Noanʼanaviy usulda tashkil etilgan ochiq oʻquv mashgʻulotini tahlilchilar yuqori baholashdi

Mamlakatimizdagi barcha umumtaʼlim muassasalarida boʻlgani kabi tumanimiz maktablarida ham oʻquvchi-yoshlarga zamonaviy talablar asosida taʼlim-tarbiya berishga, darslarni yangi pedagogik texnologiyalar, axborot kommunikatsion texnologiyalari vositasida oʻtishga alohida eʼtibor qaratilmoqda.

Ayniqsa, chet tillarni  oʻqitish samaradorligini oshirishga, yoshlarning oʻz ona tilidan tashqari ingliz, rus tillarida bemalol muloqot qila olishiga ushbu tillardagi mavjud badiiy, ilmiy-ommabap asarlarni mutolaa qilishlariga erishish – bugungi kunning dolzarb vazifalaridandir. Axir xalqimiz til bilgan – el biladi, deb bejiz aytmagan.

Tumanimizdagi 55-sonli maktabda ham bu borada ibratli ishlar amalga oshirilayapti. Ingliz tili oʻqituvchilari oʻz ustida ijodiy ishlab, noanʼanaviy usullardan foydalangan holda mashgʻulotlar olib borib, oʻquvchilarni til oʻrganishga yanada qiziqtirishga harakat qilishmoqda.

Shu yil 11-mart kuni maktabning ingliz tili oʻqituvchisi Muhayyo Toirova 5-“A” sinf uchun “Dangeroyc anumalc” mavzusida noanʼanaviy ochiq dars oʻtdi. Tuman Xalq taʼlimi boʻlimi ingliz tili uslubchisi E.Abdullayev, maktab direktorining oʻquv ishlar boʻyicha oʻrinbosari D.Oʻrozboyeva, maktab amaliyotchi ruhshunosi G.Oʻrozmetova, ingliz tili uslubbirlashmasi raisi A.Omonova, 11-sonli maktab ingliz tili fani oʻqituvchisi B.Oʻrozmetova va maktabning tajribali oʻqituvchilari ushbu darsni tahlil qilib bordilar. Ular dars yakunida M.Toirovani darsini interfaol uslublardan zamonaviy axborot kommunikatsion texnologiyalardan foydalangan holda qiziqarli tarzda tashkil eta olganini taʼkidlashdi va yuqori baholashdi.

Darsning yuqori saviyada tashkil etilgani oʻquvchilar faolligida ham yaqqol namoyon boʻldi.

O.RAJABOVA.