«Adolat» SDP tashkil topganiga 25-yil toʻlganligi munosabati bilan tadbir oʻtkazildi

Mamlakatimizdagi eng katta siyosiy partiyalarning biri Oʻzbekiston «Adolat» SDP 1995-yilning 18-fevral sanasida tashkil topgan. Joriy yilda ushbu partiyaning tashkil topganiga 25-yil toʻladi. Shu munosabat yurtimiz boʻylab oʻtkazilayotgan tadbirlar tobora qizgʻin tus olmoqda.
11-fevral kuni Oʻzbekiston «Adolat» SDP tuman Kengashi tashabbusi bilan bayram tadbirlari tashkil etildi.

Tumandagi Uyshin madaniyat markazi va 6-maktabgacha taʼlim tashkilotida tashkil etilgan tadbirlar «Xalq manfaatlari yoʻlida xizmat qiladigan adolatli jamiyat quramiz» shiori ostida koʻtarinki ruhda oʻtdi. Tadbirni partiyaning tuman Kengashi raisi Mansur Oʻrozboyev kirish soʻzi bilan ochib, oʻtgan 25-yil davomida partiya tashabbusi bilan amalga oshirilgan, deputatlar tomonidan loyihalar doirasida olib borilgan ishlar va istiqboldagi ustuvor vazifalar haqida batafsil maʼlumot berdi.

Shu oʻrinda maʼlumot tariqasida aytish kerakki, Oʻzbekiston “Adolat” sotsial demokratik partiyasi —1995-yil 18-fevral partiya taʼsis qurultoyida tuzilib, Dasturi va Ustavi qabul qilingan va shu kuni OʻzP Adliya vazirligida roʻyxatdan oʻtgan. Partiyaning bosh maqsadi — Vatan mustaqilligini mustahkamlash, islohotlarning jadallashuviga, huquqiy demokratik, adolatli fuqarolik jamiyati barpo etish va Oʻzbekistonni jahonda rivojlangan mamlakatlar safidan mustahkam oʻrin olishiga munosib hissa qoʻshishdir.

Shuningdek, partiyaning gʻoyaviy negizini sotsial demokratiyaning 3 asosiy printsipi: siyosiy, iqtisodiy va ijtimoiy adolat tashkil etadi. Partiya aʼzolari qonun ustuvorligini taʼminlovchi adolatli ijtimoiy munosabatlar oʻrnatilgandagina odil jamiyat qurish mumkinligini taʼkidlashadi. “Adolat” SDP esa ushbu yoʻnalishdagi ishlarni bajarishni oʻzining asosiy vazifasi deb hisoblaydi. Partiya oʻrtahol va kam taʼminlangan aholi tabaqalariga tayanadi hamda ularning siyosiy, ijtimoiy irodasini namoyon etishga intiladi.

Mansur Oʻrozboyev 2019-yil 22-dekabrda oʻtkazilgan Oʻzbekiston Pespublikasi Oliy Majlisi Qonunchilik palatasi va xalq deputatlari mahalliy Kengashlar deputatligiga boʻlgan saylovlar natijasiga koʻra Oliy Majlis Qonunchilik palatasiga Oʻzbekiston “Adolat” sotsial demokratik partiyasidan 21 nafar deputat saylanganini, Qoraqlpogʻiston Pespublikasi Joʻqorgʻi Kengesi deputatligiga 6 nafar deputat, Xalq deputatlari tuman Kengashi deputatligiga 5 nafar deputat saylanganini maʼlumot tariqasida keltirdi.  

Bayram tadbiri doirasida partiyaning faol yoshlari tomonidan koʻrgazma va sahna koʻrinishlari namoyish etildi. Tuman sanʼatkorlari ijro etgan kuy-qoʻshiqlar barchaga birdek manzur boʻldi.

Tadbir davomida partiya safiga yangi aʼzolar ham qabul qilindi.

Charos Arslonova, tuman hokimligining Axborot xizmati.