BOLAJONLAR YuRTIMIZNING ULUGʻ SIYMOLARIGA EHTIROM KOʻRSATIShDI

Mamlakatimizda oʻsib kelayotgan yosh avlodni maʼnaviy-axloqiy va intellektual rivojlantirish eng muhim vazifalardan sanaladi. Maktabgacha taʼlim tashkilotlarida shu boisdan bolalarning ona Vatan va atrof-olam, buyuk siymolar, bayramlar, mashhur sarkardalar haqidagi bilimlarini kengaytirishga alohida eʼtibor qaratiladi.

Mangʻit shahrida joylashgan 7-sonli maktabgacha taʼlim tashkilotida bolajonlarning yayrab-quvnab, oʻsib-ulgʻayishlari uchun barcha sharoitlar yaratilmoqda. Ovqatlanish, dam olish, taʼlim olish uchun alohida xonalar mavjud boʻlib, ularning  tashkilotdagi vaqtlari mazmunli va maqsadli oʻtishi uchun eʼtibor qaratilmoqda.

Hozirgi zamonaviy ilm-fan bolalarga bogʻcha yoshidan  ilm-maʼrifat oʻrgatish, ilm olishga ragʻbatlantirish, buning uchun taʼsirchan vositalardan foydalanish lozimligini uqtirmoqda.

Mazkur maktabgacha taʼlim tashkilotida ham bu borada talay ishlar olib borilayapti.

Shu yilning 24-fevralida tashkilot qisqa guruhi tarbiyachisi Goʻzal Yoʻldoshevaning “Oʻzbekistonning buyuk siymolari” mavzusidagi namunali ochiq darsi oʻtkazildi. Tadbirda tuman Maktabgacha taʼlim boʻlimi masʼullari, tumanimizdagi maktabgacha taʼlim tashkilotlari qisqa guruhlari tarbiyachilari ham ishtirok etdilar.
Tashkilot tarbiyachisi Goʻzal Yoʻldosheva namunali ochiq darsida avvalo mazkur darsni tashkil etishdan koʻzlangan maqsadlar haqida batafsil tushuncha berdi va tarbiyalanuvchilarni 5 ta guruhga ajratdi.

Dars maqsadiga muvofiq bolajonlarga diyorimizdan yetishib chiqqan ulugʻ alloma bobolarimiz Alisher Navoiy, Zahiriddin Muhammad Bobur hayoti va ilmiy, adabiy merosi haqida bolalarga tushunarli tilda bayon qilib berdi. Bolajonlarni  ularga munosib vorislar boʻlib yetishishga, buning uchun kelgusida maktabda ilm asoslarini puxta egallamogʻi lozimligini aytdi va odobli, oilasiga, yurtiga mehrli boʻlib voyaga yetishga chaqirdi.

Dars mavzusiga mos bezatilgan ulkan xonada  milliy kiyimlar kiyib, peshonasiga durrachalar bogʻlab olgan jajji oʻgʻil-qizlar beshta guruhga boʻlinib, har bir guruh aʼzolari oʻz iqtidorlarini namoyish etdilar.

Bolajonlarning oʻziga xos shirin tilda Alisher Navoiy va Zahiriddin Muhammad Bobur ijodidan tarbiyachi koʻmagida yod olgan gʻazallar, ruboiylarni ijro etishi barchaga zavq bagʻishladi. Shuningdek, bu ikki ulugʻ shoir hayotiga oid, asarlariga oid sahna koʻrinishlarini mahorat bilan ijro etishlari chindan-da olqishlarga sazovor boʻldi.

Ruhshunoslar taʼkidlashicha, aslida qobiliyatsiz bolaning oʻzi boʻlmas, faqat ushbu yashirin qobiliyatni anglab, bolaning namoyon etishiga sharoit yaratish zarur ekan. Ushbu namunaviy ochiq darsni koʻrgan kishi bunga qayta-qayta iqror boʻlishi tayin.

Tumanimizdagi maktabgacha taʼlim tashkilotlariga qamrab olinmagan, kelgusi oʻqish yilida maktablarning  1-sinflariga qadam qoʻyadigan oʻgʻil-qizlar uchun maktabgacha taʼlim tashkilotlarida tashkil etilgan qisqa guruhlar ularni maktab taʼlimiga sifatli tayyorlayotgani quvonarli holdir.

Ilk boshlangʻich taʼlim olib, harflarni, sonlarni oʻqish-yozishni oʻrganayotgan bolalar maktab taʼlimini hech qiynalmay oʻzlashtirib keta oladilar. Yuqoridagidek tadbirlar esa ularning tafakkuri yana ham kengayishiga xizmat qiladi. Shuningdek, tarbiyachilarning ham shaxsiy tajribasini rivojlantirish va hamkasblari bilan oʻzaro birdamlikni yulga qoʻyishda muhim ahamiyat kasb etadi.

O.RAJABOVA.