Tumanda karantin qoidalariga amal qilinishi boʻyicha nazorat oʻtkazilmoqda

Mamlakatimizda koronavirus pandemiyasi sababli joriy qilingan karantin davrida qatʼiy cheklovlar, chora-tadbirlar oʻrnatildi. Qatʼiy karantin oʻrnatilgan dastlabki kunlarda ommaviy axborot vositalari, internet tarmoqlari orqali aholiga batafsil tushunchalar berildi. Shu barobarida bunday sharoitda karantinga olingan, ogʻir ahvolga tushib qolgan va ehtiyojmand oilalarning ogʻirini yengil qilishga koʻplab saxovatpesha tadbirkorlar, masʼul mutasaddilar jiddiy eʼtibor qaratishdi.
Hozirgi sinovli kunlarda savob amallar qilinishi qatorida, afsuski, yurtimizda joriy qilingan karantin qoidalarini buzayotganlar, karantin tartibiga amal qilmayotganlar ham uchrab turibdi. Albatta, bunday holatlar uchun qatʼiy javobgarlik belgilangan boʻlib, shunga muvofiq tartibni buzgan fuqarolarga nisbatan jazo choralari qoʻllanila boshladi.

Koronavirus panemiyasiga qarshi kurashish ketayotgan ayni davrda belgilangan karantin qoidalari buzilishining oldini olish maqsadida tuman Ichki ishlar boʻlimi, yoʻl harakati xavfsizligi guruhi, tuman Davlat soliq idorasi hamda Oʻzbekiston Pespublikasi Milliy gvardiyasi Qoraqalpogʻiston Pespublikasi Qoʻriqlash boshqarmasiga qarashli 1-Alohida otryadi  muntazam ravishda aholi oʻrtasida karantin qoidalariga amal qilinishiga doir targʻibot ishlarini amalga oshirib kelmoqdalar. Targʻibot tadbirlarida fuqarolarga karantin tartiblariga amal qilish zarurligi, karantin qoidalarini buzganlik uchun belgilangan javobgarlik tartibi tushuntirilib, bu kabi holatlarni yuzaga keltirayotgan fuqarolarga ogohlantirishlar berilmoqda.
Shu oʻrinda aytish joizki, Oʻzbekistonga koronavirus kirib kelishi munosabati bilan karantin qoidalarini mensimaslik yoki uni buzganlik uchun koʻriladigan choralar qatʼiylashtirildi. Davlatimizda “Epidemiyaga qarshi kurash qoidalarini buzganda javobgarlik kuchayishi toʻgʻrisida” qonun joriy etildi. Qonunga koʻra karantin qoidalarini buzganlik uchun jazo kuchaytirildi va jarimalar miqdori bir necha barobarga oshirildi.

Shuningdek, fuqarolarning sodir etgan xatti-harakati natijasida kelib chiqqan va kelib chiqishi mumkin boʻlgan oqibatlarning ogʻirligiga qarab, qonunchilikda bunday qilmishlar uchun maʼmuriy va jinoiy javobgarlik choralari belgilandi.

Xususan, agar shaxsning karantinli va inson uchun xavfli boʻlgan boshqa yuqumli kasalliklar paydo boʻlishi hamda tarqalishi sharoitida vakolatli organning maxsus talablariga zid ravishda jamoat joylarida niqobsiz yurganligi Maʼmuriy javobgarlik toʻgʻrisidagi kodeksiga asosan bazaviy hisoblash miqdorining besh baravarigacha miqdorda jarima (1 mln. 115 ming soʻm) solishga sabab boʻladi. Inobatga olish kerakki, fuqarolarning tibbiyot niqoblaridan foydalanish qoidalariga rioya qilmasligi ham mazkur normaga asosan javobgarlikni keltirib chiqaradi.

Tumanimizda olib borilayotgan targʻibot tadbirlarida insonlar jamoat joylarida niqobsiz yurmaslikka, yosh bolalarni koʻchaga olib chiqmaslikka, zarurat boʻlmaganda koʻchaga chiqmaslikka, gavjumlashmaslikka chaqirilmoqda.

Achinarlisi shuki, tumanimizda karantin qoidalari va sanitariya cheklovlariga rioya qilish yuzasidan tushuntirish ishlari olib borilishiga qaramasdan, hamon qoidabuzarlik holatlari kuzatilmoqda.

Bunday holatlarni bartaraf qilish va oldini olish yuzasidan amalga oshirilayotgan targʻibot tadbirlari davomida koʻchada, bozor hududida niqobsiz yurgan, avtoulovlarda odamlar tashiyotgan, karantin qoidalarini buzib, oʻzboshimchalik bilan doʻkonlarini ochib, savdo qilayotgan fuqarolarga ogohlantirishlar berildi. Tadbirkorlar tomonidan ishlatilayotgan obektlar vaqtinchalik yopib qoʻyildi.

Shu oʻrinda maʼlumot tariqasida aytish joizki, karantin tadbirlari eʼlon qilingan vaqtdan bugungi kunga qadar respublikamiz boʻyicha karantin qoidalariga amal qilmaslik bilan bogʻliq jami – 22 286 ta holat aniqlangan. Shundan viloyatlar kesimida Qoraqalpogʻiston Respublikasiga tegishli qoidabuzarliklar 784 ta holatni tashkil qiladi.

Koronavirus tarqalishining oldini olishning eng muhim sharti karantin qoidalariga qatʼiy va istisnolarsiz rioya etishdir. Aziz yurtdoshlar, barcha belgilangan qoida va cheklovlarga tartibli ravishda amal qilinib, tegishli tashkilotlar talablari qatʼiy bajarilsagina, butun dunyoda tarqalayotgan ushbu virusga qarshi birgalikdagi, hamjihatlikdagi kurashimiz samara beradi. Barchangizni shunga chaqiramiz.

Charos Arslonova, tuman hokimligining Axborot xizmati rahbari.