Amudaryolik oʻqituvchiga “Xalq taʼlimi fidoyisi” koʻkrak nishoni berildi

 Bugungi kunda taʼlim tizimida juda katta oʻzgarishlar amalga oshirilmoqda. Muhtaram Prezidentimiz tomonidan jamiyatda oʻqituvchilarning nufuzini oshirish, ularni moddiy ragʻbatlantirishga juda katta eʼtibor berilmoqda. Bu esa oʻqituvchilarni oʻz ishiga yanada masʼuliyat bilan qarashga undamoqda.

 Bizning 39-sonli umumtaʼlim maktabimizda ham sifatli taʼlim-tarbiya berish borasida barcha oʻqituvchilar zamonaviy pedagogik texnologiyalar va AKT vositalaridan foydalanib, darslarni tashkil etishmoqda. Maktabimiz oʻqituvchilari buning natijasida samarali natijalarga erishib kelishmoqda. Ana shunday oʻqituvchilarimizdan biri – sohada 22-yil mehnat qilgan biologiya fani oʻqituvchisi Saida Murodboyevadir.

 U fanga boʻlgan qiziqishi tufayli oʻz ustida ishlashdan, izlanishdan aslo charchamaydi. Oʻquvchilarga ham biologiya fanini chuqurroq oʻrgatishga harakat qiladi. Darsda va darsdan tashqari paytlarda, fan boʻyicha toʻgarak mashgʻulotlari davomida bor bilimini berib, har bir oʻquvchini oldinga intilishga oʻrgatadi, undaydi. Uning shogirdlari  juda koʻp. Ustozning oʻzi kabi faol oʻquvchilari har yili Bilimlar bellashuvi, Fan olimpiadalarida qatnashishadi va tuman bosqichida doim gʻolib boʻlishadi. Qoraqalpogʻiston Respublikasi bosqichida ham muvaffaqiyatli qatnashib, faxrli oʻrinlarni aslo qoʻldan berishmaydi.

Saida Murodboyeva dars oʻtishda oʻquvchilarga juda talabchan, hamkasblar oʻrtasida esa kattaga hurmat, kichiklarga hamisha namuna. Undan tashqari, maktabda oʻtkaziladigan turli tadbirlarda, jamoat ishlarida ham faol qatnashadi. U taʼlim tizimidagi samarali mehnatlari uchun 2016-yili Oʻzbekiston xalq taʼlim aʼlochisi koʻkrak nishoni bilan taqdirlandi. Bu intiluvchan oʻqituvchida oʻz ishiga masʼuliyat hissini yanada oshirdi.

 Shu yil 5-fevral kuni Toshkent shahrida Xalq taʼlimi vaziri Sherzod Shermatov tomonidan xalq taʼlimi tizimi rivojiga hissa qoʻshgan va oʻrnak boʻlgan bir guruh oʻqituvchilar “Xalq taʼlimi fidoyisi” koʻkrak nishoni bilan taqdirlandilar. Bu mukofot Qoraqalpogʻiston Respublikasidan 5 nafar oʻqituvchiga berilgan boʻlsa, ular qatorida ushbu ushbu koʻkrak nishonga munosib deb topilgan 39-sonli maktabning biologiya fani oʻqituvchisi Saida Murodboyeva ham taqdirlandi.

- Bu nishonga ega boʻlishimda oila aʼzolarimning va hamkasblarimning ham koʻmaklari, hissalari bor – deydi hayajon bilan Saida Murodboyeva. – Xalq taʼlimi vaziri Sherzod Shermatovning shaxsan oʻzlari ushbu nishonni taqdim etgani meni nihoyatda ruhlantirdi. Bunday ragʻbat biz kabi oʻqituvchilarga katta masʼuliyat ham yuklaydi va yanada shijoat bilan ishlashga, yosh avlodni Vatan uchun munosib farzand qilib tarbiyalashda bor kuchimizni sarflashga undaydi.
Ustozimizni erishgan muvaffaqiyatlari bilan tabriklab, yutuqlari hamisha bardavom boʻlishini tilab qolamiz.

Muhabbat Jandauletova, 39-sonli maktab direktori oʻrinbosari.