Yangi tahrirdagi Soliq kodeksi mazmun-mohiyatini tushuntirishga bagʻishlangan tadbir oʻtkazildi

Oʻzbekiston Respublikasi Qonuni bilan Soliq kodeksiga oʻzgartish va qoʻshimchalar kiritilib, uning yangi tahriri tasdiqlandi.

Qonunga koʻra, yagona ijtimoiy toʻlov, yagona soliq toʻlovi va qatʼiy belgilangan soliq oʻrniga tegishlicha ijtimoiy soliq, aylanmadan olinadigan soliq hamda qatʼiy belgilangan miqdorda jismoniy shaxslardan olinadigan daromad soligʻi kiritilmoqda. Butun mamlakatimiz boʻylab, yangi tahrirdagi Soliq kodeksi hamda soliq qonunchiligidagi ushbu oʻzgarishlar mazmun-mohiyatini keng jamoatchilikka yetkazishga qaratilgan targʻibot tadbirlari tashkil etilmoqda.
Shunday targʻibot tadbirlaridan biri tumanimizdagi “Tamara-tekstil” xususiy korxonasida oʻtkazildi.

Tadbirkorlar va ishbilarmonlar harakati O'zLiDeP tuman Kengashi va tuman Davlat Soliq inspektsiyasi bilan hamkorlikda tadbirkorlik subʼektlarida yangi tahrirdagi Soliq kodeksi mazmun-mohiyatini tushuntirish maqsadida oʻtkazilgan mazkur tadbirda yosh tadbirkorlar va tadbirkorlik faoliyatini boshlash istagidagi yoshlar, korxona ishchilari ishtirok etdilar.

Tadbirda partiyaning tuman Kengashi va Soliq inspektsiyasi masʼullari yangi Soliq kodeksiga kiritilgan oʻzgartishlar, soliq turlari, soliq toʻlovchining xuquqlari, majburiyatlari, soliq majburiyatini bajarishning tartibi, soliqlar va boshqa majburiy toʻlovlarni toʻlash majburiyati xaqida tushunchalar berdilar.
Tadbir ishtirokchilariga yangi tahrirdagi Soliq kodeksida tenglik, aniqlik, soddalik va samaradorlik asos qilib olinganligi, ushbu kodeksning yangi tahririda soliq turlari 13 tadan 9 taga qisqartirilib, yagona yer soligʻi, davlat boji, bojxona toʻlovlari, tadbirkorlik faoliyatining ayrim turlari boʻyicha qatʼiy belgilangan soliqlar bekor qilinganligi boʻyicha kiritilgan oʻzgartishlar haqida batafsil maʼlumot berildi. Shuningdek, kichik korxonalar uchun aylanmadan soliq koʻrinishidagi alohida soliq rejimi saqlab qolinganligi, oldingi tartibga koʻra, korxonalar oʻrtasida oʻzaro moliyaviy munosabatlarga aralashgan holda, hosil boʻlgan debitorlik qarzdorligi majburiy undirilganligi tushuntirildi. Endi bu tartibdan voz kechilayotgani, yaʼni bir korxonaning soliq majburiyati boshqa birining zimmasiga tushirilmasligi ham aytib oʻtildi.

Tadbirkorlar va ishbilarmonlar harakati O'zLiDeP tuman Kengashi apparat rahbari Muqaddas Beknazarova ham yurtimizda soliq tizimida amalga oshirilayotgan oʻzgarishlar, tadbirkorlarga yaratilayotgan imkoniyatlar va Prezidentimiz Shavkat Mirziyoyevning Oliy Majlisga qilgan Murojaatnomasi haqida soʻz yuritdi. Davlatimiz rahbarining Murojaatnomada 2020-yilda birinchi marta tadbirkorlarga ichki bozorda sotgan mahsuloti boʻyicha qoʻshilgan qiymat soligʻining bir qismini qaytarish tartibi joriy etilishi, tadbirkorlarni qiynayotgan va haqli eʼtirozlariga sabab boʻlayotgan soha – litsenziya va ruxsatnomalar berish tizimi yengillashtirilishini alohida eʼtirof etganligini taʼkidladi. Shu oʻrinda Prezidentimizning “…Biz yangi ish oʻrinlarini yaratadigan tadbirkorlarni har tomonlama qoʻllab-quvvatlashimiz, taʼbir joiz boʻlsa, ularni yelkamizda koʻtarishimiz kerak”, degan fikrlari har bir tadbirkor uchun kuch-qudrat hamda shijoat bagʻishlashini ham mamnuniyat bilan tilga oldi.

Yangi tahrirdagi Soliq kodeksi hamda soliq qonunchiligidagi oʻzgarishlar mazmun-mohiyatini tushuntirishga bagʻishlangan tadbirda ishtirokchilar yetarli maʼlumotlarga ega boʻldilar.

Charos Arslonova, tuman hokimligining Axborot xizmati.