Sud raislari ishtirokida oʻtkazilgan seminarda murojaatlar boʻyicha qonun hujjatlari mazmun-mohiyati keng tushuntirildi

Keyingi yillarda mamlakatimizda insonlarni qiynayotgan muammolarini oʻrganish, xalq uchun farovon, tinch hayot tarzini yaratishga katta eʼtibor qaratilmoqda. Insonlarning huquq va erkinliklari himoyasi qonun hujjatlari bilan tobora mustahkamlanib borilmoqda.

Xususan, fuqarolar murojaatlarini oʻrganib chiqish va unda koʻtarilgan muammolarni yechimini topish borasida qonunchiligimiz yetarli darajada ishlab chiqilgan. Prezident farmonlari, qarorlaridan tashqari «Jismoniy va yuridik shaxslar murojaatlari toʻgʻrisida»gi Oʻzbekiston Respublikasi Qonuni, shuningdek, «Prokuratura toʻgʻrisida»gi Qonunining 7-moddasida «Fuqarolarning ariza va shikoyatlarini hamda yuridik shaxslarning murojaatlarini koʻrib chiqish» tartibi belgilab qoʻyilgan.

Ushbu qonun hujjatlarining mazmun-mohiyatini aholiga keng targʻib qilish maqsadida huquqni muhofaza qiluvchi organlar joylarda seminarlar, yigʻilishlar va boshqa targʻibot tadbirlarini tashkil qilishmoqda. Shunday tadbirlardan biri tumanimizdagi 82-maktabning faollar zalida boʻlib oʻtdi.

Seminarni 82-sonli maktab direktori Zafar Aqmanov ochdi hamda olib bordi. Oʻzbekiston Respublikasining “Jismoniy va yuridik shaxslarning murojaatlari toʻgʻrisida”gi Qonunining mazmun-mohiyatini oʻquvchilarga tushuntirish, ular bilan ochiq muloqot qilish maqsadida tashkil qilingan seminarda tuman Iqtisodiy sudi raisi Oʻtkir Sobirov, Jinoiy ishlar boʻyicha sud raisi Sultonmurod Davletmurodov, Maʼmuriy ishlar boʻyicha sud raisi Munavvar Karimboyeva, Fuqarolik ishlar boʻyicha sud raisi Erkin Uteniyazovlar qatnashishdi. Seminar ochiq muloqot tarzida oʻtkazildi.

Oʻtkir Sobirov dastlab oʻz nutqida “Jismoniy va yuridik shaxslarning murojaatlari toʻgʻrisida”gi Qonunining mazmun-mohiyati haqida toʻxtalib, huquqbuzarliklar profilaktikasi, jinoyatchilikka qarshi kurashishda jamoatchilikning oʻrni muhim ahamiyatga ega ekanini, huquqiy madaniyatni oshirish uchun, avvalo, har bir kishi oʻz haq-huquqini bilishi lozimligini taʼkidladi. Bu borada sudlarning oʻrni haqida gapirib, sud organlari tomonidan muntazam ravishda tegishli huquqiy maslahatlar ham berib borilishini aytib oʻtdi.

Shuningdek, “Jismoniy va yuridik shaxslarning murajaatlari toʻgʻrisida”gi Oʻzbekiston Respublikasi Qonunining 5-moddasida murojaatlarning shakllari va turlari belgilanganligi, unga muvofiq, murojaatlar ogʻzaki, yozma, yoki elektron shaklda boʻlishini tushuntirdi. Arizalar, takliflar va shikoyatlar murojaatlarning turlari hisoblanishini, murojaatlar, ularning shakli va turidan qatʼiy nazar, bir xil ahamiyatga egaligi haqida batafsil tushunchalar berdi.
Shundan keyin oʻquvchilarning mavzuga aloqador fikr-mulohazalari tinglandi. Oʻquvchilar oʻzlarini qiziqtirgan savollarga javoblar oldilar. Xususan, oʻquvchilar tuman Iqtisodiy sudining faoliyati bilan qiziqdilar. Sud raisi taʼkidlaganidek, tuman Iqtisodiy sudi tomonidan fuqarolarning huquqiy ongini, madaniyatini oshirish, ularni qiynayotgan masalalar boʻyicha atroflicha tushuntirishlar berish maqsadida alohida rejalar tasdiqlangan.

Alohida rejalarga muvofiq, 2019-yil davomida jami 49 ta targʻibot ishlari amalga oshirildi. Shundan 15 tasini sayyor qabullar va uchrashuvlar tashkil etgan boʻlsa, 7 ta davra suhbatlari hamda “Mening mahallam-mening sudyam” dasturi boʻyicha aholi bilan 27 ta uchrashuvlar oʻtkazildi.

Seminarda tumandagi Iqtisodiy, Jinoiy, Maʼmuriy va Fuqarolik sudlari tomonidan odil sudlovni amalga oshirish, sudni “Adolat qoʻrgʻoni”ga aylantirish, xalq bilan toʻgʻridan-toʻgʻri yuzma-yuz ochiq suhbatlar koʻlami yanada kengaytirilgani aytildi. Shu qatorda fuqarolarning muammolarini hal qilishda yaqindan yordam berish orqali buzilgan huquqlarini tiklash boʻyicha tegishli chora-tadbirlar belgilab olinib, bu boradagi ishlar mazkur yilda ham davom ettirilayotgani taʼkidlandi.

Charos Arslonova, tuman hokimligining Axborot xizmati.