Oliy Majlis Qonunchilik palatasi deputati Zumrad Bekatova tuman aholisi bilan uchrashdi

28-fevral kuni tuman hokimligining kichik majlislar zalida 4-Amudaryo saylov okrugidan Oliy Majlis Qonunchilik palatasi deputati Zumrad Bekatova, Xalq deputatlari tuman Kengashidagi OʻzMTDP deputatlik guruhi aʼzolari bilan uchrashdi.

Uchrashuvda OʻzMTDPdan saylangan deputatlar kelgusi 5 yillikda amalga oshirilishi lozim boʻlgan hamda partiya saylovoldi dasturida belgilangan vazifalarni bajarish toʻgʻrisida soʻz yuritdilar. Shuningdek, joylarda aholini qiynayotgan muammolarni aniqlash va ularni hal etishda oʻzaro hamkorlikni taʼminlagan holda amalga oshirish borasidagi chora-tadbirlar belgilab olindi.

Shundan soʻng, deputat Zumrad Bekatova Gulzor va Besh ovul mahallalaridagi saylovchilar bilan uchrashdi. Uchrashuvda OʻzMTDP QR Kengashi bosh mutaxassisi Iskender Jarimbetov. OʻzMTDP tuman Kengashi raisi Gulzoda Eshimbetova, mahalla raislari va faollari ishtirok etdilar.  

Uchrashuv davomida deputat  tomonidan Prezidentimizning 2020-yil 24-yanvar kungi Oliy Majlisga murojaatnomasida belgilab berilgan, joriy yilda amalga oshirilishi lozim boʻlgan vazifalar yuzasidan toʻxtalib oʻtdi. Shuningdek, Oliy Majlis Qonunchilik palatasida oxirgi ikki oyda qabul qilingan qonunlarning mazmun-mohiyatini aholiga tushuntirdi. Jumladan, toʻy-hashamlarni ixchamlashtirish boʻyicha nizomni buzganlik uchun javobgarlik belgilanayotgani, Oʻzbekiston Respublikasi fuqaroligi toʻgʻrisidagi hamda dori vositalarining noqonuniy aylanishining oldini olish borasidagi qonunchilikka kiritilayotgan oʻzgarishlar, geodeziya toʻgʻrisidagi qonunlar xususida soʻz yuritildi. Qolaversa, mahalla tizimida olib borilayotgan islohotlar haqida maʼlumotlar berildi.

Taʼkidlanganidek, mamlakatimizda mahalla instituti faoliyatini yanada takomillashtirishga, jamiyatda oila va xotin-qizlar oʻrni va rolini kuchaytirishga alohida eʼtibor qaratilmoqda. Davlatimiz rahbarining “Jamiyatda ijtimoiy-maʼnaviy muhitni sogʻlomlashtirish, mahalla institutini yanada qoʻllab-quvvatlash hamda oila va xotin-qizlar bilan ishlash tizimini yangi darajaga olib chiqish chora-tadbirlari toʻgʻrisida”gi Farmoni bilan mahalla va oilani qoʻllab-quvvatlash vazirligi tashkil qilingani, fikrimizning yaqqol dalilidir. Qolaversa, Prezidentimizning «Oʻzbekiston Respublikasi Mahalla va oilani qoʻllab-quvvatlash vazirligi faoliyatini tashkil etish toʻgʻrisida»gi Qarori, ushbu hujjat vazirlik faoliyatining asosiy yoʻnalishlari belgilab berilganligi bilan ahamiyatlidir.
Farmonga muvofiq, har bir mahallada «Obod va xavfsiz mahalla» tamoyiliga asoslangan yangi tizim joriy etiladi. Bu esa oʻz navbatida yurtimizda mahalla instituti orqali tinchlik-osoyishtalikni taʼminlash, obod yurt va farovon hayotni barpo etishga xizmat qiladi.

Uchrashuvlarda aholi murojaatlari ham tinglandi. Xususan, aholini qiynab kelayotgan muammolardan Gulzor mahallasi hududidagi kollektorda suv yigʻilib qolayotgani, bu holatlarga barham berish, ekologik kooefitsent masalasi, dori-darmon mahsulotlari qimmatligi, taʼlim va tibbiyotga taalluqli masalalarda murojaatlar boʻldi. Shu yerning oʻzida muammolarni bartaraf qilish yuzasidan tegishli tashkilotlar masʼullari bilan  kelishib olindi.
Uchrashuv doirasida Oliy Majlis Qonunchilik Palatasi deputati Zumrad Bekatova tumandagi 9-sonli bolalar musiqa va sanʼat maktabida boʻlib, maktab faoliyati hamda oʻquvchilar uchun yaratilgan shart-sharoitlar bilan tanishdi.

Maktab oʻquvchilari mehmonga oʻzlarining ijod namunalaridan kuy-qoʻshiqlar hamda raqslar ijro qilib berdilar.

Uchrashuv barchada katta taassurot qoldirdi.

Charos Arslonova, tuman hokimligining Axborot xizmati.