Amudaryolik yoshlarga YoI Qoraqalpogʻiston Kengashining minnatdorchilik xati berildi

Xalqaro bolalarni himoya qilish kuni butun dunyo bolalari uchun eng begʻubor va quvonchli bayram hisoblanadi. Albatta, bola bu hayot mazmuni, avlod davomchisidir. Bola tabassumi begʻubor, u insonlar qalbida hayotga, yashashga boʻlgan zavqni oshiradi.
Mamlakatimizda ushbu bayram har yili katta tantana bilan nishonlanadi. Sababi Oʻzbekiston – bolajon yurt, xalqimiz esa azaldan bolajon xalq. Mustaqillikning dastlabki yillarida Oʻzbekiston qoʻshilgan ilk xalqaro shartnomalar qatorida Inson huquqlari umumjahon deklaratsiyasidan soʻng, aynan “Bola huquqlari toʻgʻrisida” konventsiya turishi ham buning yaqqol isbotidir.

Taʼkidlash kerakki, yurtimizda ertamiz kelajagi boʻlgan farzandlarimizning taʼlim-tarbiya olishlari uchun keng imkoniyat, shart-sharoitlar yaratilib, alohida eʼtibor qaratilmoqda. Jajji bolajonlarimizni maktab yoshiga qadar boʻlgan davrda ilk taʼlim-tarbiya maskanlari – maktabgacha taʼlim muassasalarini tashkil qilish, malakali, yuksak salohiyatli tarbiyachilar qoʻlida bolajonlarimizga boshlangʻich bilim, koʻnikma va malakalarini hosil qilishlari uchun keng imkoniyatlar yaratilmoqda.

Shuningdek, bugungi kunda maktab oʻquvchilari orasidan qobiliyatli, iqtidorli oʻquvchilarni ajratib olish, ulardagi ijodkorlik, tashabbuskorlik xususiyatlarini yanada rivojlantirishga, erishgan yutuqlari uchun ragʻbatlantirib, oʻz ustida yanada ishlashga undash borasida samarali ishlar qilinmoqda.

Xususan, 1-iyun Xalqaro bolalarni himoya qilish kuni munosabati bilan amudaryolik bir qancha iqtidorli yoshlar Oʻzbekiston Yoshlar ittifoqi Qoraqalpogʻiston Pespublikasi Kengashi raisi A.Daniyarov nomidan “Minnatdorchilik xati” bilan ragʻbatlantirildi. Tuman XTBga qarashli 86-sonli umumtaʼlim maktabi oʻquvchisi, Oʻzbekiston Yoshlar ittifoqi tuman Kengashi sardori Qunduzbek Yoʻldoshev hamda 31-sonli maktabning 6-sinf oʻquvchisi, kamalak sardori Azizbek Aminboyev oʻz sardorlik faoliyatlarini namunali olib borganliklari, koʻplab koʻrik-tanlovlarda faol ishtirok etib faxrli oʻrinlarni egallaganliklari, tengdoshlariga oʻrnak boʻlganliklari uchun ragʻbatga loyiq deb topildilar. Tashabbuskor yoshlar bayram arafasida Oʻzbekiston Yoshlar ittifoqi tuman Kengashi tomonidan mazkur mukofot bilan taqdirlandilar.

Shahnoza Xoʻjamurodova,
31-sonli maktab Yoshlar ittifoqi yetakchisi.