“Saxovat va koʻmak” umumxalq harakati doirasida ehtiyojmand oilalarga koʻmak berilmoqda

Mamlakatimizda koronavirus epidemiyasiga qarshi oʻz vaqtida koʻrilgan chora-tadbirlar natijasida koʻplab hududlar bu xavfdan saqlab qolindi. Shunga qaramay, aksariyat viloyat va tumanlarda korxonalar oʻz ishini toʻxtatgan yoki toʻliq quvvat bilan ishlamayapti.

Taʼkidlash kerakki, butun dunyoda boʻlgani kabi bu murakkab jarayon yurtimizni ham chetlab oʻtayotgani yoʻq. Shunday vaziyatda aholining ehtiyojmand qatlamini qoʻllab-quvvatlash maqsadida Prezidentimiz ham oʻzbek xalqining tarixiy va maʼnaviy qadriyatlarini, mehr-saxovat, oqibat va himmat kabi yuksak fazilatlarini inobatga olgan holda, “Saxovat va koʻmak” umumxalq harakatini yoʻlga qoʻyish tashabbusini ilgari surdi.

“Saxovat va koʻmak” umumxalq harakati doirasida qilinayotgan ishlar butun mamlakatimizda boʻlgani kabi tumanimizda ham qizgʻin tus olmoqda. Xususan, 4-sektor hududida yashovchi kam taʼminlangan oilalarga "Saxovat va koʻmak" umumxalq harakati doirasida koʻmak berish maqsadida tumanda faoliyat yuritib kelayotgan 57 ta tadbirkorlik subʼektlari, korxona va tashkilotlar biriktirildi. Ayni paytda kam taʼminlangan oilalarga oziq-ovqat mahsulotlarini tarqatish, naqd pul koʻrinishida va band boʻlmagan insonlarni doimiy ish oʻrinlariga joylashtirish orqali amaliy yordam koʻrsatib kelinmoqda. Xususan, hozirga qadar sektor hududidagi kam taʼminlangan oilalarga jami 31 mln. soʻmlik moddiy yordam koʻrsatilgan boʻlib, shundan 171 ta oilaga 30 mln. soʻmlik oziq-ovqat mahsulotlari yetkazildi. 6 ta oilaga 1 mln. soʻmlik naqd pul koʻrinishida yordam berildi. Shuningdek, kam taʼminlangan oilalarda yashovchi 24 nafar fuqaro mavsumiy ishlarga joylashtirildi va ularning har biriga 751 ming soʻmlik ish xaqi olishlarga imkoniyat yaratib berildi.

Sektor hududidagi pandemiyaga qarshi kurashishda faol qatnashib, ehtiyojmand oilalarga begʻaraz yordam koʻrsatib kelayotgan tadbirkorlardan Jumaboy Avezmetov va Azim Avezmetovlar tomonidan Chordara mahallasida yashovchi 20 nafar kam taʼminlangan ehtiyojmand oilaga jami 8 mln. soʻmlik oziq-ovqat mahsulotlari yetkazib berildi. Shuningdek, tumanda faoliyat yuritib kelayotgan  “Yulduz-Qunduz” koʻp tarmoqli xususiy firmasi ham Qangli ovul fuqarolar yigʻinidagi ehtiyojmand 8 ta oilalarning har biriga 200 ming soʻmlik oziq-ovqat mahsulotlarini tarqatib, muhtojlarga yordam koʻrsatdi.

Kun sayin ortib borayotgan bu kabi xayrli tadbirlar Qilichboy ovulidagi Ayoqchi mahallasida ham ish amalga oshirildi.

Tumanimizdagi saxovatpesha tadbirkorlardan biri yakka tadbirkor Oygul Boltaboyeva Ayoqchi mahallasidagi kam taʼminlangan, ijtimoiy himoyaga muhtoj 24 ta xonadonga saxovat va koʻmak qoʻlini choʻzdi. Tadbirkor xayrli tadbir doirasida xonadonlarga yogʻ, tuz, kartoshka, sabzi, karam, piyoz kabi 6 xildagi oziq-ovqat mahsulotlarini tarqatdi. Saxovatdan bahramand boʻlgan oilalar bundan juda mamnun boʻldilar va minnatdorlik izhor etdilar. Tadbirkor Oygul Boltaboyeva muhtojlarga muruvvat koʻrsatib, ularning ogʻirini yengil qildi.

Shuningdek, Mangʻit chegara qoʻriqlash vzvodi va Ayoqchi chegara qoʻriqlash vzvodi harbiylari ham xuddi shunday xayrli ishga qoʻl urdilar.

Mazkur vzvodlar komandirlari va oʻrinbosarlari chegara oldi hududida yashovchi kam taʼminlangan xonadonlar holidan xabar olib, moddiy koʻmak berdilar. Ular 13 turdagi birlamchi oziq-ovqat mahsulotlari, koronavirusdan himoyalanish uchun antiseptik vositalarni tarqatib, koʻpchilikning duolarini oldilar. Yurtimizda tarqalgan koronavirus pandemiyasi tufayli oʻrnatilgan karantin talablariga koʻra, uyda oʻtirgan, moddiy yordamga muhtoj boʻlib qolgan oilalarga xayr-saxovatni yetkazishda ularga Qilichboy ovuli hamda Durunki mahallasi raislari Bahrom Qodirov va Shuhrat Jumaniyozovlar yaqindan yordam berdilar.

Karantin davrida tumandagi ehtiyojmand oilalarga koʻmak berib kelayotgan “Amudaryo tex” xorijiy korxonasi tomonidan navbatdagi xayriya ishlari amalga oshirildi. Mangʻit shahridagi Olmazor, Gulzor, Navoiy, Beruniy va Oybek nomli mahallalarda amalga oshirilgan xayriya tadbirlari davomida hududda yashovchi 96 ta kam taʼminlangan, muhtoj oilalarning har biriga 135 ming soʻmlik, jami 12 mln. 960 ming soʻmlik oziq-ovqat mahsulotlari tarqatilib, muruvvat koʻrsatildi. Tadbirda qatnashgan korxona direktori Bozorboy Safarboyev, direktor oʻrinbosari Omonboy Yusupovlar ushbu oilalarda yashovchi vaqtincha ishsizlarga korxonadagi boʻsh ishchi oʻrinlar haqida ham maʼlumotlar berib oʻtdilar.  Tumanda “Saxovat va koʻmak” umumxalq harakati doirasidagi tadbirlar yanada keng tus olib, davom etmoqda. 

Charos Arslonova, tuman hokimligining Axborot xizmati.