Voyaga yetmaganlar ishlari boʻyicha tuman idoralararo komissiyasi yigʻilishi oʻtkazildi

Tuman hokimligida voyaga yetmaganlar ishlari boʻyicha tuman idoralararo komissiyasining “Voyaga yetmaganlar oʻrtasida nazoratsizlik va jinoyatchilikning oldini olish va bu borada 2019-yil davomida amalga oshirilgan ishlar” muhokamasiga bagʻishlangan yigʻilish boʻlib oʻtdi.

Yigʻilishda tuman hokimi, Voyaga yetmaganlar ishlari boʻyicha tuman  idoralararo komissiya raisi S.Yoʻldashev, komissiya aʼzolari, tuman prokurori J.Muftullayev, ovul va mahalla fuqarolar yigʻinlari raislari, umumtaʼlim maktablari direktorlari va boshqalar ishtirok etdilar.

Voyaga yetmaganlar ishlari boʻyicha idoralararo komissiya raisi S.Yoʻldashev yigʻilishni kirish soʻz bilan ochdi va olib bordi.

Kun tartibidagi masala yuzasidan qilingan maʼruzalarda 2019-yilning 12 oyi davomida komissiya aʼzolari hamkorlikda oʻzlarining vazifalar taqsimotiga koʻra, voyaga yetmaganlar huquqlari, erkinliklari va qonuniy manfaatlarini taʼminlash borasida qator ishlar amalga oshirilganligi taʼkidlandi. Shuningdek, voyaga yetmaganlarning huquqlari, erkinliklari va qonuniy manfaatlarini himoya qilish, yoshlarning turli yot gʻoyalar qurboniga aylanishining va ular oʻrtasida huquqbuzarlik, jinoyatchilik, oʻz joniga qasd qilish holatlari sodir boʻlishining oldini olish, oila, mahalla, taʼlim-tarbiya maskanlarida taʼlim-tarbiyani toʻgʻri yoʻlga qoʻyish, munosib shart-sharoitlar yaratilishi ustidan nazoratni kuchaytirish maqsadida seminar, davra suhbatlari, uchrashuvlar oʻtkazilib kelinayotgani gapirildi. Umumtaʼlim va maktabgacha taʼlim muassasalarida ota-onalar va ularning oʻrnini bosuvchi shaxslar ishtirokida oʻtkazilgan tadbirlarda “Taʼlim toʻgʻrisida”gi va “Voyaga yetmaganlar oʻrtasida nazoratsizlik va huquqbuzarliklar profilaktikasi toʻgʻrisida”gi Qonunlarining mazmun-mohiyati keng tushuntirilgani aytib oʻtildi.

Undan tashqari, profilaktik hisobda turuvchi shaxslar bilan muntazam ravishda hamkorlikdagi xizmat sohalar bilan profilaktik ogohlantiruv ishlari olib borilayotgani, “Voyaga yetmaganlar oʻrtasida nazoratsizlik va huquqbuzarlikning profilaktikasi” Qonuni ijrosi yuzasidan qator ishlar amalga oshirilayotgani, mavjud muammolar sektorlar rahbarlari ishtirokida muhokama qilinib, tegishli chora-tadbirlar koʻrilayotgani toʻgʻrisida batafsil maʼlumot berildi.

Yigʻilishda soʻzga chiqqan boshqa masʼullar ham farzandlar taʼlim-tarbiyasiga eʼtibor qaratish, bu borada yoʻl qoʻyilayotgan kamchilik va muammolarni bartaraf etish yuzasidan oʻz fikr-mulohazalarini bayon etishdi.

Yigʻilishda muhokama etilgan masalalar yuzasidan tegishli chora-tadbirlar belgilandi.

O.Xudoyberganova.