Ayol – hayot bahori

Bahor – barcha qalblarda ajib bir iliqlik uygʻotadi. Bahor yakinlashgan sayin butun vujudimizni nafis his-tuygʻular chulgʻab oladi. Uygʻonish fasli – bahorning ilk kunlaridanoq munis va moʻʼtabar onalarimizning, vafo va ibo timsoli boʻlmish qizlarning bayrami –     8-mart – Xalqaro xotin-qizlar kuni keng nishonlanadi.

Ayol borki, olam munavvar, mehr-muhabbatga toʻla. Shu oʻrinda Birinchi Prezidentimizning munis onalarimiz xaqida aytgan soʻzlarini keltirib oʻtmoqchiman: “Oilani xam, jamiyatimizni ham birlashtirib, fayz-u barokat kiritadigan, xonadonlarimizni mehr-muhabbat, nafosat, ezgulik nuri bilan munavvar qiladigan zotlar xam aslida moʻʼtabar onalarimiz, ayollarimiz, munis opa-singillarimizdir. Biz ayol timsolida, avvalo, Yaratganning buyuk moʻʼjizasi boʻlmish muqaddas ona siymosini koʻramiz va barchamizni dunyoga keltirgan, oq yuvib, oq taragan bu ulugʻ zotning oldida umrbod qarzdorlik hissi bilan yashaymiz”, – degan edilar.

Xaqiqatdan ham xozirgi kunda ayollarimizni barcha jabhalarda uchratishimiz mumkin. Ular nafaqat oilaning, balki jamiyatimizning ham gullab-yashnashiga, rivojlanishiga oʻz hissalarini  qoʻshmoqdalar. Onalarimiz xar tomonlama sogʻlom farzandlarni dunyoga keltirib, yurtimizning kelajagi boʻlgan barkamol avlodni tarbiyalamoqdalar. Ular ulugʻ ajdodlarimizning izdoshlarini,  yurtimizning nurli kelajagini kamolga yetkazmokdalar.

Bizning eng yaqin sirdoshimiz ham, maslahatgoʻyimiz ham onaizorimizdir. Hech bir zot bizga onamizchalik mehribon, jonkuyar boʻla olmaydi. Biz bunday iliqlikni faqatgina onalarimizdan tuyishimiz mumkin. Zero, ona qalbi eng olijanob hakam, eng yaxshi doʻst va alangasi intilishlarimizning muqaddas majmuasini isitadigan muhabbat quyoshidir.

Onalarimizni har qancha taʼriflamaylik, baribir kamlik qilaveradi. Barcha buyuk zotlarimiz ham onalarni madh etib, qanchadan-kancha sheʼrlar, gʻazallar bitishgan, ularning nomini koʻklarga koʻtarishgan.

Ayol – hayot bahori. U olib kelgan bahor har qanday yuraklardan butun umr joy oladigan, xonadonlarga fayz-baraka kiritib, el-yurtga  va kelajakka tamal toshi qoʻyadigan boqiy fasldir. Shuning uchun ham bu bahorni avaylab-asraymiz. Shu sababli qayerda boʻlsak-da, xayotimiz bahori doimo qalbimizda muhrlangan.

Yurtimizdagi barcha onalarimizni va opa-singillarimizni qutlugʻ ayyom – 8-mart – Xalqaro xotin-qizlar kuni bilan chin qalbimdan muborakbod etaman,  hamisha sogʻ-salomat  boʻling.

Dildor KARIMBOYeVA, 50-sonli maktab oʻqituvchisi.