Boshlangʻich sinflarda ochiq dars oʻtkazildi

Fan oyligi taʼlim muassasalaridagi oʻquv-tarbiya jarayonining zamonaviy talablar darajasida boʻlishini taʼminlash bilan bir qatorda, fan oʻqituvchilarining pedagogik mahoratini oshirish, ularning ijodiy izlanishlari va mehnatlarini roʻyobga chiqarishga xizmat qiladi. Shu sababli ham taʼlim tizimida fan oyliklari joriy qilingan. Mamlakatimizdagi barcha taʼlim maskanlarida boʻlgani kabi tumanimizdagi taʼlim muassasalarida ham fan oyliklari yuqori saviyada tashkil qilinib kelmoqda.

Taʼlim maskanlarida fan oyliklari doirasida turli xil tadbirlar, koʻrgazmalar, musobaqa, bellashuvlar bilan bir qatorda ochiq darslar ham tashkil etiladi. Ana shunday ochiq darslardan biri fevral – matematika va informatika fani oyligi doirasida tumanimizdagi 16-sonli ixtisoslashtirilgan davlat umumtaʼlim maktabida ham boʻlib oʻtdi. Yuqori saviyada oʻtkazilgan ochiq darsni maktabning boshlangʻich sinf oʻqituvchisi 4-“V” sinf rahbari Aziza Toʻrayeva tashkil qildi. “Kasrlar haqida tushuncha” mavzusidagi ochiq darsda zamonaviy pedogogik texnologiyalaridan, yangi metodlardan foydalanildi.

Dars jarayonining kichik guruhlarga ajratilgan holda olib borilgani oʻquvchilar oʻrtasida oʻzaro raqobatni kuchaytirdi. Oʻquvchilar oʻz jamoalarining yuqori koʻrsatkichlarni qoʻlga kiritishi uchun astoydil harakat qildilar. Ochiq darsda “Kim bilagʻon? kim chaqqon?”, “Muzladi”, “Sayohatchi bilimdon” metodlarini qoʻllash orqali oʻquvchilarning fanga boʻlgan qiziqishlari yanada ortdi hamda dars jarayoniga faol ishtiroki taʼminlandi.

Ochiq darsning qay darajada tashkil qilinganini kuzatish, oʻqituvchining pedagogik mahoratini baholash, sinf oʻquvchilarining dars jarayoniga, fanga boʻlgan munosabatini oʻrganish hamda oʻzaro tajriba almashinish maqsadida ilmiy ishlar boʻyicha direktor oʻrinbosari Gulzor Pirmonova, maktab oʻqituvchilaridan Dilfuza Xidirboyeva, Matluba Rahimova, Barno Yoʻldoshevalar ochiq darsda ishtirok qilishdi.

Bu orqali ustozlar oʻz hamkasbi, mahoratli oʻqituvchi, maktabning boshlangʻich sinflar uslub-birlashmasi rahbari Aziza Toʻrayevaning ish tajribasi va bilim salohiyatini yaqindan oʻrganishdi.

Shu oʻrinda taʼkidlash kerakki, fan oyligi davomida maktabning pedagogik jamoasi faolligi, mahoratli kadrlar bilan taʼminlanganligi, matematika fani xonasining zarur koʻrgazmali-didaktik materiallar bilan jihozlanishi, ota-onalar bilan maktabning hamkorligini jonlantirish, ularni fandagi yangiliklar, taʼlim tizimidagi oʻzgarishlar, oʻquvchilarning oʻzlashtirish va bilim samaradorligi koʻrsatkichlari bilan tanishtirish kabilarga qaratilgan samarali ishlar amalga oshirildi.
Dars mobaynida ustoz hamda oʻquvchilarning ochiq darsga astoydil tayyorgarlik koʻrishgani, ularning matematika faniga boʻlgan mehri hamda qiziqishlari havas qilgudek darajada boʻldi.

Xususan, ochiq darsda foydalanilgan metodlar darsning yanada jonlanishiga xizmat qildi. Ayniqsa, “Sayohatchi bilimdonlar” metodi orqali barcha oʻquvchilarning eʼtibori hamda diqqati jalb qilindi. Oʻquvchilar ushbu metod orqali matematik misollar va masalalarning javobini topish bilan “poyezd chiptalari”ni qoʻlga kiritishib, yurtimizning tarixiy shaharlariga “sayohat” qildilar.

Dars jarayonida faol ishtirok etgan oʻquvchilar ragʻbatlantirildi. Ochiq dars barcha oʻquvchilarda matematika faniga boʻlgan qiziqishlarining yanada oshishiga xizmat qildi.

Charos Arslonova.