MAKTABDA ZULFIYaXONIM TAVALLUD KUNIGA BAGʻIShLAB TADBIR OʻTKAZILDI

Oʻzbek xalqining sevimli shoirasi, taniqli jamoat arbobi, xalqaro  tinchlikni sheʼriyatida oʻziga xos mohirlik bilan kuylagan, sevgi, vafo, sadoqat kuychisi deb nom olgan Zulfiyaxonimning ijodi ham, hayoti ham barcha xalqlar ayol-qizlari uchun namuna boʻla oladi.

U 17 yoshida yozgan “Hayot varaqlari” nomli birinchi sheʼrlar toʻplami bilan oʻzbek adabiy muhitiga oʻziga xos salobat, iqtidor va oʻta kamtar oʻzbek ayoli sifatida kirib keldi. Shoiraning ilk kitobidan boshlab, keyinchalik nashr etilgan turli janrlardagi asarlarini oʻz  ichiga olgan barcha sheʼriy toʻplamlarini barcha sevib oʻqiydi, oʻrganadi.

Uning vafotidan beri qancha yillar oʻtsa-da, hamon “Baxtim shul, oʻzbekning Zulfiyasiman” deb oʻzining ashʼorlari ila koʻz oʻngimizda tobora yuksakroq boʻy tiklayveradi, oʻqiganimiz sayin oʻqigimiz, uning maʼnaviyat chashmasidan qonib ichgimiz kelaveradi.

Shu bois unga talpinish, uning xotirasini hurmat-ehtirom bilan esga olish – hayot tarzimizdan chuqur joy egallagan.

Tumanimizdagi 14-sonli maktabda ham Zulfiyaxonim tavallud topgan kun munosabati bilan “Vafo va sadoqat kuychisi” deb nomlangan maʼnaviy-maʼrifiy tadbir boʻlib oʻtdi.

Tadbirda maktabning ona tili va adabiyot fani oʻqituvchisi Dilfuza Gʻoyibova Zulfiya hayoti va ijodi haqida maʼruza qildi. U oʻz soʻzida Ikkinchi jahon urushi yillarida “Uni Farhod der edilar”, “Hijron kunlarida” kabi toʻplamlaridan joy olgan sheʼrlari orqali turmush oʻrtogʻi, sevgan yori, farzandi urushga ketgan ayollarga ruhiy madad bergani, dunyo onalarini tinchlik uchun birlashishga chaqirganini misollar bilan tushuntirib berdi.

Zulfiya ijodidagi deyarli har bir asarda Hamid Olimjon obraziga bir ishora, uning ijodiy hayot yoʻlini davom ettirayotganidan faxrlanish hissi sezilib turishni alohida taʼkidladi.

Tadbir “Yosh tilshunos” toʻgaragi aʼzolarining Zulfiya sheʼrlarini ifodali oʻqishi bilan davom etdi. Shuningdek, maktab badiiy havaskorlik toʻgaragi aʼzolari ijrosida “Amudaryom” qoʻshigʻi bilan boshlanuvchi musiqiy dastur namoyish etildi. Qoʻshiq va raqslarni 8-sinf oʻquvchilari Javohir Madrahimov, Jondoʻst Jandeov, Gulbonu Pirmonovalar mahorat bilan ado etdilar.

Shuningdek, maktabning badiiy ijod bilan shugʻullanayotgan havaskor qizlari Gulmira Rustamboyeva, Sadoqat Bozorboyeva, Shahnoza Ibrohimova, Umida Ibrohimova, Gulruh Madrahimovalar shoira Zulfiyaxonimga izdosh boʻlishdek orzulari ifoda etilgan sheʼrlarini oʻqib berdilar.

Xalqaro “Nilufar” mukofoti, Bolgariya Xalq Respublikasining birinchi darajali “Kirill va Mefodiy” ordeni, Javoharlal Neru nomidagi umumhindiston sovrini, uch marta mehnat Qizil Bayroq ordeni sohibasi, hassos shoira, vafo va sadoqat kuychisi Zulfiyaxonimga havas qilmaydigan, asarlarini sevib oʻqimaydigan, unga oʻxshashga intilmaydigan oʻzbek qizi topilmasa kerak. Zulfiyaxonimga bagʻishlab yozilgan sheʼrlar ham buni ifodalab turibdi. “Oʻzbekning Zulfiyasi” ana shunday katta ehtiromlarga, eʼzozlarga munosib.

O.RAJABOVA.