MAKTABDA ANIQ FANLAR USLUB BIRLAShMASI AʼZOLARI IShTIROKIDA OChIQ DARS OʻTKAZILDI

Mamlakatimizda umumtaʼlim maktablarida taʼlim-tarbiya tizimini xalqaro andozalar darajasiga koʻtarish, yuqori sinf oʻquvchilarini qobiliyatlariga yarasha kasb-hunarga yoʻnaltirish, mavjud kasblar boʻyicha oʻquvchi-yoshlarga koʻnikmalar berish maqsadida oʻzlari qiziqqan kasblarni oʻzlashtirishlari uchun zarur sharoitlar yaratib berilayotgani taʼlim va tarbiyada muhim ahamiyat kasb etadi.

Maʼlumki, 11 yillik majburiy taʼlimga oʻtilishi  munosabati bilan xalqaro tajribani oʻrgangan  holda 2017-yilda 10-11-sinflar uchun yangi oʻquv rejasi ishlab chiqilib, oʻquv fanlari optimallashtirildi hamda yangi darsliklar chop etildi.

Oʻquvchilarni  kasb-hunarga oʻrgatish tizimining yangicha mexanizmi joriy etilib, oʻquv-ishlab chiqarish majmualarida AKT sohasida dasturlovchilar, kompyuter dizayneri, kompyuter sozlash texnigi kabi kasblar boʻyicha oʻqitishni tashkil etish choralari koʻrilayotgani oʻquvchi-yoshlarning ham aniq fanlar boʻyicha bilimini, ham kasbiy mahoratini oshirish imkonini bermoqda.

Bu kabi masalalar tumanimizdagi 70-sonli umumtaʼlim maktabida boʻlib oʻtgan aniq fanlar metod birlashmasi yigʻilishida atroflicha koʻrib chiqildi va yuqori sinf oʻquvchilarining bilimi hamda kasbiy mahoratini oshirishga qaratilgan vazifalar muhokama etildi. Yigʻilishda maktabning  matematika va informatika fani oʻqituvchisi Farhod Qodirov “Oʻquvchilar bilimini xalqaro baholashning PISA tizimi” xususida maʼruza qildi. Umumtaʼlim maktablarining 10-11-sinf oʻquvchilarining  nafaqat umumtaʼlim fanlarini oʻzlashtirishlari, balki oʻz qiziqishlari doirasida mehnat bozori talablariga mos kasblar, ayniqsa, zamonaviy axborot texnologiyalari boʻyicha dasturlovchilar, kompyuter ustalari, sozlovchilari, dizaynerlari kabi yoʻnalishlarni puxta oʻzlashtirishlari uchun har bir matematika va informatika fani  oʻqituvchisi masʼul ekanligini taʼkidladi.

Shundan soʻng, matematika fani oʻqituvchisi Islom Karimov ushbu fan oyligi  doirasida 5-sinfda “Oʻnli kasrlarni qoʻshish va ayirish mavzusini mustahkamlash” mavzusida ochiq dars tashkil etdi. Ochiq darsda oʻquvchilarga matematik amallarni puxta oʻzlashtirish kelajakda oʻzlari tanlagan kasblarda asqotishi atroflicha tushuntirildi. Xususan, mahobatli bino va inshootlar, temir yoʻllar, minoralar, daryolar ustiga quriladigan eng uzun koʻpriklar, moʻʼjizaviy osma yoʻllar, attraktsionlarning meʼmoriy yechimlari,  qoʻyingki, mashinasozlik, samolyotsozlik sohalaridagi muhandislik ishlarining barchasida aniq va puxta matematik hisob-kitoblar borligi misollar orqali koʻrsatib berildi. Oʻtilgan dars-mashgʻuloti yuzasidan berilgan qiziqarli savollar ham matematika fanining kundalik hayotdagi oʻrni xususida boʻldi. Oʻquvchilar bu borada aniq va puxta javob berib, darsda faollik koʻrsatishdi.

Koʻrgazmali qurollar vositasida hamda innovatsion gʻoyalar asosida tashkillashtirilgan ochiq darsni oʻquvchilar qay darajada oʻzlashtirganliklari oʻquvchilar bilimini  baholashning PISA tizimi talablariga muvofiq sinab koʻrildi. Dars yakunida mavzu yuzasidan berilgan savollarga oʻquvchilar tez va aniq javob berdilar.

Matematika fan oyligi doirasida aniq fanlar uslub birlashmasi aʼzolari ishtirokida boʻlib oʻtgan mazkur ochiq dars oʻqituvchilar mahoratini oshirib, oʻquvchilarning mavzuni puxta oʻzlashtirishlarini taʼminlagani bilan muhim ahamiyat kasb etdi.

Robiya YOʻLDOShEVA.