Ishchi guruh tumanimiz yoshlarining tadbirkorlik faoliyati bilan yaqindan tanishdi

Oʻzbekiston Yoshlar ittifoqi faoliyatini boshlagandan soʻng, yoshlar bilan bogʻliq eng muhim masalalarni belgilab olgan holda muammolarga yechim topish yoʻlidan bordi. Yoshlar bandligini taʼminlash ana shunday dolzarb masalalardan biri edi. Turli loyihalar, uzoqni koʻzlab qilingan chora-tadbirlar natijasi bugun anchagina sezildi. Buni yoshlar bandligini taʼminlash borasida olib borilgan ishlarni tahlil qilgan holda anglab etish qiyin emas.

Oʻzbekiston Yoshlar ittifoqi yoshlar bandligini taʼminlash boʻyicha bir qator yangi loyihalar ham ishlab chiqdi. Ustoz-shogird anʼanasiga koʻra, hunarmandchilik, kasanachilikka jalb etish, mehnat yarmarkalari tashkil qilish bilan ish topa olmayotgan yoshlarga yordam berish, "Har bir yoshga – bir gektar" loyihasi orqali yoshlarni fermerlarga biriktirish hamda dehqon xoʻjaliklari va tomorqa yerlarida bandligini taʼminlash, “Yoshlar – kelajagimiz” jamgʻarmasi va “Har bir oila – tadbirkor” Davlat dasturlari doirasida ajratilgan imtiyozli kreditlar orqali yaratilgan yangi ish oʻrinlariga joylashtirish bu boradagi salmoqli ishlardan sanaladi.

Oʻzbekiston Yoshlar ittifoqi Qoraqalpogʻiston Respublikasi Kengashi tomonidan joriy yilda ishsiz yoshlarning bandligini taʼminlash borasida tumanlarda amalga oshirilayotgan ishlar bilan tanishish maqsadida tashkil etilgan ishchi guruh 19-mart sanasida Amudaryo tumanida boʻldi.

Ishchi guruh tumanda 2020-yilning shu davrigacha bu borada amalga oshirilgan samarali ishlar bilan yaqindan tanishdi. Guruh aʼzolari joriy yilda bandligi taʼminlangan yoshlarning ish faoliyati bilan tanishib, ularning takliflari, kelgusidagi rejalari hamda yoshlarimizni qiynayotgan muammolarni oʻrgandi.

Taʼkidlash joizki, bugungi kunda yoshlarni maʼnaviy yetuk va jismonan sogʻlom, vatanparvar va fidoyi qilib tarbiyalash, ularning huquq va manfaatlarini himoya qilish borasida keng koʻlamli ishlar amalga oshirildi. Joylarda, avvalambor chekka hududlarda istiqomat qilayotgan koʻp sonli yoshlarning oʻz iqtidor va isteʼdodini roʻyobga chiqarishi, tadbirkorlik faoliyati bilan shugʻullanishi uchun keng sharoitlar yaratilmoqda hamda shu orqali yoshlarni turli zararli illat, yot gʻoyalar taʼsiridan himoya qilish, yoshlar oʻrtasida huquqbuzarliklarning barvaqt oldini olishga katta eʼtibor qaratilmoqda.

Maʼlumot tariqasida aytish kerakki, joriy yilda tumanda 744 nafar yoshlarning bandligini taʼminlash rejalashtirilgan boʻlib, 18-mart kuni holatiga 210 nafar yoshlarning bandligini taʼminlashga erishildi.

Xususan, joriy yilning mart oyida tumanimizdagi Olmazor mahallasida yashovchi ana shunday yoshlardan  biri boʻlgan Sanjar Qazaqboyev va Beshovul mahallasida istiqomat qiluvchi Anvarbek Ashirovlarning oʻz bandligini taʼminlash maqsadidagi loyihalariga "Yoshlar – kelajagimiz" Davlat dasturi asosida mini futbol maydonchasini qurish uchun yer maydoni ajratilgan boʻlib, ishchi guruh aʼzolari ushbu qurilish maydoniga tashrif buyurdi.

Shuningdek, ana shunday tashabbuskor yoshlarimizdan Oxunjon Madrahimovning chorvachilikni rivojlantirish maqsadidagi loyihasi uchun "Yoshlar - kelajagimiz" davlat dasturi asosida 288 mln. kredit mablagʻlari ajratilgan boʻlib, yosh tadbirkor 30 bosh naslli chorva mollarini sotib olib, oʻz tadbirkorlik faoliyatini boshlagan. Oxunjon Madrahimovning tashabbusi bilan 4 nafar yoshning bandligi taʼminlangan boʻlib, ishchi guruh aʼzolari yosh chorvachilarning ish faoliyatlari bilan yaqindan tanishdi.

Bundan tashqari, Bekzod Nuraddinovning ham tadbirkorlik loyihasi qoʻllab-quvvatlanib, unga 2020-yil fevral oyida "Xar bir oila tadbirkor" davlat dasturi asosida 30 mln. soʻm miqdorida kredit ajratilgan hamda 2 nafar yoshlar uchun yangi ish oʻrinlari yaratilgan qandolat mahsulotlarini ishlab chiqarish faoliyatini yoʻlga qoʻygan. Ishchi guruh aʼzolari yosh tadbirkorning faoliyati bilan yaqindan tanishib, yanada rivojlantirish boʻyicha taklif va fikrlar bildirdilar.

Charos Arslonova, tuman hokimligining Axborot xizmati rahbari.