmagan bolalarga bir martalik moddiy yordam pullari topshirildi. Ulardan 1491 nafarini boquvchisini yoʻqotgan oilalarning farzandlari, 639 nafarini nogironligi boʻlgan bolalar tashkil etdi.
Shu oʻrinda maʼlumot tariqasida aytish joizki, agar nogiron bolasi mavjud boʻlgan oila har oyda 466,6 ming miqdorida nogironlik nafaqasini olgan boʻlsa, joriy yilning sentyabr oyida ushbu oila qoʻshimcha 500 ming soʻm pulni oladi. Prezident Farmoni bilan 2020-yil 1-sentyabrdan boshlab, bolalikdan nogironligi sababli beriladigan eng kam nafaqa 10 foizga oshirilib, 513 ming soʻm miqdorida belgilanganligini hisobga olib, ushbu oila faqat sentyabr oyida 1 mln. 13 ming soʻm pul oladi.
“Temir daftar” roʻyxatiga kiritilgan oilalarda yashovchi bolalarga nisbatan bu roʻyxatlar tumandagi sektor rahbarlari tomonidan mahalla fuqarolar yigʻinlari xodimlari bilan birgalikda shakllantirilib, xalq deputatlari tuman Kengashi tomonidan tasdiqlangan. Ushbu roʻyxat asosida tumanimizdagi 1-sektor hududidagi 552 nafar, 2-sektor hududidagi 642 nafar, 3-sektor hududidagi 581 nafar, 4-sektor hududidagi 355 nafar 16 yoshga toʻlmagan ehtiyojmand, boquvchisini yoʻqotgan, kam taʼminlangan oilalar farzandlari hamda nogironligi boʻlgan jami 2130 nafar bolalarga umumiy qiymati 1 mlrd. 65 mln. soʻm miqdoridagi bir martalik moddiy yordam pullari topshirildi.
Bu kabi mehr-shavqat, saxovat va xayriya ishlaridan koʻngillari togʻday koʻtarilgan yurtdoshlarimiz ogʻir kunlarda oʻzlariga qaratilayotgan yuksak eʼtibor hamda muruvvat uchun hukumatimizga, barcha mutasaddi rahbarlarga minnatdorchilik izhor etdilar.
Charos Arslonova, tuman hokimligining Axborot xizmati rahbari.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
